6 khế apoăng hơnăm 2024, khu lo tŏng veăng mâu kong pơlê hiăng mơhnhôk châ lối 360 rơtal liăn, diâp tơmeăm ăm lối 1 rơtuh ngế kơtiê, vâ chê kơtiê, ngế ki ai tơdroăng rêh ối xơpá, mâu ngế ki tro trếo ‘mêi dioxin, rơpŏng châ tơnêi têa kum, rơpŏng ki tro kong mê khía mơhot têa kân lân lu, pơreăng tâ tú. Tơdroăng ki hbrâ ví khía mơhot têa kân lân lu hiăng châ tŏng kum ăm lối 25 rơpâu ngế ƀă tâi tâng kơxô̆ liăn kơnâ lối 7,5 rơtal liăn.

A rôh hôp, jâ Bùi Thị Hòa, Kăn hnê ngăn Khu lo tŏng veăng Việt Nam mơnhên tối khât mâu ivá mơ-eăm, mâu tơdroăng pêi pro dêi mâu tíu pêi cheăng tung Kơpong tơ’noăng kơxô̆ 6. Tơdrêng amê hlối pơkâ thế khu lo tŏng veăng mâu kong pơlê pơtối hơ’lêh nếo túa pơkâ pêi cheăng, pêi pro tơƀrê mâu tơdroăng mơhnhôk tŏng kum, ing pêi pro, kum mâu ngế ki xơpá mơ-eăm tung rêh ối tiô túa ki tơƀrê, krá tơniăn.