A plông kân Đại Đoàn kết, pơlê kong kơdrâm Plei Ku, Khu pơkuâ cheăng pêi – Mô đô̆i rong râ ƀă Rêh ối pơlê pơla kong pơlê Gia Lai pơxiâm po Tíu mơđah tơbleăng cheăng pêi kong pơlê Gia Lai hơnăm 2023, ƀă dó inâi ‘’Tŏng kum hnê mơhno – tơdjêp tơdroăng cheăng krá tơniăn’’. 60 khu tê mơdró hiăng tối ‘na tơdroăng kal vâ rah xo 4.000 ngế pêi cheăng a tíu mơđah tơbleăng kố. Tíu mơđah tơbleăng cheăng pêi ai lối 60 kŏng ti, khu tê mơdró veăng, tung mê, ai 33 khu tê mơdró veăng rah xo tơdrêng ƀă 30 khu tê mơdró pơcháu hnoăng ăm Tíu xiâm mơđah tơbleăng cheăng pêi kong pơlê hnê mơhno, tơbleăng tơdroăng kal vâ rah xo lối 4.000 ngế pêi cheăng.

Mâu ngế pêi cheăng klêi kơ’nâi châ rah xo kô pêi cheăng a mâu kơpong hngêi kơmăi kơmok, kŏng ti, khu tê mơdró tung kong pơlê ƀă mâu kong pơlê, pơlê kong kơdrâm peăng Hdroh ƀă kơlo liăn khế sap ing 7 – 20 rơtuh liăn/khế. Xuân a Tíu mơđah tơbleăng cheăng pêi, mâu kŏng ti rah xo mơngế pêi cheăng a kong têa Nhuk; Hàn Quốc ƀă hok tro lăm hriâm a kong têa Alơmăng ƀă kal rah xo 1.500 ngế.