VOV4.Xơ Đăng - Lối 94 rơpâu ngế hô̆i viên Hô̆i mâu ngế ki plôm mâ tung lâp tơnêi têa hiăng châ mung liăn mơnhông mơdêk cheăng kâ, tê mơdró. Kố cho tơdroăng ki châ mơ’no tối a Rôh hôp mơgêi 30 hơnăm Tơdroăng ki mung liăn sap ing khu râng liăn tơnêi têa ‘na tơdroăng ki tăng cheăng pêi hneăng hơnăm 1992 – 2022, po a pơlê kong kân Đà Nẵng a kơxo lơ 7/9.

Lối 94 rơpâu ngế cho mâu ngế ki plôm mâ châ mung liăn ing khu râng liăn tơnêi têa tăng cheăng

Tung pơla hdrối nah, sap ing Khu râng liăn tơnêi têa tăng cheăng pêi ƀă Hngêi rak liăn tŏng kum rêh ối pơlê pơla, rêm râ Hô̆i mâu ngế ki plôm mâ Việt Nam hiăng pơkâ, kum lối 94 rơpâu ngế hô̆i viên plôm mâ mung vâ chê 52 rơtal liăn vâ mơnhông cheăng kâ, păn mơnăn mơnoâ, pêt mâu hdrê loăng, tê mơdró kŭn, ‘ngré ƀă hên ki ê.

Pôa Phạm Viết Thu, Kăn hnê ngăn Tíu xiâm Hô̆i mâu ngế plôm mâ Việt Nam ăm ‘nâi: hên ngế ki plôm mâ mung liăn ki xúa tro tơdroăng hlo tơƀrê, rơpŏng chía niân, rơpŏng kro hlo tâk hên, rơpŏng kơtiê hlo chu kơdroh hên. Pakĭng tŏng kum ăm mung liăn, Hô̆i mâu ngế plôm mâ Việt Nam tơrŭm ƀă Vi ƀan Măt trâ̆n rêm râ pro nếo ƀă ‘mâi rơnêu vâ chê 2 rơpâu toăng hngêi tơrŭm, kum mâu ngế ki plôm mâ ai tơdroăng rêh ối tơniăn.

Katarina Nga tơplôu ƀă tơbleăng