VOV4.Xơ Đăng - Tơdroăng ki hriâm tung online, cho hriâm ƀă  phôn, vi tĭnh, lap top tiô troăng hyôh Internet khoh ton hâi tiah pơla hdrối mê hía nah ga ôh tá tơniăn troh tơdroăng hnê hriâm, mê ối pro tơdjâk troh ivá châ chăn, tuăn ngôa, tơdroăng ki rĕng xông kân dêi hok tro. Hên kong pơlê, tơring, cheăm tối ăm ‘nâi, kô hbrâ rơnáu, vâ ăm hok tro vêh hriâm a hngêi trung klêi kơ’nâi Têt Lo hơnăm nếo môi tiah tơdroăng hnê tối dêi Ngế pro xiâm hnê ngăn Chin phuh.

Cho môi tung mâu kong pơlê ki trâm pá ó khât sap ing pơreăng COVID-19 ƀă kơxô̆ ngế tâ pơtối tâk hên. Tây Ninh hiăng rế hía rế vâ vêh tiah hmâ ƀă tơdroăng ki rế hía rế kâi vâ hbrâ mơdât pơreăng ƀă pâk vaccine ăm hok tro tung hơnăm vâ troh hgêi trung. Nôkố, kơxô̆ mơngế châ pâk vaccine trum má 1 ƀă trum má 2 ăm hok tro sap ing lâm 7 troh lâm 12 pơrá châ lối 90%. Pôa Võ Đức Trong, kăn phŏ hnê ngăn Vi ƀan kong pơlê Tây Ninh ăm ‘nâi, kong pơlê kô vêh lôu péa hngêi trung hriâm vâ tơdah tâi tâng hok tro troh hngêi trung hriâm tơdrêng:

“Klêi kơ’nâi tơmâng xo mâu rơkong ki veăng tơpui dêi mâu nôu, pâ hok tro mê Tây Ninh hiăng tơbleăng ăm 2 lâm hriâm, cho lâm 9 ƀă lâm 12. Tung to lâi hâi achê kố kơxô̆ ngế hok tro hriâm tơdrêng ai 76% hriâm a hngêi cho dâng 24%. Tơdroăng ki klêi kơ’nâi to lâi hâi hriâm mê hlo tơniăn, tơkéa vâ tối cho tá hâi hlo ai ngế ki lâi tâ pơreăng. Tung tơdroăng tơdjuôm mê Tây Ninh kô luâ Têt âm lĭt mê ngin kô tơbleăng hriâm tơdrêng ăm tâi tâng mâu khô̆i.

Mâu hnoăng cheăng hbrâ mê troh nôkố Tây Ninh hiăng hbrâ rơnáu tro tiô tơdroăng ki hnê hriâm dêi Khu xiâm ngăn hnê hriâm xuân môi tiah Khu xiâm ngăn pơkeăng”.

Nôkố ai mâu kong pơlê ối tung tíu ki pơreăng COVID-19 tâ tú rơ-iêo rôh má 4 môi tiah Pơlê kong kân Hồ Chí Minh dế pêi pro rế hía rế lôu péa hngêi trung hriâm. Pôa Nguyễn Văn Hiếu, kăn pơkuâ Khu ngăn hnê hriâm ƀă hnê mơjiâng tuăn ngo rơkê pơlê kong kân Hồ Chí Minh ăm ‘nâi, nôkố kơxô̆ ngế hok tro sap ing khô̆i lâm 7 troh khô̆i lâm 12 hiăng lăm hriâm tơdrêng châ lối 98%, kơxô̆ hok tro lăm hriâm tâ COVID-19 iâ, mê pơlê kong kân dế séa ngăn vâ ăm hok tro ki kŭn tâ troh hngêi trung:

“Ing tơdroăng ki tơkŭm po pêi cheăng tơdrêng mê péa kơvâ cheăng: kơvâ ngăn pơkeăng ƀă kơvâ ngăn hnê hriâm kô ai túa pơkâ pơtroh ăm Vi ƀan hnê ngăn pơlê kong kân kô pơtối pơkâ mơ’no, sap ing hâi lơ 7/2, tơkéa vâ tối cho klêi kơ’nâi Têt Lo hơnăm nếo kô tơkŭm ăm mâu hok tro sap ing lâm 6, hok tro râ má môi ƀă hok tro mầm non châ troh hngêi trung tiô tơdroăng ki rơhêng va xêh dêi mâu nôu, pâ vâi”.

Hên kong pơlê ki ê xuân hiăng ai tơdroăng tơmiât ăm tâi tâng hok tro vêh hriâm a hngêi trung klêi kơ’nâi Têt Lo hơnăm, la tơdroăng ki pơkâ mơ’no cho athế ai mâu troăng hơlâ rak tơniăn ƀă tối tơbleăng tung um tơvi vâ hơlêm hiâm mơno ăm mâu nôu, pâ, pro tơdroăng ki môi tuăn ƀă tơrŭm pêi pro mâu troăng hơlâ hbrâ mơdât pơreăng. Hà Nội xuân trâm tơdroăng ki ôh tá tơniăn ‘na hiâm mơno kố drêng lôu péa hngêi trung hriâm, ki phá tơviah ai lâm xua xâu pơreăng mê bu ai to 1 ngế hok tro troh a lâm.

Pôa Trần Thế Cường, kăn pơkuâ Khu ngăn hnê hriâm ƀă hnê mơjiâng tuăn ngoâ rơkê pơlê kong kân Hà Nội ăm ‘nâi, tiô tối hdrối hâi lơ 7 ƀă lơ 8/2 kô ăm hok tro sap ing lâm 7 troh lâm 12 vêh hriâm a hngêi trung hriâm tơdrêng. Kơvâ ngăn hnê hriâm ƀă hnê mơjiâng tuăn ngoâ rơkê ƀă kơvâ cheăng ki ai tơdjâk troh hiăng mơjiâng mâu túa pơkâ rak tơniăn má môi ăm mâu hok tro drêng lăm hriâm tơdrêng. Laga, xơpá má môi nôkố mê cho tơdroăng ki ôh tá mâu ngế cheăng khăm pơlât tung hngêi trung hriâm vâ rak ngăn ivá châ chăn ăm hok tro:

“Nôkố, cheăng khăm pơlât tung hngêi trung ôh ti ai. Krê a Hà Nội ối kal 450 ngế cheăng khăm pơlât. Xua mê, nôkố Hà Nội dế ai troăng hơlâ cho xúa mâu ngế cheăng khăm pơlât ki hiăng pơtê cheăng vâ pleăng dêi hnoăng cheăng veăng tung tơdroăng khăm pơlât a mâu hngêi trung hriâm. Má péa, cho pơkâ thế hngêi pơkeăng cheăm, bêng pơlê kân tŏng kum, la ki khât xuân ôh ti ai.

Pâ thế Khu xiâm ngăn hnê hriâm ƀă hnê mơjiâng tuăn ngoâ rơkê, Khu xiâm ngăn pơkeăng ƀă khăm pơlât, Khu xiâm ngăn kong pơlê ƀă hnoăng cheăng dêi mâu kăn ƀô̆ tơmâng ngăn pro tiah lâi ăm mâu cheăm, tơring ki ai khu cheăng khăm pơlât tung hngêi trung hriâm, rak tơniăn, rak ngăn ivá châ chăn ăm hok tro, malối cho tung pơla ai pơreăng COVID-19”.

Pôa Nguyễn Trường Sơn, ngế xiâm phŏ ngăn pơkeăng ƀă khăm pơlât xuân môi tuăn ƀă tơdroăng ki lôu péa hngêi trung hriâm xua Việt Nam hiăng ai kơxô̆ ngế pâk vaccine trum má 2 vâ chê tâi. Hdrêng sap ing 12 troh 17 hơnăm xuân châ pâk vaccine ƀă la ngiâ ah kô hbrâ rơnáu pâk ăm vâi hdrêng sap ing 5 troh 11 hơnăm:

“Tơdroăng ki ăm vâi hdrêng vêh hngêi trung hriâm cho tơdroăng ki kal khât dế nôkố. Tung pơla dế nôkố mê kuăn pơlê pin xuân môi tiah kơlo tâ tú dêi pơreăng. Má péa nếo, tơdroăng ki lôu péa hngêi trung hriâm ăm mâu vâi muăn vêh hngêi trung cho ối tơngăn tung mâu tơdroăng ki rak tơniăn há lơ ôh, tung mê rơpŏng hngêi athế tơniăn, hngêi trung hriâm tơniăn ƀă tá pơlê pơla kong pơlê mê athế tơniăn ƀă á xuân tơmiât klêi kơ’nâi Têt Lo hơnăm nếo gá tơtro”.

Vâ pro tơ’lêi hlâu ăm mâu kong pơlê lôu péa hngêi trung hriâm, tung la ngiâ ah, Khu xiâm ngăn pơkeăng ƀă khăm pơlât kô rĕng ai hlá mơ-éa hnê mơhno ‘mâi rơnêu ‘na túa ki mơnhên ki râ ó dêi pơreăng, Khu xiâm ngăn hnê hriâm ƀă hnê mơjiâng tuăn ngoâ rơkê tiah mê kô ai hlá mơ-éa pơkâ ‘mâi rơnêu mâu hlá mơ-éa ki ton vâ tơtro ƀă mâu tơdroăng ki hnê mơhno dêi Khu xiâm ngăn pơkeăng ƀă khăm pơlât tung tơdroăng nếo. Pakĭng mê, Khu xiâm ngăn hnê hriâm ƀă hnê mơjiâng tuăn ngoâ rơkê kô ai tơ’nôm mâu tơdroăng ki hnê mơhno ăm râ mầm non vâ pro tơ’lêi hlâu ăm mâu kong pơlê tơbleăng.

Minh Hường chêh

Katarina Nga tơplôu ƀă tơbleăn