Hâi lơ 15/12, a Lâm Đồng, Vi ƀan xiâm Măt trâ̆n Tơnêi têa Việt Nam hiăng tơkŭm po hneăng hôp tơpui tơno pêi pro ƀă séa ngăn tơdroăng pơkâ xiâm tơnêi têa mơnhông mơdêk cheăng kâ rêh ối pơlê pơla kơpong hdroâng kuăn ngo ƀă kong ngo kơpong Tây Nguyên. Tối tơbleăng a hneăng hôp ăm ‘nâi: Hneăng hơnăm 2021 – 2025, kơxô̆ liăn ing tơdroăng pơkâ xiâm tơnêi têa kô mơ’no 138 rơpâu rơtal liăn vâ kơjo mơnhông mơdêk cheăng kâ – rêh ối pơlê pơla kơpong hdroâng kuăn ngo ƀă kong ngo a 3.434 cheăm dêi 51 kong pơlê.

Krê kơpong Tây Nguyên ai 521 cheăm, ƀă 417 thôn, pơlê ki pá puât châ pơxúa. Vâ kơxô̆ liăn xúa tro pơkâ, pêi pro mâu tơdroăng, tơdroăng tơkêa bro mơ’no liăn châ tơƀrê hên, hneăng hôp tơpui tơno hiăng mơdoh hên chôu tơpui tơno, tối hên tơdroăng rơtâ tá mâu tơdroăng: pro ti lâi mơnhông mơdêk hnoăng Măt trâ̆n Tơnêi têa Việt Nam mâu khu râ tung pêi pro ƀă séa ngăn tơdroăng pơkâ xiâm tơnêi têa mơnhông mơdêk cheăng kâ – rêh ối pơlê pơla kơpong hdroâng kuăn ngo ƀă kong ngo; mơdêk châ tơƀrê tơdroăng séa ngăn dêi kuăn pơlê ƀă mâu tơdroăng tơkêa bro mơ’no liăn cheăng.