Kong tô pơ-oh tung hâi apoăng khế 4 dêi rơnó tô mơdrăng Tây Nguyên, ngin trâm đảng viên Y Tuyên Bkrông (kuăn ngo Rơđế), 53 hơnăm, ƀuôn Dray Hling, cheăm Hòa Xuân, pơkê kong kơdrâm Ƀuôn Ma Thuột (Dak Lak) drêng dế ƀă mâu kŏng nhân dế hơ’lâk phon a klôh ki pro vâ tôh dêi kơdrum kơphế rôh má pái ki pêt tơvât ƀă tiu, plâi sầu riêng. Pôa tối, hnoăng cheăng a cho đảng viên a đi đo pơtối rak vế lĕm tro tuăn tơmiât, châ pro, djâ troăng ahdrối tung pêi chiâk, kơdroh kơklêa xăm kơtiê.

Kơ’nâi hên hơnăm kơhnâ mơhnhôk pêi cheăng kâ, nôkố rơpŏng hngêi pêi cheăng pê lo lối 200 rơtuh liăn/hơnăm, ing 1.500 xiâm kơphế, 400  xiâm tiu ƀă 40 xiâm loăng plâi sầu riêng. Drêng tơdroăng cheăng kâ tơniăn, pôa vâ kum mâu ngế kơtiê xơpá ki ê ƀă kuăn pơlê tung pơlê. Pôa Y Tuyên Ƀkrông tối:

 “Á cho ngế ki lăm hriâm tung cheăm kô hriâm ‘na kih thuât pêt kơphế tiu ƀă plâi sầu riêng. Tung pơla hriâm mê á kô hnê ăm kuăn pơlê khoa hok kih thuât rak ngăn loăng kơphế’’.

Ngoh Y Vinh HĐơk (kuăn ngo Rơđế) 38 hơnăm, ƀuôn Cư̆ Đnuê, cheăm Hòa Xuân, pơlê kong kơdrâm Ƀuôn Ma Thuột, kong pơlê Dak Lak xuân cho đảng viên chiu pá puât, kơhnâ cheăng kâ. Mơdêk tuăn mơ-eăm dêi đảng viên “khên tơmiât, khên pêi'’, rêm hơnăm ngoh pêi cheăng châ xo lối 200 rơtuh liăn ing pêt loăng plâi ƀă hlối cho ngế ki pơkuâ mâu ngế pêi cheăng pro hngêi trăng. Kơ’nâi hên hơnăm kơhnâ pêi cheăng, mơ’nui hơnăm 2023 kố nah, ngoh hiăng pro hngêi lĕm rơdâ 100m2, kơnâ hrĭng rơtuh liăn. Ngoh Y Vinh tối:

 “Drêng hiăng klêi pro lêng rah xo tơdroăng cheăng mơjiâng pro hngêi, klêi mê lăm pêi cheăng vâi ƀă xo pêi tơ’nôm hnoăng cheăng pro hngêi râ má pŭn, ai hơnăm ki ‘nâ xo pro 3 - 4 toăng hngêi, ai hơnăm ki iâ dâng 2 toăng hngêi. A krếo mâu nhŏng o ki cheăng mơjiâng hngêi trăng tung pơlê tăng châ dâng 7 - 8 ngế, 4 ngế ki rơkê ‘na mơjâng pro ƀă 3 ngế lơ 2 ngế veăng kum, mơhá hnoăng pro ăm môi ngế sap 400 - 450 rơpâu liăn/ngế/hâi, ngăn tiô kơ mâu ngế ki pêi rơkê lơ ôh, tâng mâu ngế ki veăng pêi mê hiăng hmâ pêi hngêi vâi kơ mơhá ăm 320 rơpâu liăn tâng mâu ngế hmâ pêi há la ôh tá keăn rơkê ăm hnoăng dâng 300 liăn/ngế/hâi. Vâ tối tâi tâng kơxô̆ liăn châ xo ing tê kơphế ƀă tá liăn mơjiâng pro hngêi trăng xuân châ sap 150 – 200 rơtuh liăn/hơnăm.

Khu lêng hneăng hdrối pơlê kong kơdrâm Ƀuôn Ma Thuột ai 8.080 ngế, tung mê ai 2.691 ngế  cho đảng viên, dâng  vâ chê 600 ngế cho kuăn ngo, cho kuăn ngo Rơđế, M’Nông, Tày, Nùng, Dao, Thái, Mông... Pôa Nguyễn Công Tình – Kăn phŏ hnê ngăn Khu mâu lêng hneăng hdrối pơlê kong kơdrâm Ƀuôn Ma Thuột tối, mâu hơnăm hdrối, mâu đảng tung khu xuân pơtối rak tro hnoăng cheăng djâ troăng a hdrối, kuăn pơlê pêi kơ’nâi’’.

Mâu khu ki mê xuân pơtối rak tuăn mơ-eăm, khên tơnôu dêi mơngế lêng “Mố đô̆i Pôa Hồ’’ tung tơdroăng nếo nôkố ƀă tuăn ‘nâi mơ-eăm kơhnâ, ôh tá xâu pá puât kơhnâ pêi cheăng, kơdroh kơklêa xăm kơtiê. Sap ing mê, ai, ai hnoăng veăng ‘no hên ƀă tơdroăng mơnhông cheăng kâ – rêh ối dêi pơlê kong kơdrâm Ƀuôn Ma Thuột, mơjiâng khu rế rơdêi tung tŭm tơdroăng, kum hên ngế ai cheăng pêi a pơlê ƀă kơxô̆ liăn pê lo tơniăn. Mâu đảng viên Y Tuyên Bkrông prế Y Vinh H’Đơk cho mâu ngế ki djâ troăng a hdrối tiah mê. Pôa Nguyễn Công Tình ăm ‘nâi:

 “Tung mâu rôh hôp, ngin hiăng tơbleăng inâi mâu ngế ki kơhnâ  rơkê cho đảng viên Y Vinh prế Y Tuyên vâ mâu chi hô̆i lơ khu a pơlê cheăm hriâm pêi ƀối túa mơnhông cheăng kâ. Malối vâ mâu ngế tung khu cho kuăn ngo tah lôi ki ôh tá khên, mơ-eăm kơhnâ pêi cheăng kâ kơdroh kơklêa xăm kơtiê môi tiah Y Vinh prế Y Tuyên. Ing mê, vâ tơbleăng troh lâp lu tung Khu mâu lêng hneăng hdrối pơlê kơ kơdrâm ƀă tung kuăn pơlê’’.

Vâ tối, mâu đảng viên mơngế Rơđế tung Khu lêng  hneăng hdrối pơlê kong kơdrâm Ƀuôn Ma Thuột môi tiah pôa Y Tuyên lơ ngoh  Y Vinh hiăng ƀă dế pro xiâm mơhnhôk mơ-eăm, tuăn loi ƀă hlối  tơbleăng troh lâp lu vâ mâu ngế tung khu ki ê lơ mâu kuăn pơlê hdroâng kuăn ngo a pơlê kong kơdrâm Ƀuôn Ma Thuột tối krê ƀă kong pơlê Dak Lak tối tơdjuôm thăm rế kro mơdrŏng.