Tơpui a rôh leh, pôa Vương Đình Huệ, Kăn xiâm hnê ngăn Kuô̆k hô̆i ăm ‘nâi, a kơpong tơnêi ATK Việt Bắc, hơnăm 1948, Kăn xiâm hnê ngăn tơnêi têa Hồ Chí Minh apoăng hiăng mơ’no rơkong krếo thế tơ’noăng pâ nhuô̆m tơnêi têa ƀă mơhnhôk: ‘Tơ’noăng cho pâ nhuô̆m tơnêi têa, pâ nhuô̆m tơnêi têa mê athế tơ’noăng, mâu ngế ki tơ’noăng cho mâu ngế pâ nhuô̆m tơnêi têa khât”.

Tung plâ 75 hơnăm hdrối nah, hiâm mơno mê cho ivá kân khât dêi tơdroăng tơ’noăng pâ nhuô̆m tơnêi têa mơnhông ôh tá pơtê, veăng kum pro chiâng mâu tơdroăng ƀlêi chiâng ki kân, ai pơxúa khât sap nah tá troh nôkố tung tơdroăng mơjiâng ƀă rak vế Tơnêi têa Việt Nam, mơjiâng tơnêi têa hâi kố.

Tuyên Quang cho kong pơlê djâ troăng ahdrối ‘na rak ngăn kong ƀă mơnhông mơdêk cheăng kâ pêt kong. Ƀăng tơnêi tơnêi pêt kong châ 76% ƀăng tơnêi kong ki chiâng xêh. Kong pơlê pêi pro tro túa pơkâ xoăng 3 túa kong; tơbleăng rơkê hnoăng cheăng rak ngăn ƀă mơnhông pêt kong; pêt nếo lối 11 rơpâu ha rêm hơnăm; tơdroăng ki mơjiâng kơpong pêt kong vâ bro kế tơmeăm châ vâ chê 200 rơpâu ha, kơxô̆ kong loăng bro xâp rơngiâp cha lối 65%; rak vế ‘na mâu kong kế nhâ loăng, krá tơniăn ton, veăng kum kal khât tung tơdroăng ki rak vế gen ƀă bro chiâng ai têa; hbrâ rơnáu hbrâ ví châ tơƀrê tung têa kân lân lu, kong tô mơdrăng khăng khoăng, tơhnah tơhnâp tơnêi ƀă hên ki ê ăm kơpong kĭng têa kơxĭ peăng kơnhŏng.

Pôa Vương Đình Huệ, Kăn xiâm hnê ngăn Kuô̆k hô̆i tối nhên, hơnăm 2023, Tuyên Quang kal mơdêk tiah hmâ pơlê cheăm kăch măng ƀă mâu tơdroăng ki tơƀrê hiăng pêi pro châ, mơdêk tâ nếo tơdroăng tơ’noăng pâ nhuô̆m tơnêi têa, pro ivá tơdjâk mơhnhôk kăn ƀô̆, đảng viên ƀă Kuăn pơlê mâu hdroâng kuăn ngo khŏm mơ-eăm pêi klêi tâi tâng mâu tơdroăng pơkâ, hnoăng cheăng mơ’no.

“Drêng kố, á pơkâ thế mâu kơ koan Tơnêi têa, ki hdrối tâ ƀă ki tơdrêng cho Khu xiâm ngăn chiâk deăng ƀă Mơnhông thôn pơlê kum kong pơlê Tuyên Quang mơdêk rơdêi tâ nếo tơdroăng ki xúa kơmăi kơmok rơxông nếo tung rak vế ƀă mơnhông pêt kong, mơnhông cheăng kâ pêt kong, tơtro ƀă tơdroăng ki pêt kong, rak vế kong ƀă mơnhông pêt kong ƀă ôm hyô kong kế nhâ loăng, rak vế khôi túa lĕm tro ƀă mơjiâng thôn pơlê nếo”.

Kăn xiâm hnê ngăn Kuô̆k hô̆i pơkâ thế mâu khu râ, kơvâ cheăng pơtối hơ’lêh nếo ƀă mơdêk tơdâng tơ’mô, pơxúa tơƀrê tâ nếo tơdroăng tơ’noăng pâ nhuô̆m tơnêi têa tơtro ƀă hriâm tâp ƀă pêi pro tiô hiâm mơno, túa reh ối dêi Hồ Chí Minh; ôh tá pơtê mơdêk hiâm mơno tơrŭm, ivá rơdêi dêi tâi tâng khu pơkuâ tơdroăng kal kí, tơdroăng ki môi hiâm mơno, tơrŭm ivá dêi tâi tâng kuăn pơlê pêi pro tro mâu tơdroăng pơkâ dêi Đảng, tơdroăng pơkâ dêi Kuô̆k hô̆i ‘na mơnhông mơdêk cheăng kâ rêh ối pơlê pơla ƀă liăn ngân tơnêi têa hơnăm 2023 vâ tí tăng ‘nâi mâu tơdroăng ki ai hlâu, pơxúa, mơdêk mơnhông tung tâi tâng mâu kơvâ cheăng kâ rêh ối pơlê pơla, rak vế tơniăn tơdroăng reh ối pơlê pơla ƀă kơlo cho tíu xiâm cho mơdêk tơdroăng rêh ối rêm kơvâ cheăng dêi kuăn pơlê.

Tơrêm kơvâ cheăng, rêm kong pơlê, rêm khu tơrŭm, rêm kơ koan, tíu pêi cheăng pơtối mơnhên ƀă hnê mơhno krá rơdêi mâu tơdroăng tơ’noăng ƀă ki xiâm dêi tơdroăng tơ’noăng kố athế nhên, ki kal tơtro ƀă troăng hơlâ tơ’lêi vâ tơ’mot ƀă mâu tơdroăng ki pơxúa achê; mơhnhôk pêi pro kơdĭng, kơhnâ hbrâ, mơdât kâ kơluâ, pro mơhrê liăn ngân, hơ’lêh chêh pro hlá mơéa, malối cho pêi pro tro hnoăng cheăng ki châ hlo, hnê tơ’nôm, po rơdâ mâu túa pơkâ tơƀrê; hơ’lêh nếo hnoăng cheăng khê̆n kơdeăn, bro ivá mơhnhôk mâu khu tơrŭm, mâu ngế krê pêi klêi rơkê tro hnoăng cheăng tiô tíu pêi cheăng ƀă pôu râng tơdroăng cheăng dêi tơná, pro tơƀrê tơbâ 75 hơnăm hâi Pôa Hồ mơ’no rơkong krếo thế tơ’noăng pâ nhuô̆m tơnêi têa (11/6/1948 -11/6/2023).

Kăn xiâm hnê ngăn Kuô̆k hô̆i tối nhên, rơnó Hơngui Quý Mão 2023 pơtối cho “Têt pêt loăng” châ pơxiâm po sap ing rơnó Hơngui Canh Tý klăng 63 hơnăm hdrối nah tiô rơkong krếo thế dêi Pôa Hồ Chí Minh; cho tơdroăng ki tơhrâ dêi pêi pro pơkâ thế dêi Khu pơkuâ hnê ngăn Đảng a Pơkâ kơxô̆ 13 dêi Tơnêi têa ‘na thăm mơdêk pơkuâ dêi Đảng ƀă hnoăng cheăng rak ngăn, rak vế ƀă mơnhông pêt kong vâ mơjiâng môi “tơdroăng cheăng kâ ngiât”, mơnhông krá tơniăn.

“Tâi tâng pêi pro ăm rôh tơdroăng pêi pro ki kal má môi: Mâu ngế ki pêt kong athế rêh ối châ pơxúa ing kong ƀă kro mơdrŏng sap ing kong, khŏm mơ-eăm pêi pro hơ’lêh mâu tơdroăng pơkâ mơjiâng kong pơlê Tuyên Quang cho Tíu xiâm pêt kong xúa kơmăi kơmok rơxông nếo ƀă tíu xiâm pêt mơjiâng, uâ loăng kơpong Trung du ƀă peăng kong ngo pá kơnhŏng tiô pơkâ thế a tơdroăng pơkâ 11 dêi Khu xiâm pơkuâ tơdroăng kal kí ‘na túa tơmiât mơnhông mơdêk cheăng kâ – rêh ối pơlê pơla, rak vế tơniăn gak kring pơlê pơla cheăm bêng, gâk kring Kơpong peăng tơdế ƀă peăng kong ngo pá kơnhŏng troh hơnăm 2030, troăng ngăn troh hơnăm 2024, kố cho tơdroăng pơkâ ki tâi tâng”.

Ƀă ivá nếo, khŏm mơ-eăm nếo, túa pêi nếo, kăn xiâm hnê ngăn Kuô̆k hô̆i loi tơngah “Têt pêt loăng plâ rơxông pâ Pôa Hồ” rơnó Hơngui Quý Mão hơnăm 2023 dêi kong pơlê Tuyên Quang mơni kô châ tơƀrê hên mâu tơdroăng ki tơniăn lĕm tâ, veăng kum mơjiâng tơnêi têa Việt Nam rơ-eăng ngiât, mơnhông krá tơniăn, môi tiah tơdroăng ki rơhêng vâ dêi Pôa Hồ Chí Minh: “Rơnó Hơngui cho Têt pêt loăng/ Pro ăm tơnêi têa rế hía rế rơ-eăng lĕm”.