VOV4.Xơ Đăng - Mâu khế hơnăm hdrối mê hía nah, a lâp kong pơlê Tây Ninh ai hên mơngế cho kuăn pơlê Việt Nam, xúa ing Facebook, Zalo hiăng tro mâu ngế ki ‘mêi pơloăng djâ kơtâu hdâ troh a kong têa Kul vâ pêi cheăng. Ki păng ‘nâng, ki hên mâu ngế ki châ pơlông djâ kố drêng troh a kong têa Kul pơrá tro pơkâm hjip, ‘nêk mơ’nêa, pơklât thế pêi cheăng hngăm châ 11 chôu rêm hâi, thăm nếo ối tro pâm xiăn, Kăn pơkuâ Kŏng ti ôí djâ mâu ngế ki mê lăm tê ăm a Kŏng ti ki ê ƀă hên mâu tơdroăng ki ê, drêng hiăng châ ‘nâi, bu tơkôm to rơpŏng hngêi pơtroh liăn ngân vâ mơdrếo ngế ki mê prếo vêh a tơnêi têa Việt Nam. Tơdroăng kố xuân hiăng hlo ai hên a mâu kong pơlê kơpong Tây Nguyên, vâi krâ-nhŏng o kal athế hbrâ kơchăng.

Ƀơrô Kăn sat Kŏng an kong pơlê Tây Ninh ăm ‘nâi, sap ing apoăng hơnăm troh nôkố hiăng tơdah xo 21 to hlá đơn pơkâ thế tŏng kum dêi mâu rơpŏng cho kuăn pơlê a kong pơlê ai nhŏng o tro vâi heâk djâ ngi kong têa Kul pêi cheăng, tro vâi pơklât thế pêi cheăng drêng tá hâi tro hơnăm, ‘nêk mơ’nêa. Mâu ngế pêi cheăng kố tâng vâ vêh ngi dêi tơnêi têa Việt Nam mê athế ăm liăn ăm mâu ngế ki mê.

Tiô mâu rơpŏng, kuăn ‘nĕng dêi vâi hiăng hmuâ rơpŏng, chêh inâi pro holá mơ-éa lăm ngi Kul pêi cheăng ăm Kŏng ti Thiên Đường Trò chơi. Rơpŏng bu châ tơpui ing phôn ƀă ‘nâi tíu kuăn tơná pêi cheăng ai tíu ối, mê tơdroăng rêh ối, cheăng kâ tiah lâi mê ôh tá ‘nâi nhên. Tô tuăn, ôh tá tơniăn tung hiâm mơno cho tơdroăng tơdjuôm dêi mâu nôu, pâ drêng tơdah tơmâng mâu phôn krếo thế tŏng xo dêi mâu vâi kuăn sap ing ‘na tá tíu tơkăng kong.

Nâ Hồng, ối a tơring Dương Minh Châu, kong pơlê Tây Ninh ăm ‘nâi, hlo nôu tơbrêi tơbrêh, kuăn kơdrâi ki hiăng kân dêi nâ hơnăm kố bu nếo châ 17 hơnăm, tong pro mơ-éa lăm ngi kong têa Kul pêi cheăng ƀă rơhêng vâ tăng liăn kum dêi nôu. Laga, liăn khế kuăn ôh tá hlo, bu hlo ngế nôu athế kơtâu tăng hbrâ rơnáu liăn vâ ăm vâi vâ xo dêi kuăn vêh:

“Nếo achê kố hlo pú gá tro vâi pâk a châ on thrik tê ngi tíu kố, tíu ê mê ga xâu, khĕn phôn thế tŏng xo vâ rĕng châ vêh ngi Việt Nam. Á bu to môi ngế, pâ gá hiăng hlâ, á ôh tá kâi rak ƀă xuân tơvâ ƀă tơdroăng cheăng”.

Kong an Tây Ninh pêi cheăng ƀă rơpŏng hngêi ki mâu ngế ki tro pơlông djâ ngi kong têa ê ôh tá tro luât

Châ ‘nâi, tung pơla achê kố tơdroăng ki kuăn pơlê lăm ngi kong têa Kul ôh tá tro luât, hlo ôh tơniăn xua tơdroăng ki rơhêng tăng ngế pêi cheăng ăm mâu casino a Kul tâk hên. Ing măng pơlê pơla Zalo, Facebook, Wechat, Istagram ƀă hên ki ê mâu ngế ‘mêi a kong têa Kul hiăng mơ’no chêh mâu tơdroăng ki tăng xo mâu ngế pêi cheăng ƀă kơlo liăn khế kâ hên ƀă mâu kơxô̆ liăn prôk lăm châ ngế ki a kong têa Kul ‘no ăm hdrối.

Tung pơla mê, nôkố kơxô̆ mơngế ki lăm ngi kong têa ê hên cho mâu phô̆m vâ xông kân Việt Nam dế tăng cheăng pêi, mê drêng hlo mâu rơkong krếo thế mê hiăng tơ’lêi tiâ vâ. Drêng ngế ki tăng cheăng pêi tiâ vâ mê mâu ngế ki ‘mâi mê tơpui tơdjêp ƀă mâu ngế ‘mêi ki ê a Việt Nam vâ tơkŭm pro chiâng tíu ki hnê mơhno djâ pêi cheăng tơkâ luâ kong têa ê ing troăng ki ôh tá tro luât ngi kong têa Kul.

Ngoh Tùng ối a tơring Gò Dầu, ai kuăn dế pêi cheăng a kong têa Kul tô tuăn:

“Liăn khế ki pêi lo mê vâi tối hiăng nâp a mâu liăn kâ, liăn ối tâi, khế apoăng môi chât to lâi rơtuh ‘lo mê vâi râng lôi ôh tá ăm xo. Kuăn á gá tối pêi cheăng ‘na game cheăng klâi mê thế pêi sap ing 10 chôu kơxo má troh 10 chôu kong măng, hên rôh ki ‘nâ têa ôu ôh ti ai”.

Nâ Sen xuân ối a tơring Gò Dầu ƀă kuăn nâ xuân dế pêi cheăng a Kul tối:

“Gá krếo phôn xuân pâ vêh, gá thế dêi nôu hbrâ liăn lăm ăm vâi xo kuăn vêh, xua ai ngế pú dêi gá nếo lăm ngi mê gá tê tơdrêng hlối, 31 lơ 34 rơtuh tung pơla 2,3 hâi mê châ vêh hlối. Gá thế hbrâ 30 troh 40 rơtuh liăn tiah mê, la ôh tá ‘nâi nhên gá to lâi”.

Kŏng an Tây Ninh hnê pơchân kuăn pơlê pôi tá hmâng rơkong pơlông djâ dêi mâu ngế ki ‘mêi

Ing tơdroăng ki tăng ‘nâi, drêng mâu ngế ki tro hêak djâ ngi kong têa Kul, tâng ngế ki pơkuâ kŏng ti hlo ngế pêi cheăng ôh tá tro tơdroăng pơkâ thế dêi vâi mê vâi kô tê ngế ki mê ăm mâu ngế pơkuâ kŏng ti ki ê ƀă yă kơnâ yă roê hdrối mê. Tâng ngế ki vâi tê mê rơhêng vâ vêh ngi Việt Nam mê tơpui ƀă rơpŏng thế pơtroh liăn xo vêh. Mâu ngế ki ‘mêi mê tơbleăng kơxô̆ liăn 1.800 dollars (tơ’mô 40 rơtuh liăn) vâ ăm vâi xo ngế vêh Việt Nam, tâng ôh kô pơtối tê ăm mâu kŏng ti ki ê, drêng mê ah liăn ăm vâi kô rế hên tâ.

Nôkố, Ƀơrô Kăn sat Kŏng an kong pơlê Tây Ninh hiăng ai hên tơdroăng hnê tối troh kuăn pơlê hbrâ kơchăng tơdroăng tơbleăng ing măng pơlê pơla dêi mâu ngế ki ‘mêi krếo thế tiô hên tơdroăng ki tơmâng tro ‘na tơdroăng cheăng hiâ, liăn kâ hên pêi cheăng a Kul, ƀă kơxô̆ liăn kâ tơniăn, lối 20 rơtuh liăn tung môi khế; ôh tá nâp mâu liăn ki kố, ki tá, ôh tá kal ai tơdroăng rơkê, bu kal ‘nâi tiê kơmăi ƀă hên ki ê.

Kố cho tơdroăng ki tơbleăng pro hên ngế dế tăng cheăng pêi rơhêng vâ ‘hơ’lêh tơdroăng rêh ối” mê ah tăng tro mâu tơdroăng ki vâi hêak, pơloi ki vâi hiăng tơbleăng hlâu. Ƀă tiô ƀơrô Gak kring tơpui kâ Kŏng an Tây Ninh, sap ing khế 9/2021 troh nôkố, khu ki ai tơdjâk dêi Kul tơbleăng hiăng ai 9 ngế hdrok ing hngêi tal, hdrê dêi rơnŏng, ai ngế ki ‘nâ hía ôh tá ‘nâi, ôh tá hlo xiâm kối.

Tơdjâk troh ngế ki pro xôi lăm ngi kong têa ê ôh tá tro luât, sap ing hâi lơ 1/1 troh hâi lơ 1/4/2022, Kŏng an kong pơlê Tây Ninh pơkâ tơleăng 17 ngế pro xôi ƀă 38 ngế ki tro tơdjâk (ai mâu ngế ki ‘nâ sap ing hơnăm 2021 hơ’lêh troh nôkố) tăng rup 9 ngế, 16 ngế pro xôi; dế séa ngăn 7 ngế, 22 ngế tro tơpôu xôi. Sap ing apoăng hơnăm troh nôkố, ai 59 ngế kuăn pơlê Việt Nam châ Kăn teăng mâ Việt Nam a Kul mơdrếo vêh ƀă la ngiâ ah kô ai tơ’nôm 14 ngế nếo.

Kŏng an kong pơlê Tây Ninh hnê pơchân, kuăn pơlê pôi tá hmâng rơkong pơlông djâ lăm ngi kong têa Kul ôh tá tro luât. Drêng châ ‘nâi mâu ngế ki ‘mêi hlo ai tơdroăng ki djâ mâu ngế ki lăm ngi kong têa ôh tá tro luât, mê athế tơbleăng ăm kơ koan kŏng an ki achê má môi.

Thươ̆ng tă Trần Minh Kiệt, kăn phŏ Ƀơrô cheăng gak kring tơpui kâ Kŏng an Tây Ninh ăm ‘nâi:

“Kŏng an Tây Ninh hnê pơchân kuăn pơlê pôi tá hmâng mâu rơkong pơlông djâ pêi tơdroăng cheăng hiâ la liăn kâ hên a kong têa ê. Rơhêng vâ tiah kố, vâi krâ nhŏng o tăng troh mâu tíu ki châ kơ koan ki ai tơdjâk tơnêi têa hbru ăm há mơ-éa phêp tăng cheăng pêi ƀă châ tŏng kum, rak vế hnoăng kuăn pơlê”.

Hiăng nhên, tơdroăng ki rơhêng vâ tăng cheăng pêi cho tơdroăng ki kal. Laga, kuăn pơlê xuân athế kal hlê plĕng vâ pôi tá tro hlôp tung mâu tơdroăng ki hêak, chiâng ngế ki tro vâi tê mơdró. Tơdroăng kố xuân veăng kum rak tơniăn ăm pơlê pơla a kong pơlê.

Katarina Nga tơplôu ƀă tơbleăng