Tối ‘na tơdroăng mơnhông mơdêk cheăng kâ – rêh ối pơlê pơla dêi thôn 8, cheăm tơkăng kong Ea Bung, tơring Ea Súp, pôa Bùi Công Oánh, Kăn pơkuâ hnê ngăn chi ƀô̆ tối ăm ‘nâi, ki phiu ro má môi cho tơdroăng thôn hiăng mơjiâng troăng pêi pêt mơjiâng tơmeăm tung klâng kân rơdâ, xúa mâu hdrê ki dâi lĕm môi tiah ST25, Đài THơm, ƀă pêi pro mâu troăng păn ro  lai hên ai kroăng lế lĕm.

Mâu troăng pêi kố pơrá ăm châ tơƀrê cheăng kâ hlâu tâ hdrối. Pôa Bùi Công Oánh mơnhên, mâu tơdroăng pơ’lêh ‘na troăng tơmiât pêt mơjiâng tơmeăm ƀă păn mơnăn dêi kuăn pơlê ai veăng dêi kăn ƀô̆, đảng viên Đông mô đô̆i gâk tơkăng kong Đắk  Ruê:

‘’Sap ing hâi ai kăn ƀô̆ mô đô̆i gâk tơkăng kong troh rêh pêi cheăng ƀă chi bô̆, ‘na mơnhông mơdêk cheăng kâ dêi kuăn pơlê cho rơdêi. Thế tối troh tơdroăng hnê mơhno tơtro dêi Đảng ủy xuân môi tiah mâu khu pú tơkăng kong hiăng tơbleăng ăm chi ƀô̆ hên tơdroăng xiâm troh ‘na mơnhông cheăng kâ. Tâi tâng hơnăm kố kuăn pơlê pêt hdrê ki pêi lo châ hên ƀă ST25 tung pêt mơjiâng ƀă troăng pêi kố ngin dế po rơdâ’’.

Cho ngế apoăng pêi pro troăng pêi păn ro lai hên ai kơdroăng păn lĕm a cheăm Ea Bung, pôa Đỗ Xuân Trường, Kăn pơkuâ hnê ngăn chi ƀô̆ thôn 5, tối ăm ‘nâi, hdrối nah, vâi krâ kuăn pơlê ki hên păn hdrê ro tung pơlê, kơ’nêi hmâng vâ, châ tơƀrê iâ. Kơnôm kăn ƀô̆, mô đô̆i gâk tơkăng kong kơhnâ hnê mơhno ƀă tŏng kum hên troăng, pôa hiăng pơ’lêh châ tơƀrê păn ro lai hên ai kroăng păn lĕm sap ing mơ’nui hơnăm 2020.

Hơnăm nah, pôa Lợi châ liăn rơkâ vâ chê 100 rơtuh liăn ƀă hơnăm kố tiô tối hdrối kô châ va chê péa xôh kơxô̆ kố. Hên rơpŏng tung thôn, tung cheăm xuân dế pêi tiô ƀă apoăng ăm hlo châ tơƀrê kơnôm mơnhông mâu tơdroăng ki hiăng ai hlâu:

‘’Kăn ƀô̆ mô đô̆i gâk tơkăng kong râng kŏng hnê pêi cheăng, thăm nếo veăng tơlo liăn vâ tŏng kum vâi krâ kuăn pơlê păn mơnăn mơnôa, pro tơ’lêi hlâu mơnhông mơdêk cheăng kâ rơpŏng, xăm kơklêa kơdroh kơtiê. Vâi krâ kuăn pơlê păn mơnăn mơnôa hiăng pơxiâm châ tơƀrê.

Ki tơ’lêi hlâu má môi a kố cho tơmeăm kâ a kố rơlối, á ối a kố pêt mơjiâng hên báu, ai hrái hên mê á kú vâ ăm ro rê plâ hơnăm. Tơdrêng amê, ƀăng tơnêi kân rơdâ mê á pêt nhâ, pêt alâi, tơ- uâ vâ păn ro’’.

Châ pơtroh pêi cheăng a cheăm Ea Bung to pro Kăn phŏ pơkuâ hnê ngăn cheăng Đảng cheăm, Trung tă Nguyễn Văn Thanh, Kăn ƀô̆ Đông mô đô̆i gâk tơkăng kong tíu tê mơdró Đăk Ruê, tối ăm ‘nâi, tơdroăng apoăng cho thế ‘nâi pơlê, hlê plĕng nhên tơdroăng pêt mơjiâng tơmeăm dêi vâi krâ kuăn pơlê. Rơtế a mê, mâu ngoh thế đi đo hriâm tâp, ti tăng plĕng túa pêi ki rơkê a hên tíu, ing mê nếo kô chiâng hnê mơhno, tŏng kum vâi krâ kuăn pơlê tơkŭm po pêt mơjiâng tơmeăm châ tơƀrê.

‘’Klêi kơ’nâi veăng tơdrêng ƀă vâi krâ kuăn pơlê tung rêh ối pêi cheăng xuân môi tiah pêi kâ, pêt mơjiâng tơmeăm mê tơdroăng a cheăm Ea Bung ai hên ki tơ’lêi hlâu, laga ki hlo cho tơdroăng mơnhông păn mơnăn ƀă pêt báu ai hên tơ’lêi tá hâi pêi pro tâi tâng, ối mơ’nhê tê kơtê. Xua mê, á hiăng khên tơnôu tơbleăng ƀă Đảng ủy thăm pơkuâ hnê mơhno tung hnoăng cheăng mơnhông mơdêk cheăng kâ, rêh ối pơlê pơla. Ki rơhêng vâ tối akố cho tơkŭm ăm 2 khu ki xiâm cho pêt báu ƀă má péa cho păn ro’’.

Thươ̆ng tă Phạm Đức Khá, cheăng kal kí Đông mô đô̆i gâk tơkăng kong tíu tê mơdró ngi kong têa ê Đắk Ruê, tối ăm ‘nâi, a kơpong hơngế hơngo tơnêi khăng khoăng Ea Bung, pá puât má môi cho pro ti lâi vâ mơdêk tơdroăng rêh ối dêi vâi krâ kuăn pơlê. Tơdroăng rêh ối kuăn pơlê ai tơniăn, mơnhông mơdêk mê tíu tơkăng kong kô krá tơniăn, hnoăng pơkuâ châ tơniăn.

Xua mê, drêng pơtroh kăn ƀô̆ mô đô̆i gâk tơkăng kong veăng tơdroăng pêi cheăng a cheăm ƀă Đảng viên veăng tung pêi cheăng a mâu chi ƀô̆, tíu cheăng rah xo nhên khât mâu kăn ƀô̆, đảng viên ai ivá, tuăn rơkê, hlê plĕng tung pơlê. Mâu kăn ƀô̆, đảng viên hiăng mơnhông mơdêk lĕm tro hnoăng cheăng, kum mơjiâng cheăm Ea Bung rế hía rế mơnhông mơdêk, rak krá tơniăn pơlê pơla kơpong tơkăng kong:

‘’Tung pêi pro hnoăng cheăng kal kí dêi đông tung pơla kố nah mê hnoăng cheăng dêi kăn ƀô̆ thăm troh pêi cheăng a cheăm, xuân môi tiah đảng viên veăng pêi cheăng a mâu chi ƀô̆ thôn pơlê cheăm tơkăng kong hiăng mơnhông mơdêk châ tơƀrê.

Hiăng kum ăm khu râ kăn pơkuâ hnê ngăn cheăng Đảng, chi ƀô̆ mâu thôn thăm pêi kơtăng krá tơniăn, mơdêk ivá, tơdroăng ivá pêi cheăng dêi mâu khu râ kăn pơkuâ hnê ngăn cheăng Đảng, chi ƀô̆, rơtế ƀă khu râ kăn pơkuâ pơlê mơjiâng mâu chi ƀô̆ krúa lĕm, ó rơdêi. Hiăng mơnhông mơdêk hnoăng cho kông tơdjêp pơla Đảng ủy Đông mô đô̆i gâk tơkăng kong ƀă Đảng ủy cheăm’’.

Hơnăm 2021, cheăm Ea Bung hiăng châ mơnhên châ plah thôn pơlê nếo ƀă kố cho cheăm apoăng a tíu tơkăng kong dêi Dak Lak hiăng pêi kêi đeăng pơkâ má mơ’nui ‘na tơdroăng pêi kố. Mơjiâng thôn pơlê nếo dế rŭm krá tơniăn ƀă mơjiâng tâi tâng kuăn pơlê krá tơniăn a tơkăng kong Ea Bung.