Mâu hâi achê Têt, cheăm Trường Sơn, tơring Quảng Ninh, kong pơlê Quảng Bình chiâng phiu ro, hên tơdroăng ki tâ phiu ro tung châ. Mô đô̆i gâk tơkăng kong Làng Mô a tơring Quảng Ninh hiăng tơkŭm kơxuô kơƀăn tơxông diâp vâi krâ kuăn pơlê tung pơlê Ploang, cheăm Trường Sơn, tơring Quảng Ninh. Vâi krâ kuăn pơlê rơtế ƀă mâu mô đô̆i gâk tơkăng kong trâm mâ mơhno khôi túa lĕm hơdruê xuâng, xah hêi tơdroăng xah hêi vâi krâ nah ăm phiu ro a hâi Têt troh rơnó Hơngui troh thăm hơtôu, phiu ro.

Roh kố, Mô đô̆i gâk tơkăng kong Làng Mô rơtế mâu tíu cheăng diâp kơxuô tơmeăm Têt vâi krâ kuăn pơlê pơlê Ploang ƀă pơlê Rìn Rìn, diâp mâu vâi o hok tro ếo hơtôu, diâp 5 ‘’Tơmeăm hngêi mơdrah tơdjuôm pơlê pơla’’, pôa xâk tê kơtê ƀă tơkŭm po khăm pơlât, xing xoăng pơkeăng tê kơtê, xing xoăng kơmung ăm vâi krâ kuăn pơlê a tíu tơkăng kong.

Pôa Hồ Văn Thông, ối a pơlê Ploang, cheăm Trường Sơn, tơring Quảng Ninh phiu ro:

“Rơnó Hơngui tơkăng kong – hơtô hiâm mơno kuăn pơlê’’ cho lĕm tro, phiu ro ‘nâng, kuăn pơlê hâk phiu. Tung tơdroăng rêh ối dêi á, hơnăm kố châ veăng tơdroăng phiu ro môi tiah kố pơla mô đô̆i ƀă kuăn pơlê. Mâu tơdroăng pêi ing hơdruê xuâng, vâi krâ kuăn pơlê châ kơxoâng, châ hơdruê, châ tơpui tơno ƀă tơdah kơxuô tơmeăm phiu ro, kơbố xuân ai kơxuô tơmeăm tâi tâng’’.

Môi rơnó Hơngui nếo pơtối troh a kơpong kong ngo tơkăng kong Dân Hóa, tơring Minh Hóa, kong pơlê Quảng Bình. Kăn ƀô̆, mô đô̆i Đông gâk tơkăng kong Tíu tê mơdró ngi kong têa ê Cha Lo rơtế mâu đông lêng pro đông tung tơring hiăng pêi pro tơdroăng ‘’Rơnó Hơngui tơkăng kong – Hơtôu hiâm mơno kuăn pơlê”, teăm tơdrêng rak ngăn, kum tơmeăm Têt ăm vâi krâ kuăn pơlê kơtiê rêh ối a kơpong Giăng Màn.

Tơdroăng kố ai hên tơdroăng ki kơnía môi tiah chôu nhâng tơbâ mâu ngoh mô đô̆i khên tơnôu hlâ tung tơplâ xâ nah, trâm mâ mơđah hơdruê xuăng, tơ’noăng kơxuô kơƀăn tơxông, diâp kơxuô tơmeăm ăm mâu rơpŏng hngêi. Jâ Đinh Thị Mùi, ối a pơlê Bãi Dinh, cheăm Dân Hóa, tơring Minh Hóa phiu ro tối:

“Tơdroăng ‘’Rơnó Hơngui tơkăng kong – Hơtôu hiâm mơno kuăn pơlê’’, kuăn pơlê hâk phiu, phiu ro ‘nâng. Xua, ngin cho mâu rơpŏng kơtiê dêi cheăm a tíu tơkăng kong, kơpong hơngế hơngo nôkố châ tŏng kum. Laga, ngin kô mơ-eăm pêt mơjiâng tơmeăm vâ cheăng kâ rơpŏng châ tơtêk, vâ ôh tá kơnôm to a tơnêi têa, a mâu khu kơvâ cheăng’’.

Tơdroăng ‘’Rơnó Hơngui tơkăng kong – Hơtôu hiâm mơno kuăn pơlê’’ châ tơkŭm po tiah hmâ rêm hơnăm hdrối Têt Lo hơnăm nếo ƀă rơtế tung mâu cheăm tơkăng kong, mơjiâng môi tơdroăng tơdah rơnó Hơngui troh lâp lu mâu pơlê. Ing tơdroăng ki kố, vâi krâ kuăn pơlê, kăn ƀô̆ mâu mô đô̆i a troăng tơkăng kong rơtế mơhno tơdroăng tơrŭm môi tuăn, tơdroăng mơ-eăm tơkâ hluâ pá puât ƀă pói tơngah châ tơƀrê hên tung hơnăm nếo Quý Mão 2023.

Đăi tă Trịnh Thanh Bình, Kăn pơkuâ Mô đô̆i gak tơkăng kong Quảng Bình tối ăm ‘nâi, hdối Têt Lo hơnăm nếo, Mô đô̆i gâk tơkăng kong pơkuâ ƀă krếo thế mâu khu pú hên, mâu ngế krê rơtế tŏng kum vâ ai rơpâu kơxuô tơmeăm, môi iâ kum vâi krâ kuăn pơlê a tíu tơkăng kong dêi kong pơlê Quảng Bình tơdah môi rơnó Hơngui phiu ro, hơ-tô.

“Ai hên tơdroăng pêi tơtro, pơxúa ƀă diâp hên kơxuô tơmeăm dêi mâu khu mơngế tŏng kum mơngế pá puât vâ vâi krâ kuăn pơlê ai tơdroăng rêh ối phâi hơtô, tơniăn Têt hơtôu tâ. Mơjiâng hiâm mơno ăm vâi krâ kuăn pơlê, khu lêng kuăn pơlê a kơpong tơkăng kong châ tơdah Têt hơtô, rơtế phiu ro, pro mơjiâng tơdroăng mơnhông rơdêi, xiâm kối vâ mơnhông cheăng kâ – rêh ối pơlê pơla ƀă gak kring hnoăng pơkuâ tíu tơkăng kong dêi tơnêi têa’’.

Hdrối mê, a cheăm Hồng Vân, tơring A Lưới, kong pơlê Thừa Thiên Huế, Khu xiâm pơkuâ Mô đô̆i gâk tơkăng kong, Khu xiâm pơkuâ vâi kơdrâi Việt Nam tơrŭm ƀă Khu pơkuâ hnê ngăn Đảng, Vi ƀan kong pơlê Thừa Thiên Huế tơkŭm po tơdroăng ‘’Rơnó Hơngui tơkăng kong hơtôu hiâm mơno kuăn pơlê’’ koh tơdah Têt lo hơnăm nếo Quý Mão 2023.

A kố hiăng tơkŭm po mâu tơdroăng môi tiah: Phiu ro hiăng mơjiâng pro kêi đeăng, pơcháu hngêi ‘’Hơtôu ăm mơngế kơtiê tơkăng kong’’; lăm pôu, diâp kơxuô tơmeăm ăm mơngế kơtiê, rơpŏng mơngế hiăng krâ nah pêi cheăng kăch măng; lăm pôu, rơkâu Têt khu râ kăn pơkuâ, kuăn pơlê, hok tro, khu pơkuâ, gâk kring tơkăng kong; trâm mâ ngê̆ thuât; diâp kơxuô tơmeăm ăm hok tro ƀă rơpŏng pá puât a tơring A Lưới; khăm pơlât, xing xoăng pơkeăng tê kơtê ăm kuăn pơlê; mâu tơdroăng mơhno khôi túa lĕm tro, tơ’noăng ivá, xah hêi tiô khôi vâi krâ nah. Tơdroăng mê xuân diâp ăm 10 toăng hngêi ‘’Hơtôu ăm mơngế kơtiê tơkăng kong’’; 15 to hdrê ro, 500 kơxuô tơmeăm Têt.