Pôa Nguyễn Đình Trường, Kăn pơkuâ Kŏng ti pơchoh chêp hmân ếo Việt Tiến, Kăn phŏ hnê ngăn Khu tê mơdró mô đô̆i hneăng hdrối nah Việt Nam tối, hneăng hiăng hluâ, Khu pơkuâ Mô đô̆i hneăng hdrối nah Việt Nam hiăng pêi kêi đeăng hnoăng cheăng ƀă đi đo mơdêk hiâm mơno khôi túa hnê hriâm rơxông ối nếo, hnê tơ’nôm tuăn mơ-eăm xêh rơdêi, hiâm mơno tơplâ ki mâu rơxông pâ pôa hiăng mơjiâng, hnê ăm rơxông ối nếo, pơtối tơdroăng gâk kring tơnêi têa.

Xua mê, hneăng la ngiâ ƀă 1/3 tơdroăng ki nếo châ rah xo tung Khu pơkuâ, ƀă ing pơkuâ hnê mơhno dêi Khu pơkuâ nếo, pôa Nguyễn Đình Trường loi tơngah, mâu pơkâ xiâm, pơkâ pêi dêi hneăng 7 kô châ pêi pro châ tơƀrê:

‘’Pêi pro hnê mơhno dêi pôa Nguyễn Phú Trọng, Kăn xiâm pơkuâ hnê ngăn Đảng, Khu pơkuâ mô đô̆i hneăng hdrối nah Việt Nam ai 5 hnoăng cheăng. Tung 5 hnoăng cheăng mê mê ai 2 tơdroăng ki châ tơƀrê. Tơdroăng ki châ tơƀrê má môi, thế mơjiâng khu cheăng kal kí thế krá rơdêi, krúa lĕm, vâ pro xiâm kối, gâk kring khu râ kăn pơkuâ ing kơ koan râ kŭn tơngi klêng.

Tơdroăng má péa cho thăm veăng cheăng kâ vâ xăm kơklêa kơdroh kơtiê ƀă veăng hên tung tơdroăng xua Đảng ƀă Tơnêi têa mơhnhôk pêi pro. Kố cho 2 tơdroăng ki châ tơƀrê pơkâ vâ mơjiâng Khu rế hía rế mơnhông mơdêk’’.

Môi tung mâu hnoăng cheăng châ mâu khu râ Khu pơkuâ mô đô̆i hneăng hdrối nah tung lâp tơnêi têa khŏm mơ-eăm pêi pro châ tơƀrê cho kum mâu ngế mô đô̆i hneăng hdrối nah pro kro mơdrŏng, mơdêk cheăng kâ.

Pôa Trần Bá Đông, Kăn hnê ngăn Khu pơkuâ mô đô̆i hneăng hdrối nah bêng Đông Tảo, pơlê kong kơdrâm Hưng Yên, kong pơlê Hưng Yên tối ăm ‘nâi, ƀă 3 khu tê mơdró xua Mô đô̆i hneăng hdrối nah pơkuâ, troăng pêi kum mâu ngế tơrŭm cheăng khu mô đô̆i hneăng hdrối nah pro kro mơdrŏng châ mơnhông châ tơƀrê tung hên hơnăm hiăng hluâ. Nôkố 100% mô đô̆i hneăng hdrối nah ôh tá ai rơpŏng kơtiê, 85% cho rơpŏng ki hôm ƀă kro mơdrŏng ƀă 15% kơxô̆ rơpŏng ai kơlo rêh ối tơdâng.

Pôa Trần Bá Đông pói vâ:

‘’Kơxô̆ liăn mê ngin a pơlê tiô pơkâ dêi Tơnêi têa, hngêi arak liăn kum rêh ối pơlê pơla kô tŏng kum tiô pơkâ. Nôkố ngin pói vâ a râ kơpêng tŏng kum pro ti lâi ai troăng hơlâ tro, mâu tơdroăng xiâm, tơdroăng tŏng kum ăm ngin hluăn ing kơtiê. Ngin pói tơngah khât, loi tơngah păng ‘nâng ƀă tơdroăng pơkuâ hnê mơhno dêi mâu kăn ối tung Khu pơkuâ hnê mơhno hneăng 7 kố ƀă á pói vâ mâu kăn ƀă hnoăng cheăng, ƀă tơdroăng pêi tá hiâm mơno dêi mơngế lêng Pôa Hồ mê mâu kăn kố mơnhông mơdêk châ tơƀrê, pơkuâ tơdroăng pêi cheăng Khu ăm tơdâng tơ’mô, mơnhông mơdêk’’.

Ƀă pôa Dương Xuân Hảo, Kăn pơkuâ Ƀơrô Khu pơkuâ mô đô̆i hneăng hdrối nah kong pơlê Ninh Bình tối tơdroăng khŏm mơ-eăm, tung hneăng nếo kố kô pơtối mơnhông mâu troăng pêi rơtế kum dêi pó pro kro mơdrŏng dêi mâu ngế tung khu mô đô̆i hneăng hdrối nah:

“Khu pơkuâ mô đô̆i hneăng hdrối nah kong pơlê tung hneăng la ngiâ kô mơ-eăm pro tơ’lêi hlâu má môi, pro tơ’lêi hlâu ‘na kơxô̆ liăn mung vâ ăm ngế tơrŭm cheăng ai ivá vâ mơnhông mơdêk cheăng kâ tung tơdroăng pro tơ’lêi hlâu má môi ‘na kơxô̆ liăn mung a mâu hngêi arak liăn kum rêh ối pơlê pơla ƀă hngêi arak liăn ki ê.

Pro tơ’lêi hlâu ‘na mâu troăng hơlâ mơhnhôk dêi pó, kum dêi pó cho khu tơrŭm cheăng ki lâi ai ivá tâ mê kum ‘na kih thuât, kum ‘na túa ki rơkê pêi kâ, kum mơngế tơrŭm tơná mơnhông mơdêk xông tơtêk’’.

Mâu hlá mơ-éa ki kal dêi Hneăng hôp cho mơnhên troăng prôk la ngiâ ki kal ăm tơdroăng pêi cheăng ƀă tơdroăng mơnhông mơdêk dêi khu tung 5 hơnăm la ngiâ. Klêi kơ’nâi Hneăng hôp, mâu khu râ kăn pơkuâ tơkŭm po lĕm tơdroăng pơkuâ hlê plĕng tŭm pơkâ, mâu mơ-éa ki kal Hneăng hôp, pơtâng tối trâu hơhngế troh kăn ƀô̆, ngế pêi cheăng ‘na tơdroăng châ tơƀrê Hneăng hôp; thâ mơjiâng, pêi pro tơdroăng, pơkâ pêi, djâ pơkâ tung pêi pro dêi khu; thăm pêi pro rơdêi tơdroăng tơ’noăng, hriâm tâp ƀă pêi tiô troăng tơdjâ, hiâm mơno, túa cheăng dêi Hồ Chí Minh, pêi pro ƀlêi trâng mâu hnoăng cheăng; kum mơjiâng ƀă gâk kring krá tơniăn Tơnêi têa, tơxâng ƀă tơdroăng loi tơngah dêi Đảng, Tơnêi têa ƀă kuăn pơlê.

Xông tơpui mơgêi Hneăng hôp, Thươ̆ng tươ̆ng Bế Xuân Trường, Kăn hnê ngăn Khu mô đô̆i hneăng hdrối nah Việt Nam hneăng má VII, hneăng hơnăm 2022 – 2027 tối nhên:

“Ngin tơkêa a ngiâ tâi tâng Khu pơkuâ Mô đô̆i hneăng hdrối nah tung lâp tơnêi têa đi đo tơrŭm môi tuăn, tơrŭm krá tơniăn ƀă dêi pó, mơjiâng Khu pú hên Khu ai hiâm mơno kal kí krá tơniăn, tá hiâm mơno loi tơngah tung tơdroăng pơkuâ hnê mơhno dêi Đảng, Tơnêi têa, môi hiâm mơno ƀă Đảng, ƀă Tơnêi têa, ƀă kuăn pơlê ƀă rơxông xah hô̆i chuh ngiah, đi đo mơdêk hiâm mơno pôu râng hnoăng cheăng.

Pơ’lêh nếo tơdroăng xiâm, troăng pêi, tơdroăng pêi cheăng, thăm pêi pro tro, hbrâ, tơmiât pêi rơkê tung pơkuâ, hnê mơhno pêi pro hnoăng cheăng, mơjiâng Khu krúa lĕm, ó rơdêi tŭm túa, pêi kêi đeăng hnoăng cheăng tung rêm tơdroăng cheăng, hnoăng cheăng’’.