Rơtế ƀă mâu kăn ƀô̆ Khu hnê mơhno mô đô̆i pơlê kong kơdrâm Sơn La troh lăm pôu rơpŏng o Chiêu Thanh Trúc, hdroâng kuăn ngo Thái, hok tro lâm 5 a pơlê Nà Ngùa, ối tung tôh 2, bêng Chiềng An, pơlê kong kơdrâm Sơn La, kong pơlê Sơn La. Rơpŏng Trúc cho rơpŏng kơtiê, nôu pâ ôh tá ai cheăng pêi tơniăn. Thăm nếo, pâ Trúc ối tro tâ pơreăng ki ôh tá ai pơkeăng pơlât prêi, thế đi đo pơlât, xua mê rơpŏng thăm pá puât tâ.

‘Nâi tơdroăng rêh ối dêi Trúc, Khu pơkuâ hnê ngăn Đảng, Khu pơkuâ mô đô̆i pơlê kong kơdrâm Sơn La hiăng troh trâm mâ nôu pâ o; tơdrêng amê trâm Khu pơkuâ Hngêi trung râ má môi Lò Văn Giá – tíu Trúc dế hriâm tâp tơdah râng ko, tŏng kum o ai liăn ngân vâ lăm hriâm tâp. Ôh tá ăm nôu pâ, thái cô ƀă khu pú hên kăn ƀô̆, mô đô̆i Khu pơkuâ mô đô̆i pơlê kong kơdrâm khéa, hơnăm hiăng hluâ, Trúc đi đo châ inâi hok tro rơkê ƀă “Muăn nguăn Pôa Hồ”.

O Chiêu Thanh Trúc tối:

‘’Châ tơdroăng tŏng kum dêi mâu tăm mô đô̆i, á kuăn hlo phiu ro ƀă mơ-eăm hên ăm nôu pâ, á kuăn kô mơ-eăm hriâm tâp lĕm, châ tơƀrê hên vâ ôh tá ăm mâu tăm mô đô̆i ƀă mâu thái cô tung hngêi trung khéa’’.

Pêi pro tơdroăng ‘’Kum o troh hngêi trung’’, troh nôkố, Khu pơkuâ mô đô̆i pơlê kong kơdrâm Sơn La hiăng tơdah râng ko 5 ngế o hok tro ai tơdroăng rêh ối pá puât dêi hngêi trung râ má môi Lò Văn Giá, pơlê kong kơdrâm Sơn La ƀă kơlo tŏng kum 250 rơpâu liăn/khế/môi ngế o tung 5 hơnăm pơtối. Pakĭng mê, ối tŏng kum tơmeăm hriâm tâp ăm mâu vâi o rêm roh mot hơnăm  hriâm nếo.

Trung tă Khuất Minh Tuấn, Cheăng kal kí kăn phŏ, Khu pơkuâ mô đô̆i pơlê kong kơdrâm Sơn La tối ăm ‘nâi: Kơxô̆ liăn tŏng kum kân, laga kố cho kơxuô tơmeăm dêi khu pú hên kăn ƀô̆, mô đô̆i tung đông lêng pói vâ châ veăng kum ivá kum mâu vâi o ối kŭn ôh tá mơhúa tung tơdroăng hriâm tâp, chiâng kuăn pơlê ki pơxúa ăm pơlê xiâm, tơnêi têa:

‘’Tung la ngiâ, Đảng ŭy, Khu pơkuâ mô đô̆i pơlê kong kơdrâm ngin mơnhên pơtối hlê plĕng tŭm po rơdâ pêi pro châ tơƀrê mâu troăng pơkâ pêi, troăng hơlâ dêi Đảng ƀă Tơnêi têa, ki nhên ƀă Pơkâ khu râ kăn pơkuâ dêi đông lêng; thăm pơtâng tối mơdêk hlê plĕng ăm kăn ƀô̆, mô đô̆i tung đông ‘na pơkâ pêi, ki kơnâ rơkê lĕm dêi tơdroăng kố; tơdrêng amê tơrŭm krá tơniăn ƀă khu râ kăn pơkuâ hnê ngăn cheăng Đảng, khu râ kăn pơkuâ pơlê kong kơdrâm séa ngăn rêm ngế, mơnhên rêm ngế ki nhên, ing mê ai mâu troăng mơhnhôk, tŏng kum teăm tơdrêng ƀă mâu vâi o ai tơdroăng rêh ối pá puât’’.

Ing tơdroăng tơdah râng ko mâu hok tro ai tơdroăng rêh ối pá puât dêi Khu pơkuâ mô đô̆i pơlê kong kơdrâm, hên đông lêng, khu pú hên, ngế krê tung pơlê kong kơdrâm Sơn La xuân tơdah râng ko, tŏng kum ‘’mâu kơtâ hlá tá hâi prêi lĕm’’. Troh nôkố, tâi tâng hiăng ai lối 110 ngế hok tro ai tơdroăng rêh ối pá puât tung pơlê kong kơdrâm tơdah râng ko tung hriâm tâp.

Pôa Hà Trung Chiến, Kăn pơkuâ hnê ngăn cheăng Đảng Sơn La tối ăm ‘nâi: Ƀă tơdroăng djâ troăng ahdrối tung hên kơvâ dêi tơdroăng rêh ối, ki má lối cho tơdroăng tŏng kum rêh ối pơlê pơla, rêm kăn ƀô̆, mô đô̆i Khu pơkuâ mô đô̆i pơlê kong kơdrâm Sơn La hiăng ƀă dế mơnhông hnoăng, pôu râng  hnoăng cheăng ƀă tơdroăng rêh ối pơlê pơla, tơxâng ƀă tơdroăng loi tơngah dêi kuăn pơlê mâu hdroâng kuăn ngo Sơn La:

‘’Khu hnê mơhno cheăng Đảng pơlê kong kơdrâm kheăn kơdeăn tơdroăng tơmiât rah xo troăng pêi dêi Khu pơkuâ mô đô̆i pơlê kong kơdrâm, troăng pêi rơkê ôh tá xê kum ăm to mâu rơpŏng, mâu muăn hok tro ai tơdroăng rêh ối pá puât ai liăn ngân vâ kum tung tơdroăng rêh ối lĕm tâ, ai liăn ngân vâ châ troh hngêi trung, mê ối djâ tơdroăng ki lĕm trâu hơngế, troh lâp lu tung tơdroăng cheăng kal kí vâ ăm mâu kơ koan, tíu cheăng ki ê rơtế prôk vâ pêi pro tơtro troăng hơlâ kum rêh ối pơlê pơla tung pơlê’’.

‘’Rơtế pêi pro tơdroăng tŏng kum rêh ối pơlê pơla ƀă rơtế kum vâi o troh hngêi trung’’ ôh tá xê to tơdroăng pêi rơkê, mê hiăng chiâng tơdroăng pêi ki nhên, ki pơxúa a Khu pơkuâ mô đô̆i pơlê kong kơdrâm Sơn La, pro tơ’nôm um méa lĕm ‘na ngoh mô đô̆i Pôa Hồ.

Kố xuân cho tơdroăng apoăng vâ krá tơniăn vâ Khu pơkuâ mô đô̆i pơlê kong kơdrâm mơ-eăm mơjiâng ‘’Đông lêng mơhnhôk kuăn pơlê lĕm’’, pơtối thăm rak tơniăn hiâm mơno kuăn pơlê, mơnhông mơdêk tâ mê nếo ivá tơkŭm tâi tâng dêi kuăn pơlê tung pêi pro mâu hnoăng cheăng kal kí ƀă mơdêk ki dâi lĕm tung tơdroăng gâk kring, cheăng lêng pơlê kong kơdrâm; kum mơjiâng pơlê kong kơdrâm Sơn La mơnhông mơdêk krúa lĕm, rĕng, krá tơniăn, tiô rơxông nếo, rơkê.