Rêm hơnăm tung pơla 12 hơnăm hlối, Hngêi trung hnê kuăn ngo ai tíu kâ koi ối pơtê kong pơlê Gia Lai ai tâi tâng kơxô̆ hok tro plah tơ’noăng mơgêi hriâm râ má pái, pôa Võ Thành Nguyên, Ngế pơkuâ hngêi trung  ăm ‘nâi, rêm hơnăm sap apoăng hơnăm, hngêi trung hiăng hbrâ rơnáu  tŭm tơdroăng pơkâ rơbot ƀai tơ’noăng ăm tơtro.

A hngêi trung râ má pái Đinh Tiên Hoàng, kơpong hơngế hơngo tơring Krông Pa, tíu ki ai 99% hok tro to kuăn ngo. Mâu vâi o xuân  klâ dêi rơpo hriâm tiô khu tơtro ƀă ivá hriâm chiâng lơ ôh tá vâ rơbot ƀai ton vâ pâ hên tung tuăn mâu bai ki tơ’noăng mơgêi hriâm râ má pái. Hneăng  tơ’noăng râ má pái phôh thông Tơnêi têa hơnăm kố a kong pơlê Gia Lai ai 41 tíu tơ’noăng ƀă lối 15 rơpâu 300 ngế chêh inâi tơ’noăng, tung mê ai vâ chê 4 rơpâu 100 ngế cho kuăn ngo.

Tơdroăng hbrâ pêi pro dêi hngêi trung, mâu tơdroăng kơhnâ tơmâng hnê ngăn khât dêi thái cô kô veăng kum ăm hok tro khên tơnôu,  tơmiât nhên, ôh tá xâu drêng mot tung veăng tơ’noăng  vâ bro ƀai châ điêm hên.