Vâ mơdêk hlê plĕng luât ăm đoân viên, droh rơtăm, ki má lối cho tung kơpong hdroâng kuăn ngo, kơpong hơngế hơngo tung hơnăm 2022, Khu pơkuâ ngăn Đoân Droh rơtăm Dak Lak hiăng pêi pro hên tơdroăng pơtâng tối ƀă hên troăng, tơtro ƀă rêm pơlê. Tiô nâ Phan Thị Trinh, Kăn phŏ pơkuâ hnê ngăn cheăng Đoân Dak Lak, ki má môi tung tơdroăng pơtâng tối dêi droh rơtăm hơnăm kố nah cho 2 hneăng tơ’noăng pơtâng tối luât a cheăm Krông Nô, tơring Lăk ƀă cheăm Čư Pui, tơring Krông Bông.

Khu pơkuâ ngăn Đoân Droh rơtăm Dak Lak tơrŭm ƀă Tíu chôu ‘măn kơxop hlá mơ-éa kong pơlê tơkŭm po tơ’noăng mơ’no tơdrêng tung um tiô troăng hyôh măng ti tăng plĕng luât tung đoân viên, droh rơtăm. Ing mê, mơhnhôk vâ chê 37 rơpâu roh ngế veăng tơ’noăng. Tâi tâng mâu tơring, pơlê kong krâm, pơlê kong kơdrâm ƀă Đoân Droh rơtăm pơrá pêi pro mâu tơdroăng pơtâng tối, hnê hriâm luât ƀă mâu tơdroăng mơhnhôk ‘’Hâi luât tơnêi têa Kŏng hoa xah hô̆i chuh ngiah Việt Nam lơ 9/11’’.

Nâ Phan Thị Trinh tối ăm ‘nâi, khu Đoân Droh rơtăm hiăng ƀeăn ƀĕng pêi pro pơtâng tối troh đoân viên droh rơtăm ƀă hên troăng môi tiah ing măng pơlê pơla, xúa kŏng ngê̆ thông tin lơ mâu ƀâng rơ’jíu, hneăng tơ’noăng tíu tơkŭm po tơ’noăng, roh tơleăng ki xah bro, mâu tơdroăng tơpui tơno, hnê trâu hơngế ăm rêm ngế nhên.