Hiăng môi tiah hmâ, troh apoăng chôu kơxo ƀă mơ’nui chôu kong xêi,  “Tâng idrâp loa dêi mố đô̆i gak tơkăng kong, dêi Đông Mố đô̆i tơkăng kong Huổi Luông, ối tung Khu xiâm pơkuâ dêi Khu xiâm mố đô̆i gak tơkăng kong dêi kong pơlê Lai Châu idrâp chuât lâp lu môi kơpong  tíu tơkăng kong. Túa pêi pro  mê hmâ pơtối rak vế tơƀrê drêng dế ai pơreăng COVID-19 tâ tú rơ-iô ƀă châ pơtối rak ta troh nôkố.

Bú mơ’no a môi to loa lăm tơbleăng, môi to USB hiăng thâu hrik hdrối tơdroăng hnê tối ƀă rơxế hon đa cho ngế kăn ƀô̆ mố đô̆i gak tơkăng kong kô châ lăm troh a tâi tâng mâu tíu ki ai kuăn pơlê dế rêh ối ƀă pêi cheăng vâ hnê tối.

Đăi ŭy Phan Thành Nam, Chính trị viên phŏ, Đông Mố đô̆i tơkăng kong Huổi Luông ăm ‘nâi: Tung  kơpong kố ki hên to hdroâng kuăn ngo Dao, Mông, Hà Nhì rêh ối. Mâu tơdroăng hnê tối hiăng châ kăn bô̆ mố đô̆i gak tơkăng kong chêh hdrối ƀă nâl Xuăn tơkŭm tơbleăng ƀă nâl kuăn ngo, ăm tơtro tiô tơdroăng ki rơkê plĕng dêi kuăn pơlê.

Xua mê, ngế ki lâi xuân hlê ƀă ‘nâi mâu tơdroăng kal; ƀă hâk tơngăm ‘nâng rêm hdrôh ‘’ Tâng idrâp mơ’no tung loa dêi mố đô̆i gak tơkăng kong ‘’ chuât xtó:

“Ƀă tơdroăng pơchuât, troăng rơhlâ pơchuât hnê tối ‘na luât dêi Mố đô̆i gak tơkăng kong Việt Nam a tung pơlê cheăm, ngin hiăng chêh hdrối tơdroăng vâ hnê, tơkŭm péa măng tĭng hnê môi hdrôh tơbleăng a pơlê  tung kơpong. Túa hnê ki tiah kố cho tơbrê, xua hiăng hnê mâu tơdroăng kal, tơdroăng ki xiâm troh kuăn pơlê. Tung la ngiâ, ngin kô pơtối tơrŭm ƀă mâu kăn pơlê, cheăm, tơring pêi hên tơdroăng tâ, tơbleăng hên túa”.

Xua tơdroăng cheăng kâ  rêh ối  hên xơpá, mê  ôh tá xê rơpŏng ki lâi a tíu tơkăng kong xuân châ rôe tơvi, lơ kơmăi tính vâ tơdjêp ƀă internet vâ po ngăn mâu tơdroăng nếo ai. Thăm nếo, loa ki mơ’no mê kô chiâng lăm nô̆ng tơbleăng troh lâp lu hơlâ troăng, thôn pơlê vâ kuăn pơlê ki ối a ‘nâi a ‘ngêi, lơ dế pêi cheăng a chiâk deăng xuân châ tâng. Tơbleăng puk pâk, vâ ‘nâi mâu tơdroăng nếo ai tơbleăng ing loa, vâ tối hiăng chiâng tơdroăng ki hmâ ôh tá la lâi lôi ƀă kuăn pơlê ki ối a tíu tơkăng kong.

Ngoh Trần Chỉnh Hoàng, pơlê A Sa Phìn, cheăm Huổi Luông, tơring Phong Thổ ăm ‘nâi: Hmếo rêm hâi tiah mê a hâi tơdrốu ƀă hâi tĭng rêm măng tĭng, loa mơ’no tơbleăng a pơlê ối tơbleăng mâu tơdroăng 'na troăng rơhlâ dêi Đảng, luât Tơnêi têa. Tơ bleăng tung 2 măng tĭng môi hdrôh cho tơdroăng hnê tối tơdjâk troh Luât Tơkăng kong Việt Nam; mâu luât pơkâ tŏng kum ki tơdjâk troh tíu tơkăng kong, kring vế tíu tơkăng kong tâp tơneăn hdró... Tơdroăng hnê tối ‘nâng ‘nâi, tơ’lêi hlê ngế ki lâi tâng xuân rĕng chôu pâ  mâu tơdroăng:

“Kuăn pơlê ki ối tung pơlê ngin hiăng hlê ‘na ki pơxúa dêi tơdroăng kring vế troăng tơkăng kong ƀă ai pơxúa dêi troăng tơkăng kong tơnêi têa. Kuăn pơlê tung pơlê prôk tơkâ luâ tơneăn tâp hdró, troăng tơkăng kong thế tối tơbleăng ăm Mố đô̆i gak tơkăng kong, vâ mâu mố đô̆i séa ngăn ƀă ing mê kuăn pơlê xuân hlê nhên tâ nếo ‘na troăng tơkăng kong tơneăn ki tâp hdró trô tíu tơkăng kong”.

Tơdrêng ƀă mâu rôh lăm hnê tối ukố umê, hnê tối tơbleăng tung loa dêi cheăm, Đông Mố đô̆i gak tơkăng kong Huổi Luông xuân rah thế mâu kăn ƀô̆, mâu mố đô̆i tung đông troh pôu tơrêm rơpŏng hngêi vâ hnê tơdrêng ăm kuăn pơlê. Ing mê, kum kuăn pơlê mơdêk hlê plĕng, ‘nâi hbrâ rơnáu ƀă mâu tơdroăng khu ‘mêi hriăn pro, tơdroăng ki khu kơneăm vâ pro ƀă mâu khu ai xôi.

Nâ Lò Thị Trưởng, kuăn pơlê ối a pơlê Hồ Thầu, cheăm Huổi Luông, tơring Phong Thổ hơ’muăn:

“Tung pơla hdrối kố nah á xuân hiăng châ mố đô̆i gak tơkăng kong tơbleăng hnê ‘na troăng tơkăng kong, tơneăm ki tâp hdró tíu tơkăng kong. A hiăng hlê tiah kố, tíu tơkăng kong cho tíu ki tĭng ôh tá chiâng ‘lut. Cho môi ngế kuăn pơlê a kơpong tíu tơkăng kong, a đi đo hlê tiah kố thế rơtế ƀă kăn bô̆, mố đô̆i gak tơkăng kong kring gak tơniăn hnoăng pơkuâ , kring tơniăn Tơnêi têa”.

Tiô Đăi tă Lê Công Thành, Kăn phŏ hnê ngăn Đảng, Ngế xiâm pơkuâ Mố đô̆i gak tơkăng kong dêi kong pơlê Lai Châu, tơdroăng hnê tối, hnê ‘na luât, tung mê ai Luât gak tơkăng kong Việt Nam pakĭng tối tơbleăng ƀă tơdroăng hnê hyôh hyôh internet ƀă 115 tíu mơ’no tơbleăng tung kong pơlê, hiăng ai vâ chê 2.500 ngế kăn ƀô̆ cho mâu ngế cheăng tóoi tơbleăng, hnê tối ‘na luât ing râ kong pơlê troh râ cheăm veăng hnê tối tơdrêng.

Tơdroăng hnê tối châ tơkŭm đi đo ƀă Hô̆i đong hnê tối ‘na luât dêi mâu tơring a 22 to cheăm tíu tơkăng kong:

“Ing mâu tơdroăng cheăng tơkŭm hnê tối, hnê trâu tâ ‘na Luât gak tơkăng kong Việt Nam, ki hlê dêi kuăn pơlê a kơpong tíu tơkăng kong xuân hiăng châ mơdêk nhên. Ƀă tơdroăng mâu tơdroăng pêi ai pơxúa khât, tơƀrê ƀă hên túa hnê tối mê ngin hiăng hnê trâu rơdâ troh kuăn pơlê. Ƀă vâ tối mâu ngế a kơpong tơkăng kong xuân hiăng hlê tŭm ‘na Luât gak tơkăng kong Việt Nam. Ing mê, ăm hlo tơdroăng Kuô̆k hô̆i pơkâ Luât gak tơkăng kong Việt Nam ai pơxúa ƀă kal khât tung tơdroăng cheăng rak ngăn, kring vế hnoăng pơkuâ tơnêi têa, kring gak tơniăn tíu tơkăng kong nôkố”.

Ƀă tơdroăng hnê, túa hnê tối hriăn plĕng ki nếo, tơƀrê, kuăn pơlê mâu hdroâng kuăn ngo tung cheăm, tơring hiăng hlê nhên ki pơxúa, ki kal dêi tơdroăng rak vế, kring gak troăng tơkăng kong, tơneăm tâp hdró tíu tơkăng kong tơnêi têa. Kuăn pơlê a tíu tơkăng kong Lai Châu hmiân tuăn pêi cheăng  kâ, pêi chiâk deăng; rêm hơnăm kơdroh kơxô̆ rơpŏng kơtiê kơpêng 5%, kơdroh tơdroăng tong tơmeăm pâk chik kơpêng 1%.

Ing mê, rêm ngế hiăng, dế mơ-eăm rơtế ƀă râ ủy, mâu kăn pơlê cheăm tơring pêi pro tro hnoăng cheăng mơjiâng, mơdêk kơpong tíu tơkăng kong, kring vế tơniăn pơlê pơla, cheăm bêng lâp kơpong tíu tơkăng kong .