Tung hngêi ối ki tiah hmâ hlo, a ƀuôn Ea Rông, cheăm Krông Na, tơring Ƀuôn Đôn, kong pơlê Dak Lak, o H’Hải Niê Kdăm, hok tro lâm 7A, Hngêi trung râ má 2 Võ Thị Sáu kơhnâ khât dế hriâm dêi ƀai, ƀă hiâm mơno pói rơhêng vâ la ngiâ ah chiâng mơngế cô hnê chư. O kuăn tê, ôh tá ai pâ drêng 2 hơnăm nah, rơpŏng ối  tung hngêi ki kơtiê xahpá, nôu đi đo hmâ châi tamo. Hlo tơdroăng ki xahpá dêi o, hơnăm 2019, Đông Gak tơkăng kong Srê-pok hiăng xo păn roăng o H’Hải ing tơdroăng “Mơdêk hvêa chêng o troh hngêi trung”. Rơtế ƀă tơdroăng tŏng kum rêm khế ai 500 rơpâu liăn, kăn ƀô̆, lêng Đông Srêpok xuân đi đo hmâ lăm pôu, mơhnhôk ƀă hnê mơhno tối ăm o kơdo mơ-eăm hriâm tâp. ‘Nâi klê nhên tơdroăng ki pá puât dêi rơpŏng hngêi ƀă hlo nhên tơdroăng ki mơjo pâ dêi mâu tăm mô đô̆i gak tơkăng kong, H’Hải xuân hiăng kơdo mơ-eăm ƀă pêi pro châ hên tơdroăng ki lĕm tro tung hriâm tâp.

“Mâu vâi tăm hiăng kum á muăn hên, á mơnê kơ mâu vâi tăm xua khu vâi tăm hiăng kơhnâ khât tung tơdroăng mơdêk hvêa chêng á muăn troh a hngêi trung. Á muăn xuân hiăng kơdo mơ-eăm hriâm tâp, mâu vâi tăm hiăng mơhnhôk á kơdo mơ-eăm hriâm tâp, thăm nếo, mâu vâi tăm xuân hiăng kum á muăn hriâm rơkê mâu môn”.

Xuân xúa kuăn tê dêi pâ ƀă rơpŏng trâm hên xahpá, o Hà Duy Khánh ối a thôn Đừng Nhạp, cheăm tơkăng kong Ia Lôp, tơring Ea Sup hiăng châ Đông tơkăng kong Ea Hleo mơdêk hvêa chêng troh a hngêi trung. Nâ Lò Thị Loan, nôu Khánh tối ăm ‘nâi, kơnôm ai tơdroăng tŏng kum dêi mô đô̆i gak tơkăng kong hiăng kum pơtroh ăm á hên tơdroăng ki hơniâp ro, mơhnhôk hên tơdroăng, kum hên tơdroăng ăm rơpŏng hngêi:

“Mô đô̆i gak tíu tơkăng kong veăng kum á muăn ai 500 rơpâu liăn 1 khế, ai tơ’nôm mâu tơmeăm, hlá mơ-eá, mâu kế kâ, klêi mê xuân ối lăm pôu mơhnhôk rơpŏng hngêi, tŏng kum ngăn khât, hnê mơhno ‘na tơdroăng ki á muăn hriâm. Tung pơla hdrối mê hía nah, á muăn hiăng ai tơdroăng ki chía rơkê tung hriâm tâp”.

Trung ŭi Hà Văn Tân, kăn ƀô̆ mơhnhôk kuăn pơlê Đông gak tơkăng kong Ea Hleo cho môi tung mâu ngế kăn ƀô̆ ki hnê mơhno tơdroăng cheăng: “Mơdêk hvêa chêng o troh hngêi trung” ƀă “Kuăn roăng Đông tơkăng kong”. Ngoh tối ăm ‘nâi, mâu vâi muăn ki châ tŏng kum ki hên to cho mâu vâi muăn kuăn tê, xahpá ‘na tơdroăng rêh kâ ối, ôh tá ai tŭm nôu lơ pâ, xua cho kuăn tê, ôh tá ai tơdroăng mơhnhôk. Xua ti mê, mâu vâi ngoh đi đo mơnhên tối, ti xê to tŏng kum ‘na kế tơmeăm mê ối pro ti lâi athế mơhno, tơdjâ tơdroăng bâ eăng troh tơdroăng hơ-ui kum, mơjo pâ, tŏng veăng mâu vâi muăn ai ivá kơdo mơ-eăm mơdêk hên:

“Mâu vâi ngoh kăn ƀô̆, mâu lêng dêi đông hmâ đi đo lăm pôu êng, hnê mơhno mâu vâi muăn mơhriâm. Klêi kơ’nâi pêi pro hnoăng cheăng mê mâu vâi muăn pơrá hiăng rơkê khât, mâu vâi muăn ai hên tơdroăng ki kơdo mơ-eăm tung hriâm tâp, rế hiá rế hloh hlê rơkê plĕng”.

Pơkâ pêi pro hnoăng cheăng “mơdêk hvêa chêng o troh hngêi trung” ƀă “Kuăn roăng dêi Đông tơkăng kong”, ing hơnăm 2014 troh nôkố, Mô đô̆i gak tơkăng kong dêi kong pơlê Dak Lak hiăng râng ko ăm vâ chê 250 ngế muăn. Tơdrêng ƀă tơdroăng păn roăng mê xuân ai tá tơdroăng kum 500 rơpâu liăn, mâu đông gak tơkăng kong ối ai hên tơdroăng ki kum liăn hriâm, tơmeăm ki kơnâ kum mâu vâi muăn hmiân tuăn hriâm. Thiê̆u tă Vũ Văn Dương, Kăn phŏ cheăng kal kí Đông gak tơkăng kong Ea Hleo tối ăm ‘nâi, tối ‘na tơdroăng pơkâ pêi pro hnoăng cheăng mê:

“Pêi pro tiô tơdroăng hnê tối dêi Đảng ủy, Khu xiâm ngăn Đông gak tơkăng kong, tíu kố hiăng tơrŭm ƀă khu râ ngăn Đảng, khu pơkuâ ƀă mâu hngêi trung xuân môi tiah mâu rơpŏng dêi mâu vâi muăn a cheăm Ia Lốp vâ tí tăng lăm ngăn, vêh mơnhên, rah xo mâu vâi muăn hok tro ki ai tơdroăng rêh ối xahpá vâ tŏng kum. Troh nôkố, khu kố hiăng mơdêk hvêa chêng ăm 50 ngế muăn. ‘Na mâu pơlê cheăm mê á xuân vâ môi tuăn hên ‘nâng, mâu hngêi trung ƀă rơpŏng hngêi mâu vâi muăn xuân hơniâp ro, sôk phiu há”.

Ƀă tơdroăng rơkê pêi pro dêi mâu mô đô̆i, đông gak tơkăng kong, hên mâu vâi hdrêng ki rêh ối a kơpong tíu tơkăng kong dêi kong pơlê Dak Lak hiăng ƀă dế pêi pro lĕm tơniăn hnoăng cheăng mơdêk hvêa chêng o troh hngêi trung, tơkâ luâ mâu tơdroăng ki xahpá vâ la ngiâ ah chiâng mơngế ki ai pơxúa ăm pơlê pơla, tơnêi têa.