Hơnăm 2023 ƀă hiâm mơno pôu râng dêi hnoăng cheăng, khŏm mơ-eăm khât, Kuô̆k hô̆i hiăng pê klêi hên tơdroăng cheăng, kố cho rôh apoăng sap nah tá hâi chói ai tung 78 hơnăm pêi cheăng dêi Kuô̆k hô̆i Việt Nam hiăng tơkŭm po hên hneăng hôp má môi tung môi hơnăm ƀă 5 rôh po hneăng hôp. Tơdroăng cheăng séa ngăn châ thăm mơdêk ƀă hơ’lêh nếo, rế hía rế rơkê, ƀĕng ƀeăn tro ƀă tơdroăng ki ai khât. Kuô̆k hô̆i hiăng teăm pơkâ hên troăng hơlâ pêi pro ki kal dêi tơnêi têa. A rôh hôp, teăng mâu khu kăn Kuô̆k hô̆i mơnhên tối tơdroăng Kuô̆k hô̆i rôh apoăng tơkŭm po rôh hôp mơgêi klêi kơ’nâi 1 hơnăm pêi cheăng. Jâ Lý Thị Lan, kăn phŏ pơkuâ khu kăn Kuô̆k hô̆i kong pơlê Hà Giang tối tiah kố:

"Rơtế ƀă tơdroăng hơ’lêh nếo mơdêk ki rơkê plĕng tung tơdroăng cheăng dêi kơ koan kuăn pơlê pôk, Khu kăn Kuô̆k hô̆i a mâu kong pơlê phiu ro xua kố cho rôh apoăng tung hneăng cheăng Kuô̆k hô̆i hneăng 15, tơkŭm po rôh hôp mơgêi mơnhên tối tơdroăng cheăng tung hơnăm dêi Khu kăn Kuô̆k hô̆i. Á xuân tối tiah kố, mê cho rôh tơ’lêi ƀă pơtối cho ivá nếo mơhno tơdroăng ki tơmâng ngăn dêi Kuô̆k hô̆i, Vi ƀan pơkuâ Kuô̆k hô̆i ƀă tơdroăng cheăng dêi Khu kăn Kuô̆k hô̆i vâ ai rôh châ veăng kum, pêi pro klêi tâ ‘na pơkâ thế, hnoăng cheăng mơdêk ki rơkê plĕng tung tơdroăng cheăng dêi Khu kăn Kuô̆k hô̆i, kăn Kuô̆k hô̆i a mâu kong pơlê.’’

Ăm rơkong tơpui tung túa tơmiât vâ tơbleăng hnoăng cheăng hơnăm 2024, pôa Bùi Văn Cường, Ngế xiâm chêh tôm xo rơkong, Kăn pơkuâ Ƀơrô cheăng Kuô̆k hô̆i pơkâ thế Khu kăn Kuô̆k hô̆i mâu kong pơlê, pơlê kong kân:

"Pơtối tơrŭm tơniăn vâ tí tăng ‘nâi plĕng kum Vi ƀan pơkuâ Kuô̆k hô̆i hnê mơhno, xing xoăng tơdroăng cheăng dêi Hô̆i đong hdroâng kuăn ngo, mâu Vi ƀan dêi Kuô̆k hô̆i tung tơdroăng séa ngăn, rak vế tơniăn ví bô bối mâu Khu kăn séa ngăn a mâu kơ koan, tíu pêi cheăng. Ƀă kong pơlê ai kơxô̆ kăn pê dêi hnoăng cheăng luâ pơkâ, pơkâ thế Khu kăn Kuô̆k hô̆i tơbleăng troh Ngế xiâm chêh tôm xo rơkong Kuô̆k hô̆i ‘na kơxô̆ ngế kăn pêi dêi hnoăng cheăng, tơdroăng ki pêi cheăng, mâu ngế, hâi khế pêi cheăng a kong pơlê vâ tối ăm Vi ƀan pơkuâ Kuô̆k hô̆i teăm rơnêu ăm tơtro".

Tơpui mơgêi a rôh hôp, pôa Vương Đình Huệ, kăn xiâm hnê ngăn Kuô̆k hô̆i mơnhên tối hơnăm 2023 cho hơnăm ki ai hên tơdroăng cheăng má môi dêi Kuô̆k hô̆i. Mâu kăn cheăng tung khu kăn Kuô̆k hô̆i ƀă mâu kăn Kuô̆k hô̆i xuân hiăng mơdêk hiâm mơno mơjiâng luât hbrâ rơnáu, séa ngăn tơƀrê ƀă troăng hơlâ tŏng kum teăm tơdrêng, mơdêk khât tơdroăng pêi, hiâm mơno pôu râng hnoăng cheăng, tung tơdroăng mơjiâng luât, pơkâ mâu tơdroăng ki kal dêi tơnêi têa ƀă séa ngăn, trâm kuăn pơlê, tơdroăng ki tơdah kuăn pơlê, séa ngăn, pơkâ tơleăng đơn pơsăm tối, pơsăm tơkêng dêi kuăn pơlê.

La ngiâ ah, pôa Vương Đình Huệ, Kăn xiâm hnê ngăn Kuô̆k hô̆i pơkâ thế, mâu khu kăn cheăng tung Kuô̆k hô̆i, mâu kăn Kuô̆k hô̆i mơdêk mâu tơdroăng ki hiăng pêi klêi, pơtối po rơdâ, tâk tơ’nôm tơdroăng cheăng, mơdêk tâ nếo ki rơkê tơdroăng cheăng dêi khu kăn cheăng tung Kuô̆k hô̆i. Malối, pơtối pơkâ pêi kơtăng tíu cheăng, hnoăng cheăng dêi Khu kăn Kuô̆k hô̆ii tung tơkŭm po ƀă pêi cheăng dêi Kuô̆k hô̆i Việt Nam tối tơdjuôm. Tung ê, hnoăng cheăng dêi mâu khu kăn Kuô̆k hô̆i cho tơkŭm po vâ kăn Kuô̆k hô̆i tơdah kuăn pơlê:

"Hnoăng pơkuâ, hnoăng cheăng cho tơkŭm po tơdah kuăn pơlê, tơrŭm, rak vế tơdroăng vâ mâu kăn Kuô̆k hô̆i trâm kuăn pơlê. Kố cho hnoăng cheăng ki apoăng ƀă kal má môi, mê tung pơla ‘mâi rơnêu châ Pơkâ ‘na trâm kuăn pơlê mê tung rôh trâm môi tiah pơkâ nôkố, pơkâ thế mâu vâi pú pơtối tơrŭm krá ƀă Măt trâ̆n Tơnêi têa, xúa tơdroăng hnê mơhno dêi râ Đảng vâ pơtối hơ’lêh nếo kơtăng hnoăng cheăng tơdah kuăn pơlê, trâm mâ kuăn pơlê. Tung luât nôkố nếo pơkâ Khu kăn Kuô̆k hô̆i trâm mâ kuăn pơlê tiô tơdroăng tơkŭm po dêi Khu kăn Kuô̆k hô̆i ôh ti xê ai pơkâ cho Khu kăn Kuô̆k hô̆ii trâm mâ kuăn pơlê tơniăn krê, tiô hnoăng cheăng dêi Khu kăn Kuô̆k hô̆i mê tá hâi ai pơkâ hnê mơhno nhên tơdroăng kố. La ngiâ ah hriăn ngăn tâi pơkâ ‘na trâm kuăn pơlê athế châ tơbêng tung tơdroăng.’’

Pôa Vương Đình Huệ, Kăn xiâm hnê ngăn Kuô̆k hô̆i pơchân, khu kăn Kuô̆k hô̆i veăng tơrŭm ƀă Hô̆i đong Hdroâng kuăn ngo ƀă mâu Vi ƀan dêi Kuô̆k hô̆i séa ngăn a kong pơlê; pơkâ kơtăng tơdroăng ki pơsăm tối, pơsăm tơkêng, tơdroăng pâ thế dêi kuăn pơlê, pơkâ thế mâu kơ koan ki ai tơdjâk tối tơbleăng ‘na kơvâ cheăng kố; tơdrêng amê hlối kal tơbleăng tơdroăng cheăng dêi Khu kăn cheăng tung Kuô̆k hô̆i.