VOV4.Xơ Đăng - Măng tĭng hdrối, a Hngêi Kuô̆k hô̆i, pôa Vương Đình Huệ, kăn xiâm hnê ngăn Kuô̆k hô̆i trâm mâ mâu ngế cheăng tung Kâu lak ƀô̆ Cheăng kâ, Mơhno túa lĕm tro ƀă Ôm hyô; teăng mâ kăn pơkuâ mâu kong pơlê tung kơpong tơplâ Việt Bắc. Tơpui a rôh trâm mâ, kăn xiâm hnê ngăn Kuô̆k hô̆i tối nhên, ki kơnía ‘na mơhno túa lĕm tro kăch măng dêi Việt Nam cho kế tơmeăm ki ôm hyô gá hên hĭn ƀă kơnía git. Xua mê, tung tơdroăng ki vêh pơkâ kơvâ ôm hyô kal athế tơtro ƀă tơdroăng ki rak vế, mơdêk ki kơnía ‘na mơhno túa lĕm tro, ôm hyô kăch măng.

Pôa Vương Đình Huệ, Kăn xiâm hnê ngăn Kuô̆k hô̆i tối nhên, pơreăng kân COVID -19  pro lŭp hên, la xuân cho rôh ki kân vâ Viêt Nam pơtối ‘mâi mơnhông tâi tâng kơvâ cheăng ôm hyô Việt Nam tiô pơkâ kơxô̆ 08 dêi khu xiâm kal kí ‘na mơnhông mơdêk ôm hyô chiâng kơvâ cheăng ki xiâm ƀă tiô Luât ôm hyô hiăng châ Kuô̆k hô̆i tơbleăng; mơdêk ‘mâi mơnhông tơmeăm khoăng, tê mơdró ƀă mâu tơmeăm ôm; pơ’lêh tuăn tơmiât vâ pro tơdroăng ôm hyô chiâng tơdroăng cheăng kâ ki xiâm dêi kơvâ cheăng kâ tơkŭm, tơrŭm pơla mâu kơvâ cheăng ƀă tung kơpong.

Pơtih mâu tơdroăng hơ’muăn ‘na mơnhông cheăng kâ ôm hyô dêi mâu kong têa mơnhông tơtêk lâp plâi tơnêi ‘na ki tơ’mot tơmối troh ôm hyô tơdroăng mơngế vâ rôe tơmeăm dêi tơrêm kơpong, rêm tơnêi têa, Kăn xiâm hnê ngăn Kuô̆k hô̆i tối nhên, mơnhông mơdêk kơvâ ôm hyô ki kal cho tuăn ‘nâi tơchĕng tơmiât, mâ ngăn hơngế ƀă pro khôi túa vêa vong krê. Xua mê, mâu ngế tung Kâu lăk ƀô̆ Cheăng kâ, mơhno Túa lĕm tro ƀă Ôm hyô kal veăng hnoăng tơpui rơtế veăng tơchoâm ivá dêi Tíu xiâm, kong pơlê, tơring, cheăm ƀă mâu khu rak ngăn mơdêk tâ nếo kơvâ ôm hyô tung la ngiâ.

Kăn xiâm hnê ngăn Kuô̆k hô̆i khĕn kơdeăn, Hô̆i đong ngăn Kuăn ngo dêi Kuô̆k hô̆i, Tíu xiâm ngăn Cheăng kâ Túa lĕm tro dêi Khu tơrŭm cheăng mâu Khu cheăng Khoa hok Kih thuât Việt Nam hiăng tơkŭm tơrŭm po hôp ƀă rah xo tơdroăng pơkâ ki xiâm: ‘’Tơrŭm cheăng mơnhông ôm hyô rơtế ƀă pơtối rak vế, ƀă pơtối mâu tơdroăng ki pơxúa ‘na túa lĕm tro dêi Kăch măng Tíu tơplâ Việt Bắc’’ ƀă 6 to kong pơlê mê cho ‘’Cao Bằng, Bắc Kạn, Lạng Sơn, Thái Nguyên, Hà Giang, Tuyên Quang:

‘’A xuân môi tuăn ƀă tơdroăng hâi kố dêi hneăng hôp tơpui tơno. Ôm hyô ƀă malối cho mơnhông ôm hyô rơtế ƀă pơtối rak vế, pơtối rak ki kơnía git mơhno túa lĕm tro ton nah ƀă kăch măng. Ki pơxúa ‘na mơhno túa lĕm tro ton nah kăch măng dêi Việt Nam cho môi túa tơmeăm khoăng ôm hyô ki ai hên tíu lĕm, mơnâ mâ ƀă vâ tối iâ hlo a Việt Nam ƀă tung lâp plâi tơnêi.

Xua mê, tung ‘mâi mơnhông kơvâ ôm hyô thế rơtế ƀă tơdroăng pơtối rak vế ki kơnía mơhno túa lĕm tro, tơdroăng ki ton nah dêi kăch măng. Mê cho xiâm tơmeăm khoăng mơhno ki lĕm tro pa kâi tối dêi pin.

Kăn xiâm hnê ngăn Kuô̆k hô̆i tối, klêi Hneăng hôp mơhno Túa lĕm tro tung lâp tơnêi têa, ing tơdroăng tối mơgêi dêi pôa Nguyễn Phú Trọng, Kăn xiâm pơkuâ hnê ngăn đảng, Đảng  ƀă tơnêi têa hiăng pơcháu ai Khu xiâm ngăn Túa lĕm tro, Tơ’noăng ivá ƀă Ôm hyô mơjiâng tơdroăng pơkâ mơnhông mơdêk Túa lĕm tro, tung mê ai tơdroăng pơtối rak vế ki kơnía mâu tíu tơbâ roh ton nah.

Kăn xiâm hnê ngăn Kuô̆k hô̆i pôa Vương Đình Huệ pơkâ thế, tơdroăng mơnhông ôm hyô dêi 6 to kong pơlê xuân kal tơrŭm krá khât ƀă pêi 3 tơdroăng pơkâ tơnêi têa ‘na mơjiâng thôn pơlê nếo; mơnhông cheăng kâ rêh ối kơpong hdroâng kuăn ngo ƀă kong ngo; kơdroh kơklêa xăm kơtiê krá tơniăn.

Tung la ngiâ, kơvâ ôm hyô kal veăng ‘no hnoăng mơnhông mơdêk rĕng tơbleăng ‘mâi mơnhông ƀă mơdêk cheăng kâ - rêh ối, pêi pro mâu pơkâ, kơjo kum dêi Kuô̆k hô̆i, Chin phuh, tung mê ai tơdroăng veăng kơjo kum mơngế pêi cheăng vâ rak chêng, hlối pro tơ’lêi hlâu ăm mơngế ki pêi cheăng hmiân tuăn pêi chiâk deăng.

Pôa Vương Đình Huệ, Kăn xiâm hnê ngăn Kuô̆k hô̆i tối, Kuô̆k hô̆i, mâu kơ koan Kuô̆k hô̆i púi vâ Khu tơrŭm cheăng mâu khu cheăng Khoa hok Kih thuât Việt Nam ƀă Tíu xiâm ngăn ‘na cheăng kâ mơhno túa lĕm tro, mâu ngế tung Khu dêi Kâu lăk ƀô̆ đi đo veăng hnê tối, vâ pê klêi luât pơkâ tŏng kum, mâu pơkâ tŏng kum dêi Kuô̆k hô̆i; xuân môi tiah tơdroăng séa ngăn tơdjâk troh kơvâ cheăng mê. Kuô̆k hô̆i hâk mơnê ƀă tơmâng veăng hnê tối mơhé mơhno ƀă châ pro, pêi pú hên lơ môi ngế, lơ chêh ƀă hlá mơ-éa, pro ti lâi vâ Kuô̆k  hô̆i  rế ton rế hmâ, achê tâ.

VOV chêh

Gương tơblôu ƀă tơbleăng