VOV4.Xơ Đăng - Măng ĭng hdrối, pôa Vương Đình Huệ, kăn xiâm hnê ngăn Kuô̆k hô̆i hiăng pơkuâ po Rôh hôp ‘no tơdrêng ing troăng hyôh Internet tơbleăng hnoăng cheăng Hô̆i đong hnê ngăn mâu kong pơlê, pơlê kong kân kơpong peăng Kơnhŏng hơnăm 2022. Teăng mâ kăn pơkuâ mâu kong pơlê, mâu khu xiâm, kơvâ cheăng ƀă lối 200 ngế kăn dêi 25 to kong pơlê, pơlê kân veăng hôp. Pơkâ thế pơkâ mơ’no tung hơnăm 2022 cho pơtối mơdêk rơkê dêi Hô̆i đong hnê ngăn rêm râ.

A hneăng hôp, mâu tơdroăng veăng hnê tối dêi mâu kăn hiăng tơpui ‘na mâu túa pêi cheăng, tơdroăng ăm hlo  mâu tơdroăng pêi ki kal dêi Hô̆i đong hnê ngăn kuăn pơlê môi tiah tơdroăng séa ngăn, trâm mâ kuăn pơlê, pơkâ mâu tơdroăng ki kal dêi kong pơlê; hlối tối tơbleăng mâu tơdroăng pâ thế vâ mơdêk tơ-ƀrê tâ nếo tơdroăng cheăng dêi Hô̆i đong hnê ngăn kuăn pơlê. Jâ Phùng Thị Hồng Hà, kăn xiâm phŏ Hô̆i đong hnê ngăn kuăn pơlê dêi pơlê kong kân Hà Nội pâ thế:

‘’Pâ thế vi ƀan pơkuâ cheăng Kuô̆k hô̆i hnê mơhno pơkâ mâu tơdroăng cheăng pêi klêi séa ngăn, pơkâ ‘na hnoăng cheăng dêi  mơngế ki ối a ko pơkuâ tíu pêi cheăng châ séa ngăn tung pêi pro mâu tơdroăng tóoi mơgêi séa ngăn dêi Hô̆i đong hnê ngăn kuăn pơlê  pơlê kong kân, pơlê krâm, tơring, pơkong kong krâm malối cho tung séa ngăn tơdroăng cheăng dêi vi ƀan hnê ngăn, Kăn xiâm hnê ngăn Vi bban bêng a âu pơlê krâm, pơlê kong krâm, vâ tơniăn ăm kăn Hnê ngăn Vi ƀan bêng pêi tro tiô hnoăng cheăng châ pơcháu; ví lơ ai ngế ki oh tá vâ tơmâng, tơngôu tung tơdroăng cheăng drêng ôh tá ai Hô̆i đong bêng lăm séa ngăn’’.

Tâ tá hneăng hôp

Pôa Sùng A Hồ, Kăn hnê ngăn Hô̆i đong kong pơlê Lai Châu tối tiah kố, tung tơdroăng cheăng dêi Hô̆i đong hnê ngăn kuăn pơlê ai hên tơdroăng ki kal lơ tơdroăng kal pêi tơdrêng, tơdroăng nếo ai pơla péa rôh hôp ki tơdjâk ƀă tơdroăng pêi vâ mơnhông cheăng kâ rêh ối, ‘na cheăng lêng – kring tơniăn a kong pơlê kal pơkâ tơdrêng. Tung pơla mê, tiô pơkâ dêi mâu Luât ƀă hlá mơ-éa pá xôp luât, tơdroăng cheăng pêi mê cho hnoăng pơkâ dêi Hô̆i đong hnê ngăn kuăn pơlê, mê thế tơkôm troh rôh hôp dêi Hô̆i đong kong pơlê nếo séa ngăn, pơkâ. Pôa Sùng A Hồ tối tiah kố:

‘’Kuô̆k hô̆i, Chin phuh kal tí tăng ‘nâi plê̆ng hlá mơ-éa chêh pơkâ nhên hnoăng cheăng pêi dêi Khu kăn Hô̆i đong kong pơlê ki tơdjâk troh tơdroăng cheăng séa ngăn pơkâ mâu tơdroăng nếo ai pơla péa rôh hôp Hô̆i đong hnê ngăn kuăn pơlê. Séa ngăn, pơkâ nhên tâ mâu tơdroăng kal thế ai xing xoăng hnoăng pêi hnoăng chiâng pêi pro dêi Khu kăn Hô̆i đong hnê ngăn kuăn pơlê séa ngăn, pơkâ pơla péa rôh hôp, malối cho mâu tơdroăng kal tơdjâk  troh tơdroăng pơkâ ‘no liăn mơjiâng tơmeăm khoăng, rak ngăn tơnêi  tơníu, mâu tơdroăng pêi tơdrêng ki nếo ai; pơkâ nhên tơdroăng pêi, tơdroăng cheăng pêi ki châ Hô̆i đong hnê ngăn kuăn pơlê ăm phêp tơleăng mơnhên pơla péa rôh hôp ƀă hnoăng cheăng dêi Khu kăn hô̆i đŏng hnê ngăn kuăn pơlê  drêng pơkâ mâu tơdroăng mê’’.

Pôa Vương Đình Huệ, Kăn xiâm hnê ngăn Kuô̆k hô̆i tối tơbleăng mơgêi hneăng hôp

Tối tơbleăng mơgêi hneăng hôp, pôa Vương Đình Huệ, Kăn xiâm hnê ngăn Kuô̆k hô̆i tối pơchân, pơtối pơkâ nhên, hnê thế hnê tơdroăng cheăng pêi, hnoăng cheăng pêi, hnoăng cheăn chiâng phêp pơkâ dêi Hô̆i đong hnê ngăn kuăn pơlê, Khu kăn hô̆i đong, mâu Khu cheăng Hô̆i đong hnê ngăn kuăn pơlê, Tôh mâu kăn Hô̆i đong hnê ngăn kuăn pơlê ƀă Hô̆i đong hnê ngăn kuăn pơlê tiô pơkâ dêi luât ‘mâi hơ’lêh, tơ’nôm mâu tơdroăng Luât tơkŭm cheăng Chin phuh ƀă Luât tơkŭm cheăng dêi mâu kăn kong pơlê, malối ƀă mâu kăn ki nếo veăng pêi cheăng rôh apoăng cho mâu kăn Hô̆i đong hnê ngăn kuăn pơlê:

‘’Pơtối séa ngăn, mơjiâng lơ pê klêi ƀă tơkuơm pei tơdroăng Tơkêa bro pơtối pơ’lêh nếo, mơdêk tơ-ƀrê rôh hôp Hô̆i đong hnê ngăn kuăn pơlê, tơdroăng trâm mâ kuăn pơlê, kơ êng ƀă tiâ tơdroăng kơ-êng vâ pêi tro tơdroăng cheăng, hnoăng pơkuâ cheăng dêi Hô̆i đong kong pơlê, pơlê kong kân ƀă ‘na tơkŭm pêi cheăng ƀă tơniăn pêi pro tiô Luât pơkâ pêi ƀă Luât ki pơkâ pêi pro a kong pơlê; mơjiâng khu ki pêi cheăng ngăn ‘na mơngế, xo phĭu ki rah xo, tâ phĭu rah xo; pơkâ mâu tơdroăng ki kal tung mâu tơdroăng cheăng séa ngăn tơdroăng rak vế pêi pro tro mâu tơdroăng cheăng séa ngăn pêi tro tiô luât ƀă luât pơkâ a kong pơlê. Tơdroăng pơ’lêh nếo, mơdêk ivá cheăng, ki xêt khât, ki tơ-ƀrê tung tơdroăng cheăng dêi Hô̆i đong hnê ngăn kuăn pơlê thế pêi tro tiô tơdroăng thế pêi pro tiô Pơkâ Hneăng hôp Đảng ƀô̆ tung lâp tơnêi têa ƀă hneăng hôp Đảng ƀô̆ kong pơlê, pơlê kong kân. Thế pơkâ ƀă ngăn mâu kăn Hô̆i đong hnê ngăn kuăn pơlê cho ki xiâm, tơ-ƀrê ƀă  tơdroăng cheăng dêi mâu kăn Hô̆i đong hnê ngăn kuăn pơlê pơkâ troh ki tơ-ƀrê, pơxúa tơdroăng cheăng Hô̆i đong hnê ngăn kuăn pơlê tối tơchoâm. Tŭm tơdroăng pơkâ tơdjâk troh kong pơlê tiô hnoăng chiâng pêi pro thế xo kuăn pơlê, khu mơdró pro xiâm, pơkâ ki pơxúa ăm tơnêi têa, hdroâng mơngế mê ki a hdrối tâ.

Pôa Vương Đình Huệ, Kăn xiâm hnê ngăn Kuô̆k hô̆i pâ thế, ing tơdroăng cheăng hmâ pêi dêi Kuô̆k hô̆i ƀă Hô̆i đong hnê ngăn kuăn pơlê mâu kong pơlê, pơlê kong kân, Hô̆i đong mâu kong pơlê, pơlê kong kơdrâm thế séa ngăn, mơjiâng, pơtroh ăm râ đảng tối ăm ‘nâi mâu tơdroăng vâ pêi lơ Hô̆i đong hnê ngăn kuăn pơlê pơkâ ‘na tơdroăng chêh mâu hlá mơ-éa luât ăm tâi hneăng vâ hbrâ rơnáu  ing apoăng, ing hơngế tung mơjiâng, pê klêi tơdroăng cheăng, luât nếo pơkâ mơnhông mơdêk cheăng kâ- rêh ối dêi kong pơlê, tơmâng tơdroăng pơ’lêh luât, pơ’lêh mâu pơkâ tơkŭm cheăng dêi mâu kăn ƀă luât pơkâ ki kal ăm mâu kong pơlê, pơlê, pơlê kong kơdrâm, pơlê kong kân.

VOV1 chêh

Gương tơplôu ƀă tơbleăng