VOV4.Xơ Đăng - Nếo a chê kố, a Hngêi Kuô̆k hô̆i, Vi ƀan pơkuâ Kuô̆k hô̆i tơkŭm po Rôh hôp tơbleăng Tơdroăng séa ngăn dêi Kuô̆k hô̆i hơnăm 2023, tơdjêp tơdrêng ƀă 49 Khu kăn Kuô̆k hô̆i mâu kong pơlê, pơlê kong kân. Pôa Vương Đình Huệ, kăn xiâm hnê ngăn Kuô̆k hô̆i, pôa Trần Quang Phương, kăn xiâm phŏ hnê ngăn Kuô̆k hô̆i rơtế veăng pơkuâ po rôh hôp.

Tơbleăng a Hneăng hôp, mâu kăn tối, tung hơnăm hdrối kố nah, tơdroăng cheăng séa ngăn dêi Kuô̆k hô̆i hiăng châ mơdêk tâ nếo ƀă hlo pơ’lêh, rế mơdêk ki tơƀrê, hlối xêt, ki pơxúa, hlo hên tơdroăng ki pơxúa tơƀrê khât, châ kuăn pơlê  khĕn kơdeăn. Vâ mơdêk ki tơƀrê dêi tơdroăng cheăng séa ngăn, tiô pôa Nguyễn Văn Dũng, Kăn phŏ hnê ngăn Hô̆i đong Pơlê kong kân Hồ Chí Minh tối thế mơdêk rơdêi tơdroăng séa ngăn cho tơdroăng cheăng ki kal.

“Mơjiâng tơdroăng séa ngăn tí tăng ngăn tơdroăng pêi pro, vâ rak tơniăn tơdâng tơ’mô pơla mâu tơdroăng séa ngăn. Tung tơdroăng chêh tối tơbleăng  tơdroăng hiăng klêi séa ngăn, tơdroăng pơkâ ‘na séa ngăn kal ai mâu pơkâ ki nhên khât, hdró hâi khế hơnăm, hnoăng cheăng pêi ăm nhên khât dêi mâu kơ koan, khu tơrŭm cheăng, mâu ngế ki ai tơdjâk troh. Kal ai tơdroăng séa ngăn chuyên đề ‘na ‘no liăn mơjiâng pro tơmeăm khoăng tơnêi têa, tơdroăng chêl thiăn gu tơbăng xĕn tơnêi’’.

Hneăng hôp tơbleăng Tơdroăng séa ngăn dêi Kuô̆k hô̆i

Vâ tơbleăng châ tơƀrê tơdroăng séa ngăn dêi Kuô̆k hô̆i, Viƀan pơkuâ cheăng Kuô̆k hô̆i hơnăm 2023, pôa Vương Đình Huệ, Kăn xiâm hnê ngăn tơnêi têa pơkâ thế, mâu kơ koan dêi Kuô̆k hô̆i, kơ koan khu râ pơkuâ cheăng ‘nâi nhên tơdroăng mơdêk ki tơƀrê pơxúa tơdroăng séa ngăn cho môi tung mâu tơdroăng ki kal, cho tơdroăng ki xiâm tung pơ’lêh nếo tơkŭm pêi tơdroăng cheăng dêi Kuô̆k hô̆i Việt Nam tiô troăng rơhlâ dêi Đảng ‘na mơjiâng Tơnêi têa tro tiô luât Xah hô̆i chuh ngiah dêi Kuăn pơlê, xua Kuăn pơlê, ing Kuăn pơlê.

Mơdêk séa ngăn dêi Kuô̆k hô̆i tung hbrâ mơdât kâ kơluâ, mơdât pro ôh tá tro, mơ’nhiê liăn; tơmâng tơdroăng kal ‘na hbrâ mơdât kâ kơluâ, ôh tá tro  mơ’nhiê liăn, ‘nâi nhên kố cho tơdroăng cheăng pêi đi đo, ki kal, ki xiâm; Tơkŭm a mâu tơdroăng ki tơ’lêi tro pro tơdroăng ôh tá tro, ki kuăn pơlê tơmâng vâ ’nâi ‘na kâ kơluâ, pro ôh tá tro, ‘na tuăn mơno rế ôh tá lĕm ‘na tơdroăng kal kí, tuăn tơmiât, tơdroăng rêh ối.

Pôa Vương Đình Huệ, Kăn xiâm hnê ngăn Kuô̆k hô̆i pơkâ thế, pê klêi luât pơkâ tơrŭm cheăng pơla Kuô̆k hô̆i ƀă mâu khu tơrŭm cheăng Đảng, Măt trâ̆n tơnêi têa Việt Nam, mâu khu cheăng kal kí- rêh ối pơlê pơla tung séa ngăn vâ pơtối rak hnoăng séa ngăn dêi rêm kơ koan, rơtế tơrŭm mơdêk ki tơƀrê, pơxúa séa ngăn hnoăng pơkuâ; rĕng séa ngăn, tâi tâng, tối ƀă tí tăng ‘nâi plĕng tối ‘mâi hơ’lêh, tơ’nôm mâu tơdroăng pơkâ dêi luât ‘na tơdroăng cheăng séa ngăn.

Tơkŭm pêi tro tơdroăng xo phĭu rah xo ƀă mâu hnoăng cheăng xua Kuô̆k hô̆i tâ phĭu, kĭ  ăm phêp.

Pôa Vương Đình Huệ, Kăn xiâm hnê ngăn Kuô̆k hô̆i séa ngăn pro troăng kân tơdrăng lĕm Bến Lức - Long Thành

Kăn xiâm hnê ngăn Kuô̆k hô̆i tối, hơ’lêh nếo, mơdêk tơƀrê  tơdroăng cheăng séa ngăn cho tơdroăng ki hiăng, dế châ Kuô̆k hô̆i, Vi ƀan pơkuâ cheăng Kuô̆k hô̆i pêi pro ƀă mơhno tơbleăng mâu tơdroăng hơ ‘lêh tuăn tơmiât ƀă mâu túa pêi vâ veăng ‘no hnoăng mơdêk tơƀrê, xêt, tơƀrê pơxúa dêi khu kăn xiâm tơnêi têa.

“Séa ngăn thế ngăn ing tơdroăng mơjiâng; pơla ‘ meăm pro’’ ƀă ‘’hnê pêi ’’ mê tơdroăng meăn cho ki xiâm, krá ton hơnăm; ‘’hnê pêi ‘’ pêi kơtăng, pêi kơnhing khŏm klêi, thế pơtối rak mâu tơdroăng  ki lĕm tro, mâu túa pêi pro ki tro, ngế ki pêi pro tơdroăng lĕm djâ troăng lĕm ahdrối; tối tơdâng tơ’mô, khât vâ pơtối pê klêi luât pơkâ, tơdroăng luât, pơtối mơdêk tơƀrê pơxúa tơdroăng tơkŭm pêi, veăng mơnhông mơdêk cheăng kâ rêh ối pơlê pơla ƀă mơjiâng tơnêi têa. Mơjiâng luât cho vâ pơxiâm ƀă mơnhông mơdêk, tơdroăng séa ngăn xuân tiah mê’’.

Kăn xiâm hnê ngăn Kuô̆k hô̆i tối, Kuô̆k hô̆i  đi  đo pơ’lêh nếo, xua mê, rêm kơ koan dêi Kuô̆k hô̆i thế pêi tro séa ngăn, rêm khu kăn Kuô̆k hô̆i thế tơná pin séa ngăn tơdroăng cheăng dêi tơná tung hnoăng cheăng pêi, hnoăng cheăng ki chiâng pêi ƀă hnoăng cheăng pêi a ngiâ kuăn pơlê vâ ‘’po môi rôh ki nếo tơngah tơdroăng ki lĕm tung tơdroăng cheăng Kuô̆k hô̆i’’ môi tiah púi vâ dêi pôa Nguyễn Phú Trọng, Kăn xiâm pơkuâ hnê ngăn Đảng tối nhên a Hneăng pơxiâm dêi rôh hôp má môi, Kuô̆k hô̆i hneăng 15.

Klêi kơ’nâi hôp, pôa Vương Đình Huệ, Kăn xiâm hnê ngăn Kuô̆k hô̆i ƀă khu kăn cheăng dêi Tíu xiâm hiăng séa ngăn, tí tăng ngăn tơdroăng pêi pro mâu Pơkâ dêi Kuô̆k hô̆i ƀă tơdroăng tơkêa bro ‘no liăn cheăng mơjiâng pro troăng kân tơdrăng lĕm Bến Lức - Long Thành ƀă pro Tơraih tơƀai Long Thành.

Vâ pê klêi tro tiô hâi khế hơnăm pơkâ, ƀă mâu kăn kong pơlê Đồng Nai, pôa Vương Đình Huệ, Kăn xiâm hnê ngăn Kuô̆k hô̆i pơkâ thế, kong pơlê Đồng Nai tơkŭm mơdêk, tơleăng mơnhên klêi tơdroăng cheăng gu tơnêi, xĕn tơnêi, gu tơnêi, pơcháu ăm khu ‘no liăn mơjiâng pro, ăm hlá mơ-éa mơnhên hnoăng xúa tơnêi; pơtối tơmâng ‘no liăn pêi klêi mâu tơmeăm khoăng ki pro pơxúa ăm kuăn pơlê, tơmâng hnê cheăng pêi vâ kuăn pơlê tơ’lêi hlâu tung tí tăng cheăng kâ, tơniăn ăm kuăn pơlê châ rêh ối tơdâng tơ’nôm lơ tơƀrê tâ a tíu rêh ối ton nah.

VOV/Tơplôu: Gương