Hâi  lơ 13/11, a pơlê kong kơdrâm Buôn Ma Thuột, Tíu xiâm Đoân Droh rơtăm Kŏng sản Hồ Chí Minh tơkŭm po hneăng hôp, khĕn kơdeăn, hriâm tơdroăng nếo ai, hnê tối ‘na kuăn ngo, tơdroăng loi tĭng tiô khôp hơnăm 2022 ăm kăn ƀô̆ đoân rêm râ kong pơlê Dak Lak.

Tung pơla 2 hâi, mâu ngế hriâm châ hriâm mâu tơdroăng, mê cho: hriâm tơdroăng hnê tối tơdjuôm ‘na tơdroăng tiô khôp, loi tĭng ƀă hnoăng cheăng pêi dêi kơvâ cheăng, ki pơxúa dêi tơdroăng loi tĭng, tiô khôp a Việt Nam; tơdroăng vâ pêi, a chê ƀă tơleăng mơnhên mâu tơdroăng ‘na loi tĭng tiô khôp; Troăng rơhlâ, luât tŏng kum, luât pơkâ dêi Đảng ƀă tơnêi têa ‘na kuăn ngo ƀă tơdroăng cheăng dêi kuăn ngo; Tơdroăng nếo ai, hnê tối ‘na luât, luât ‘na hdroâng kuăn ngo ƀă tơdroăng hdroâng kuăn ngo.

Tí tăng ‘nâi plĕng tơdroăng tối tơbleăng troăng vâ pêi, luât tŏng kum, Luât dêi Đảng ƀă Tơnêi têa ăm hdroâng kuăn ngo iâ mơngế ƀă tơdroăng tơplâ mơdât khu ki ai tuăn ‘mêi hriăn vâ pro tơklâ ki tơrŭm môi tuăn hdroâng kuăn ngo  dêi mâu ki kơneăm tung kong pơlê Dak Lak.