Tung Khế tŏng kum mơngế hliăng tiâ xahpá hơnăm kố, pơxiâm sap hâi lơ 1/5 troh lơ 31/5, tâi tâng Khu mơ-eăm tŏng kum 100.000 ngế hliăng tiâ xahpá. A leh mơhnhôk, jâ Võ Thị Ánh Xuân, Teăng Kăn xiâm hnê ngăn tơnêi têa hiăng diâp 300 hnoăng liăn hriâm rơkê kơnâ 300 rơtuh liăn diâp ăm mâu vâi o hok tro hdroâng kuăn ngo tơkâ hluâ pá puât hriâm rơkê tung kong pơlê Điện Biên.

Khu lo tŏng veăng Việt Nam xuân mơnhên, pơ-ôu pơ-eăng mâu khu pú hên, khu tê mơdró, ngế krê hiăng môi tuăn ƀă tơkêa tŏng kum kơxô̆ liăn lối 480 rơtal liăn. Klăng roh kố, Khu lo tŏng veăng Việt Nam xuân pơkuâ, tơrŭm tơkŭm po Kơchơ tŏng kum mơngế hliăng tiâ xahpá  kum ăm 500 ngế ai hnoăng tơnêi têa, ngế ai tơdroăng rêh ối pá puât tung kong pơlê Điện Biên rôe tơmeăm ki kal xúa rêm hâi ƀă phĭu rôe tơmeăm kơnâ 500.000 liăn/phĭu ƀă tơkŭm po Tơdroăng pleăng mơheăm tŏng kum mơngế, khôi túa vâi krâ ton nah pleăng kế tung châ tŏng kum mơngế, ƀă veăng amê ai dâng 500 ngế.