VOV4.Xơ Đăng - Pơreăng COVID-19 tâ tú a tâi tâng mâu kong pơlê, pơlê kong kân tung lâp tơnêi têa, hiăng ai hên thái cô ƀă hok tro tâ pơreăng. Vâ tơniăn, hmâ ƀă tơdroăng rêh ối nếo, ngăn tiô kơ tơdroăng rêh ối ki ai khât a mâu kong pơlê ai hên túa hnê ƀă hriâm ki hbrâ rơkê beăn vâ hok tro châ lăm hriâm a hngêi trung.

Mơnhên pơreăng COVID-19 ối xông tâ tú râ ó, laga hngêi trung hriâm ôh tá chiâng klĭng péa tâi tâng, xua mê mâu kong pơlê, pơlê kong kơdrâm pơrá pơkâ mâu hngêi trung mơjiâng troăng hnê hriâm mơ’no tơdrêng tung um tiô troăng măng Internet hlối hriâm mơ’no tung tơdrêng tung um tơvi vâ teăm pơ’lêh tơdrêng troăng hnê hriâm tiô tơdroăng pơreăng xông tâ tú a kong pơlê. Troăng pêi ki mâu kong pơlê pêi pro nôkố mê cho ăm hok tro a mâu cheăm, bêng, pơlê kân tơniăn lơ ai pơreăng xông tâ tú iâ mê kô chiâng troh hngêi trung hriâm tơdrêng.

Pôa Nguyễn Thế Bình, Kăn pơkuâ hnê hriâm ƀă hnê mơjiâng tuăn ngôa rơkê kong pơlê Hà Giang tối ăm ‘nâi, tiô tơdroăng tơkŭm po hnê hriâm ƀeăn ƀĕng rơkê tiô tơdroăng pơreăng xông tâ tú, Vi ƀan kong pơlê hiăng pơkâ ăm hok tro mâu kơpong tơniăn vêh hriâm sap ing mơ’nui khế 11 – klêi kơ’nâi 4 măng tĭng ăm hok tro pơtê pơtân troh hngêi trung vâ hbrâ mơdât pơreăng:

‘’Ƀă mâu tơring, cheăm mê ai pơreăng râ má 1, râ má 2, mâu hngêi trung tơkŭm po hriâm tơdrêng tiah hmâ ƀă pêi pro kơtăng mâu troăng hbrâ mơdât pơreăng. Ƀă râ má 3, râ má 4 mê mâu tơring, cheăm kố pơtê pơtân ôh tá ăm hok tro troh hngêi trung ƀă pêi pro troăng tơkŭm po hnê hriâm ki ê, kô chiâng pêi pro hriâm mơ’no tơdrêng tung um tiô troăng măng Internet, kô chiâng pêi pro tơdroăng pơcháu ƀai hriâm, lơ pơcháu phĭu hriâm tâp, pơcháu tơdroăng hriâm tâp ăm mâu vâi o hok tro, lơ vêh hriâm mâu ƀai ton, thăm hriâm mâu ƀai ton ing tơdroăng pơcháu ƀai tâp a hngêi ăm mâu vâi o. Troh nôkố mê lâp kong pơlê hiăng ai 430 hngêi trung tung tâi tâng kơxô̆ 633 hngêi trung ăm hok tro vêh hriâm a hngêi trung, châ 68%’’.

Drêng ai pơreăng, mâu tơring, cheăm pơrá ôh tá pro kơtăng tơdroăng klĭng péa hngêi trung hriâm tung lâp kong pơlê, pơlê kong kơdrâm, teăng amê bu mơdât kơpong iâ tiô rêm lâm hriâm, rêm ngế hok tro, thái cô ki tơdjâk; tơkŭm toê xo têa môh test COVID-19 ƀă pơ’lêh hnê hriâm mơ’no tơdrêng tung um tiô troăng măng Internet, lơ pơtê pơtân troh hngêi trung tung môi pơla iâ tê vâ séa ngăn, ti tăng mâu ngế tro tâ pơreăng, kơ’nâi mê rĕng ăm hok tro troh hngêi trung. Môi tiah a kong pơlê Hòa Bình, klêi kơ’nâi ai pơreăng COVID-19, Vi ƀan kong pơlê pơkâ ăm hok tro, sinh viên, mâu ngế hriâm a mâu hngêi trung tung lâp kong pơlê pơtê pơtân tơdroăng hriâm tơdrêng a hngêi trung tung 2 hâi vâ pêi pro tơdroăng séa ngăn, rah mơngế ƀă pâk vaccine hbrâ mơdât pơreăng COVID-19. Kơ’nâi mê, mâu hngêi trung hiăng hbrâ tơkŭm po troăng hnê hriâm rơkê troh rêm lâm hriâm, mơ-eăm vâ hok tro châ troh hngêi trung, tơniăn tŭm mâu troăng hbrâ mơdât pơreăng. Jâ Bùi Thị Kim Tuyến, Kăn pơkuâ hnê hriâm ƀă hnê mơjiâng tuăn ngôa kong pơlê Hòa Bình tối:

‘’Tung mâu tơring, cheăm lâp kong pơlê xuân ai hngêi trung tơkŭm po ăm mâu vâi o troh hngêi trung hriâm tiah hmâ, laga xuân ai hngêi trung tơkŭm po hriâm mơ’no tơdrêng tung um tiô troăng măng Internet ƀă thăm nếo cho tung hngêi trung ai lâm tâng ai F0 mê lâm ki mê hriâm mơ’no tơdrêng tung um tiô troăng măng Internet, ƀă mâu lâm ki ê hriâm tiah hmâ. Cho yôh klêi kơ’nâi rah xo mâu ngế F1 tơdjâk ki ê pơrá âm tĭnh, mê nếo tơniăn ăm mâu hok tro tá thái cô’’.

Pôa Nguyễn Việt Hà, Kăn phŏ ƀơrô pơkuâ tơdroăng Kal kí, troăng tơmiât, Khu pơkuâ hnê hriâm ƀă hnê mơjiâng kong pơlê Vĩnh Phúc xuân tối ăm ‘nâi, mâu hngêi trung a mâu tơring Sông Lô, Vĩnh Tường, Yên Lạc, pơlê kong kơdrâm Phúc Yên ƀă Vĩnh Yên dế tơkŭm po hnê hriâm mơ’no tơdrêng tung um tiô troăng măng Internet vâ hbrâ mơdât pơreăng. Vâ tơniăn tơdroăng xiâm dêi tơdroăng hriâm tâp tung hơnăm, mâu hngêi trung pơrá tơkŭm po hnê hriâm tiô tơdroăng pơ’lêh tơtro ƀă tiô troăng hriâm mơ’no tơdrêng tung um tiô troăng măng Internet.

‘’Ƀă mâu ngế drêng pơ’lêh chiâng hriâm mơ’no tơdrêng tung um tiô troăng măng Internet mê xuân cho tiô troăng hriâm vâ thâ, pơtân hriâm tiô chiâng rĕng tê. Kơ’nâi mê drêng pơreăng châ mơdât mâu tíu ki tâ tú mê tơdrêng amê cho mâu hngêi trung pơ’lêh tơdroăng hnê hriâm thế hriâm tơdrêng. Vâ tơniăn hôm păng ‘nâng drêng pêi pro tơdroăng hriâm mơ’no tơdrêng tung um tiô troăng măng Internet, mâu hngêi trung hiăng rah xo mâu mô-đun hnê tơtro a mâu môn vâ tơniăn tơdroăng hnê hriâm tiô pơkâ, tiô tơdroăng hnê hriâm hiăng mơ’no’’.

Khu xiâm pơkuâ hnê hriâm ƀă hnê mơjiâng tuăn ngôa rơkê mơnhên, troăng tơkŭm po hnê ƀă hriâm a mâu kong pơlê nôkố pơrá ƀeăn ƀĕng rơkê ƀă mơ-eăm kơdroh tơdroăng tơdjâk ‘mêi dêi pơreăng troh tơdroăng hnê hriâm tung hngêi trung. Troăng tơkŭm po hlối tơrŭm ƀă troăng hnê hriâm dêi mâu kong pơlê rế kum tơniăn ăm ngế hnê ƀă ngế hriâm, rế tơniăn pêi kêi đeăng tơdroăng hnê hriâm mê ối rak ki hôm păng ‘nâng tung hnê hriâm. Kố xuân cho pơkâ xiâm ki Khu xiâm pơkuâ hnê hriâm ƀă hnê mơjiâng hiăng pơkâ sap apoăng hơnăm hriâm, Khu xiâm hiăng hnê mơhno ƀă mâu kong pơlê dế pêi pro ƀeăn ƀĕng rơkê troh rêm hngêi trung, vâ kêi đeăng pơkâ hnê hriâm tung hơnăm hriâm.

VOV4 chêh

A Sa Ly tơplôu ƀă tơbleăng