Tiô Khu xiâm ngăn pêi cheăng, Mố đô̆i tro rong ƀă Rêh ối pơlê pơla, hên tơdroăng pêi ki kân Kuô̆k hô̆i pơcháu ăm ‘na Túa Pơkâ mơnhông cheăng kâ rêh ối pơlê pơla hơnăm 2024 pơrá vâ pêi pro châ môi tiah tơdroăng puí vâ: Kơxô̆ ngế ôh tá ai cheăng pêi kơpong kơphô̆ tiô riân châ pá xôp 4%, kơxô̆ ngế pêi cheăng ki hiăng châ hnê ăm cheăng pêi tiô riân châ dâng 70%; Kơxô̆ ngế pêi cheăng ki hiăng châ hnê ai ƀăng, chưng chih tiô riân châ dâng 28-28,5%.

Tiô riân kơxô̆ rơpŏng kơtiê tiô pơkâ kơtiê ki hên troăng mơ’nui hơnăm 2024 kơdroh lối 1% tâng pơchông ƀă mơ’nui hơnăm 2023. Laga, pôa Lâm Văn Đoan, Kăn phŏ pơkuâ Vi ƀan Pơlê pơla pơkâ thế kal séa ngăn, ‘mot tơ’nôm tung hlá mơ-éa tối tơbleăng mâu tơdroăng ki tơdjâk dêi khía mơhot kân rôh má 3, ing mê mơnhên tối mâu tơdroăng pơkâ vâ pêi rak tơniăn tơdroăng ki tơdrăng, tro:

 "Kal athế tối tơbleăng tơdroăng ki kế tơmeăm tro tơ’nhiê klêi kơ’nâi khía mơhot kân rôh má 3 pro, ai rơkong tơpui tối mâu tơdroăng pơkâ vâ pêi nhên hôm tơƀrê há lơ ôh? Tơdroăng tơkêa ‘na hngêi ối, pin xoăng liăn tơnêi têa 8 rơpâu rơtal gum ăm dâng 100 rơpâu rơpŏng kơtiê, vâ chê kơtiê tung lâp tơnêi têa, la krê tơdroăng ki hngêi trăng, tơmeăm khoăng tơ’nhiê xua khía mơhot kân Yagi cho 257 toăng hngêi, mê mâu tơdroăng kố pâ thế vêh mơnhên tối tâi”.

Pơchuât tơbleăng a rôh hôp ăm hlo, hơnăm 2024, rơtế ƀă tơdroăng ki ‘mâi mơnhông ƀă mơdêk dêi mâu kơvâ cheăng kâ, mâu tíu kal mâu ngế pêi cheăng châ tơtrŏng mơnhông; thăm mơdêk tơrŭm pơla tơbleăng ƀă xúa ngế pêi cheăng, tŏng gum ngế pêi cheăng, gum ngế pêi cheăng tăng tơdroăng cheăng pêi ƀă rôh apoăng tơbleăng tíu pơkâ po tơdroăng ki tăng mâu ngế pêi cheăng tơdrêng ing troăng hyôh internet tung lâp tơnêi têa; teăm tŏng gum kuăn pơlê, ngế pêi cheăng hlo tâk tâng vâ pơchông ƀă khế kố hơnăm 2023.

Tơrŭm pêi cheăng a mâu khu mơdró kâ hlo rak vế tơniăn, tơdroăng cheăng ki ăm ngế pêi cheăng lăm pêi cheăng a kong têa hlo mơnhông tơƀrê. Mâu kong pơlê pêi pro tŭm, teăm tơdrêng troăng hơlâ kơjo ngế ki ai hnoăng ƀă kăch măng, tŏng gum pơlê pơla, Baoh hiêm pơlê pơla, Ƀaoh hiâm ôh tá ai cheăng pêi, kơdroh kơtiê, rak ngăn ngế ki hiăng hên hơnăm vâi hdrêng ki ai tơdroăng rêh ối xơpá puât; tơdroăng ki mơdrếo ôh tá xúa liăn mâ ăm mâu ngế ki châ kâ liăn tŏng gum ing pơlê pơla châ mơdêk rơdêi.

Tiô mâu kăn tối, Khu xiâm pêi cheăng, Mố đô̆i tro rong ƀă Rêh ối pơlê pơla, hnoăng cheăng xoăng liăn pêi cheăng tơdjuôm dế hrá, tung mê ai kơxô̆ liăn dêi tơdroăng kơdroh kơtiê krá ton hơnăm 2024. Jâ Đỗ Thị Lan, Phŏ pơkuâ Vi ƀan Pơlê pơla pơkâ thế:

"Hơnăm 2024 kơxô̆ liăn pêi cheăng, kơxô̆ liăn ‘no pêi cheăng dêi pin dế ối iâ, xoăng liăn troh khế 8 châ 47%. Troh tâi hơnăm tiô tối hdrối hiăng klêi. Pơkâ thế tối tơbleăng tơ’nôm liăn dêi hơnăm 2022-2023 pơhlêh chiâng pêi pro tung hơnăm 2024 mê pêi pro môi tiah lâi hôm chiâng kâi xoăng tâi liăn tung hơnăm 2024 há?”

Pơchuât tơbleăng ‘na tơdroăng pêi pro Túa pơkâ mơnhông cheăng kâ rêh ối pơlê pơla ƀă Liăn ngân tơnêi têa hơnăm 2024, tiô tối hdrối túa pơkâ ƀă liăn ngân tơnêi têa hơnăm 2025 kơvâ pêi cheăng, ngế ki ai hnoăng ƀă pơlê pơla, teăng mâ Khu xiâm ngăn cheăng pêi, Mố đô̆i tro rong ƀă Rêh ối pơlê pơla ăm ‘nâi, xua tơdroăng ki pơkuâ dêi Đảng, tơdroăng hnê mơhno, pơkâ kơtăng dêi Chin phuh, Ngế pro xiâm hnê ngăn Chin phuh; ƀă khŏm mơ-eăm dêi kăn ƀô̆, kong chưk, ngế pêi cheăng tung tâi tâng kơvâ cheăng ƀă tơdroăng ki tơrŭm krá tơniăn dêi rêm râ, mâu kơvâ cheăng, mâu kong pơlê, Khu xiâm ngăn cheăng pêi, Mố đô̆i tro rong ƀă rêh ối pơlê pơla hiăng tơkŭm pêi pro tơdâng tơ’mô, rơkê, tơƀrê mâu hnoăng cheăng, troăng hơlâ pơkâ tung mâu kơvâ pêi cheăng, ngế ki ai hnoăng ƀă pơlê pơla; teăm tŏng gum, tơbleăng troăng tŏng gum; rế pêi pro mâu hnoăng cheăng đi đo, rế tơtrŏng tung pơkâ tơleăng mâu tơdroăng ki tá hâi pêi pro klêi, mâu tơdroăng ki nếo ai.

A rôh hôp, Vi ƀan Pơlê pơla dêi Kuô̆k hô̆i pơkâ thế Khu xiâm ngăn pêi cheăng, Mố đô̆i tro rong ƀă Rêh ối pơlê pêi pro nhên mâu tơdroăng ki tơvâ tơdjâk troh hnoăng cheăng pôu râng xing xoăng liăn xuân môi tiah mâu tơdroăng tơvâ ‘na hlá mơ-éa hnê mơhno. Ing mê pơkâ troăng hơlâ vâ tối tơbleăng ‘na liăn ngân ăm tơtro, rak tơniăn tŏng gum pơlê pơla ăm kuăn pơlê.