Sap ing ối cho hok tro râ má pái phôh thong nah, Hoàng Tiến Dũng hiăng hâk vâ kơvâ kŏng ngê̆ thông tin. Klêi kơ’nâi mơgêi lâm 12 hơnăm 2003, tiô tơdroăng pói vâ dêi rơpŏng, ngoh mot hriâm Hê̆ Trung câp Quân lưk hngêi trung Đăi hok Trần Đại Nghĩa ƀă mơgêi klêi mê châ ƀiên chê̆ ‘na Khu pơkuâ mô đô̆i pơlê kong krâm Ƀuôn Hồ pêi cheăng.

A đông lêng, xua ai tơdroăng hâk vâ rơdêi ƀă kŏng ngê̆ thong tin, ngoh châ khu râ kăn pro tơ’lêi hlâu pơtối hriâm lập trình viên a Đại học Khoa học Tự nhiên Pơlê kong kân Hồ Chí Minh. Mơgêi ƀă ƀâng ki rơkê, Hoàng Tiến Dũng pơxiâm mơnhông tơdroăng ki rơkê ƀă túa ki rơkê hriâm tung tơdroăng pêi cheăng rêm hâi. Bu tung 4 hơnăm, ngoh chêh 2 phân mêm pơkuâ ƀă môi tơdroăng tơmiât pêi rơkê xúa pĕng ăm mâu hnêa tiêuh liên AK. Thiê̆u tă Hoàng Tiến Dũng tối ăm ‘nâi:

“Tơdroăng ki chiâng pêi dêi phần mêm cho tŏng kum pơkuâ kuăn pơlê tung hơnăm hbrâ mot pro mô đô̆i; pơkuâ mâu ngế ki lâi ối tung khu ki kĭ ngăch dư̆ ƀĭ mơhnhôk, klêi mê râ má 1, râ má 2; tŏng kum ăm kăn ƀô̆ pêi tơdroăng rah xo mô đô̆i pêi pro mâu pơkâ pêi hnoăng cheăng’’.

Ôh tá xê to hâk vâ chêh phân mêm, Thiê̆u tă Hoàng Tiến Dũng xuân thăm veăng tơrŭm rơtế khu hriăn plĕng tơmiât pêi rơkê mâu troăng xúa hnêa ƀă mâu khu hnêa kum tung hnê pơtâp hbrâ tơplâ. Apoăng hơnăm kố, ngoh rơtế ƀă Trung tă Phạm Văn Đông – Kăn tơbleăng tơdroăng cheăng ối tung Khu hnê mơhno cheăng lêng pơlê kong krâm Ƀuôn Hồ, hriăn plĕng pro châ tơƀrê phân mêm tơdjêp chiâng troăng pĕng chiâng hên tơdroăng’’ a klŏng ki xúa hnêa tiêuh liên AK tối tơdjuôm ƀă hnêa AR-15.

Troăng pêi kố hiăng châ khu râ kăn pơkuâ Khu hnê mơhno cheăng lêng pơlê kong krâm Ƀuôn Hồ, Khu xiâm pơkuâ lêng kong pơlê Dak Lak kĭ ƀă kô châ xúa tung tơdroăng nôkố tung la ngiâ. Trung tă Phạm Văn Đông tối:

“Ƀă troăng tơmiât pêi rơkê dêi á cho tơkŭm troăng séa ngăn troăng xúa a kơhâi xuân môi tiah a kơmăng ing khu kế tơdjêp tâ ki trâ; ƀă krê ƀă ngoh Dũng cho xup tíu xúa tơdjêp pơtroh a phôn. Péa tơdroăng kố mê tơdjêp chiâng troăng tơmiât pêi rơkê ‘’Tơdjêp troăng pĕng ki chiâng hên’’, ƀă troh nôkố á ƀă Dũng hiăng tơrŭm tơdjêp, klêi mê hriăn pĕng mơjiâng chiâng tơmeăm mê’’.

Tiô Thươ̆ng tă Tống Văn Quang – Cheăng kal kí Khu hnê mơhno cheăng lêng pơlê kong krâm Ƀuôn Hồ, mâu hơnăm hiăng hluâ, khu pú hên kăn ƀô̆ mâu lêng đông đi đo mơdêk pêi pro kơtăng mâu tơdroăng xiâm, tơdroăng hnê hriâm kal kí, hnê hriâm luât; Tơkŭm po ăm kăn ƀô̆, đảng viên kĭ, tơkêa pơtâp, hriâm tâp, hriâm tiô troăng tơdjâ, hiâm mơno, troăng tơdjâ Hồ Chí Minh; Mơdêk hiâm mơno ‘nâi pêi xêh tung hriăn plĕng xúa khoa hok kŏng ngê̆ tung hnoăng cheăng hnê pơtâp hbrâ rơnáu tơplâ ƀă hía hé.

Ing mê, rế hía rế ai hên ngế krê ki má môi tung hên kơvâ tơdroăng pêi cheăng, tung mê ki má môi cho thiê̆u tă Hoàng Tiến Dũng ƀă mâu phần mêm ‘’Pơkuâ pháu hnêa’’ ƀă ‘’Pơkuâ kuăn pơlê mot pro mô đô̆i’’... Mâu phân mêm kố hiăng ƀă dế châ xúa rơdâ tung tơdroăng rêh ối nôkố, veăng kum mơdêk châ tơƀrê tung pêi pro hnoăng cheăng gâk kring Tơnêi têa. Thươ̆ng tă Tống Văn Quang, mơnhên ‘na thiê̆u tă Hoàng Tiến Dũng:

“4 hơnăm pơtối Dũng cho đảng viên đi đo pêi kêi đeăng hnoăng cheăng dêi đông lêng, ƀă ‘na troăng tơmiât pêi rơkê mê hiăng châ Khu xiâm pơkuâ lêng, Kuân khu 5 ƀă Khu xiâm pơkuâ lêng kong pơlê Dak Lak diâp ƀâng kheăn kơdeăn. Mâu phần mềm pơkuâ lêng ki hbrâ mơhnhôk ƀă troăng tơmiât pêi rơkê xua ngoh pro pơrá hiăng xúa rơdâ nôkố ƀă mâu hơnăm la ngiâ nếo’’.

Vâ chê 20 hơnăm pêi cheăng ƀă Khu pơkuâ mô đô̆i pơlê kong krâm Ƀuôn Hồ, thiê̆u tă Hoàng Tiến Dũng hiăng ƀă dế tơmiât mơjiâng pro hên phân mê ƀă troăng tơmiât pêi rơkê kum tung tơdroăng pơtâp lêng hbrâ tơplâ châ tơƀrê. Ƀă mâu tơdroăng mơ-eăm tung tơdroăng pêi cheăng, ngoh hiăng châ mâu khu râ pơkuâ diâp hên pri ki kơnâ. Laga ƀă ngoh, pri ki kơnía má môi cho tơdroăng ki loi tơngah dêi nhŏng o ƀă khu pú. Kố kô cho tơdroăng ki mơhnhôk vâ ngoh pơtối hriâm tâp, hriăn plĕng, mơjiâng pro mâu phần mềm ki pơxúa tâ kum pêi pro ƀlêi trâng hnoăng cheăng gâk kring Tơnêi têa tung chal nếo.