Hâi lơ 26/12, pôa Nguyễn Hòa Bình, Ngế cheăng tung tíu xiâm kal kí, Ngế xiâm pơkuâ hngêi tơleăng xiâm hiăng troh pôu, rơkâu Têt, diâp tơmeăm ăm mâu kơ koan, tíu pêi cheăng ƀă mâu rơpŏng hngêi ki ai troăng hơlâ tŏng kum, ngế ki ai hnoăng ƀă kăch măng, rơpŏng kơtiê, kŏng nhân pêi cheăng kong pơlê Yên Bái. Teăng mâ khu kăn pêi cheăng, pôa Nguyễn Hòa Bình mơnhên tối khât mâu tơdroăng hiăng pei pro klêi ki kong pơlê Yên Bãi pêi klêi tung hơnăm kố nah, ƀă hên tơdroăng pơkâ ‘na mơnhông cheăng kâ rêh ối pơlê pơla châ ƀă tơkâ luâ túa pơkâ mơ’no, malối cho tơdroăng pơkâ kơdroh kơtiê.

Tơdrêng amê hlối pơkâ thế kong pơlê kal hriăn ngăn, po rơdâ mâu túa pêi ki tro ‘ló, malối cho mâu túa pơkâ kơdroh kơtiê tơƀrê vâ mâu rơpŏng kơtiê, vâ chê kơtiê rế hía rế châ ‘nâi xúa ƀă mơdêk tơdroăng rêh ối, mơ-eăm xêh vâ hluăn ing kơtiê krá ton. Ngế xiâm pơkuâ hngêi tơleăng xiâm xuân tối loi tơngah ƀă khŏm mơ-eăm, rơhêng vâ mơnhông, tung la ngiâ ah, kong pơlê Yên Bái kô pơtối pêi pro châ hên mâu tơdroăng ki kal, tơxâng cho kong pơlê mơnhông mơdêk “Ngiât o tâi tâng – khôi túa lĕm tro – hơniâp ro” tiô pơkâ Hneăng hôp Đảng ƀô̆ kong pơlê rôh má 19 pơkâ mơ’no.