VOV4.Xơ Đăng - Maluâ athế trâm ƀă tơdroăng xơpá, rơ-iêo, la hơnăm ối nếo mố đô̆i gak tơkăng kong ƀă ivá mơ-eăm, rơkê, hiâm mơno khên tơnôu hiăng djâ troăng ahdrối tung mâu tơdroăng cheăng. Vâi châ pơtih môi tiah mâu hơlŏng ki eăng bâ tung mâu rôh trâm xơpá vâ mơjiâng tíu tơkăng kong rế hía rế kro mơdrŏng lĕm. Pin rơtế pro hmâ ƀă 1 ngế rơtăm mố đô̆i gak tơkăng kong nếo châ khê̆n kơdeăn ngế ki hơnăm ối nếo rơkê ƀă ngế hơnăm ối nếo loi tơngah tung tâi tâng khu lêng hơnăm 2021, mê cho thiê̆u tă Trần Minh Cường, Chính trị viên Đông mố đô̆i gâk tơkăng kong bo cheăng Cửa Việt, mố đô̆i gâk tơkăng kong Quảng Trị.

Tung 10 ngế hơnăm ối nếo kơhnâ rơkê mô đô̆i gak tơkăng kong hơnăm 2021, Thiê̆u tă Trần Minh Cường, Cheăng kal kí Đông mô đô̆i gak tơkăng kong Quảng Trị cho ngế ki pôu râng hnoăng pơkuâ hnê mơhno, pơkuâ đông, xua mê tơdroăng châ tơƀrê xuân phá krê tơ-ê.

Mơgêi Hok viê̆n Mô đô̆i gak tơkăng kong châ thưh khoa rơkê má môi, châ hngêi trung rah pro thái hnê laga ƀă tơdroăng pói vâ ƀă tuăn pâ vâ pleăng hơnăm ối nếo a kơpong tơkăng kong dêi Tơnêi têa, Cường hiăng mot pêi cheăng a Mô đô̆i gak tơkăng kong Quảng Trị. Hnoăng cheăng châ pơcháu, ki má môi a ngế lêng hơnăm ối nếo cho châ chăn krá chân, ƀeăn ƀĕng, ƀă ivá tơpui rơkê.

Ngoh pơtối chiâng hơdruê xuâng, tơ’noăng ivá xua mê hiăng tơrŭm ƀă khu râ kăn pơkuâ cheăm, tơkŭm po hên tơdroăng ki pơxúa, mơhnhôk kơdrâm đoân viên veăng, tro ƀă rơkong tơpui tối ‘’Kăn ƀô̆ ki lâi, tơdroăng cheăng ki mê’’. Ngoh hiăng tơbleăng ăm khu râ kăn pơkuâ cheăng Đảng, hnê mơhno đông tơkŭm po châ tơƀrê hên troăng pêi, tơdroăng pêi, roh mơhnhôk môi tiah: ‘’Mô đô̆i gâk tơkăng kong tơdjuôm ivá mơjiâng thôn pơlê nếo’’; ‘’Kum o troh a hngêi trung, Kuăn păn Mô đô̆i gak tơkăng kong’’, ‘’Kŏng tơ tơkăng kong’’; Chôu hriâm tơkăng kong’’; Thái pơkeăng krâ kơlŏng ngiât’’ ƀă hía hé.

Thiê̆u tă Trần Minh Cường, Cheăng kal kí, Đông mô đô̆i gak tơkăng kong tíu tê mơdró ngi kong têa ê Cửa Việt

Ƀă mâu tơdroăng châ tơƀrê, rơkê tung pêi cheăng, ngoh hiăng châ Khu xiâm pơkuâ Mô đô̆i gak tơkăng kong rah xo pro Kăn pơkuâ hnê ngăn cheăng Đảng ủy – Cheăng kal kí Đông mô đô̆i gak tơkăng kong Tíu tê mơdró ngi kong têa ê Cửa Việt drêng nếo 29 hơnăm.

Hơnăm 2021 cho hơnăm chêh tơbâ hên tơdroăng phiu ro dêi Thiê̆u tă Trần Minh Cường drêng Đông Mô đô̆i gâk tơkăng kong tíu tê mơdró ngi kong têa ê Cửa Việt châ inâi Đông khŏm ƀlêi trâng ƀă châ Khu xiâm pơkuâ lêng diâp ƀâng kheăn kơdeăn tung tơdroăng hbrâ, mơdât pơreăng COVID-19; Vi ƀan kong pơlê Quảng Trị diâp mâu Ƀâng kheăn kơdeăn xua châ tơƀrê tung tơdroăng pêi cheăng tung 5 hơnăm pêi pro Pơkâ kơxô̆ 05 dêi Khu xiâm kal kí ‘na thăm mơnhông tơdroăng hriâm tâp ƀă pêi tiô troăng tơdjâ hiâm mơno Hồ Chí Minh, hneăng hơnăm 2016 – 2021 ƀă pêi pro Tơdroăng tơkêa bro ‘’Thăm tơbleăng, hnê hriâm luât ăm kăn ƀô̆, kuăn pơlê kơpong tơkăng kong, rơlố hneăng hơnăm 2017 – 2021’’.

Mô đô̆i gak tơkăng kong Quảng Trị tơdah inâi Um méa hơnăm ối nếo ki kơhnâ rơkê tâi tâng khu lêng hơnăm 2021

Pakĭng mê, đông châ Vi ƀan kong pơlê Quảng Trị diâp Ƀâng kheăn kơdeăn ôh tá tối hdrối tung tơdroăng tŏng kum, tŏng xo mâu ngế tung tuk Vietship 01 ƀă hía hé. Ôh tá xâu rơ-iô, hbrâ tŏng kum kuăn pơlê drêng trâm pá, thiê̆u tă Cường hiăng veăng ƀă hnê mơhno đông kơbông krếo 1.845 roh tuk ví, tăng tíu ối tơniăn hluăn kong mêi khía mơhot; tŏng kum, tŏng xo 8 toăng plong, tuk, 61 ngế tung plong tuk, 18 Tôh pơkuâ gak kring xêh, ing mê, hiăng tối tơbleăng hrĭng tơdroăng ki kơnâ tơdjâk troh tơdroăng hnoăng pơkuâ tê kơxĭ, rơlố, gak kring, tơniăn pơlê pơla tung kong pơlê, tơrŭm ƀă đông lêng teăm tơdrêng pơxâu phâk tiô pơkâ.

Pơreăng COVID-19 xông tâ tú, Đông mô đô̆i gâk tơkăng kong Cửa Việt pơtối rak ‘’Tơdroăng nếo ai rĕng hbrâ, mơdât pơreăng COVID-19’’ tung loa rơ’jíu dêi cheăm. Thiê̆u tă Trần Minh Cường pơtối rah chêh tơdroăng xiâm tơdroăng nếo ai xuân môi tiah chêh tơbleăng tung mơ-éa, chêh tối xing xoăng ăm kuăn pơlê, pơtâng tối troh kuăn pơlê. Ƀă tơdroăng hnê mơhno dêi ngoh, klêi kơ’nâi mơhnhôk tơdroăng ‘’Tâi tâng kuăn pơlê veăng hbrâ, mơdât pơreăng COVID-19 ƀă mot lo ing kong têa ê ôh tá tro luât’’ a kơpong tơkăng kong, kăn ƀô̆ đông hiăng tơkŭm po ăm 3.040 rơpŏng a 3 cheăm, pơlê kân/18 thôn, kơpong kơphô̆ tung tíu pơkuâ tơkêa hbrâ, mơdât pơreăng COVID-19.

Ƀă mâu tơdroăng tơrŭm, ngoh hiăng kơbông krếo, mơhnhôk mâu khu pú hên, ngế krê tŏng kum tơmeăm khăm pơlât, tơmeăm kal xúa rêm hâi ăm khu hbrâ mơdât pơreăng, mâu vâi o hok tro ƀă rơpŏng ai hnoăng ai tơdroăng rêh ối pá puât.

Kô chiâng vâ tối, um méa mơngế đoân viên rơtăm Mô đô̆i gâk tơkăng kong rơxông nếo kơhnâ rơkê hiăng troh lâp lu ki ó rơdêi tơdroăng rêh ối lĕm, hiâm mơhno hbrâ khên tơnôu pêi cheăng kum pơlê pơla ƀă tơdroăng khŏm mơ-eăm tơkâ hluâ pá puât, pơloăng mơnúa, kêi đeăng rêm hnoăng cheăng châ pơcháu.

Thu Hòa – VOV4 chêh

A Sa Ly tơplôu ƀă tơbleăng