VOV4.Xơ Đăng - Hlo ôh tá tơniăn ‘na tơdroăng ki ai mâu tíu tê ‘ngré têa châu têa kơxăng klĭng péa, ôh tá tê xếo, tơdjâk troh troh cheăng kâ, rêh ối dêi kuăn pơlê a mâu kong pơlê, Ngế pro xiâm hnê ngăn Chin phuh ai pơtroh hlá mơ-éa pơkâ thế mâu Khu xiâm, kơvâ cheăng, kong pơlê pêi pro tơdrêng, kơtăng mâu tơdroăng ki pơkâ thế dêi kăn pơkuâ Chin phuh, tung mê pơcháu ăm Khu xiâm ngăn cheăng kơmăi kơmok ƀă tê mơdró pơkuâ, tơrŭm ƀă mâu Khu xiâm, kơvâ cheăng ki ai tơdjâk hbrâ rơnáu, pêi pro kơtăng tung hnoăng cheăng séa ngăn pro tơdâng tơ’mô tơdroăng ki tê ăm kơchơ têa châu têa kơxăng tiô tơdroăng pơkuâ ƀă mâu kơvâ cheăng ki ai tơdjâk troh.

Hnoăng cheăng châ pơcháu, rak tơniăn pôi tá ăm ôh tá ai têa châu tê ăm pa kong kơchơ tung tơnêi; tơkŭm khu ki ai tơdjâk séa ngăn mâu tíu ki tê tung tơnêi têa, mâu tíu tê têa châu têa kơxăng tung lâp tơnêi têa vâ teăm châ hlo ƀă pơkâ tơleăng kơtăng tơdrăng tiô pơkâ dêi luât ƀă mâu tơdroăng ki pro xôi ‘na gô̆m têa châu vâ pro pơxúa ăm dêi tơná ƀă mâu tơdroăng pro xôi ki ê tâng ai tung tơdroăng cheăng tê mơdró têa châu têa kơxăng.

Vi ƀan hnê ngăn mâu kong pơlê, pơlê kong kân ối tung tơnêi têa séa ngăn kơtăng tơdroăng ki tê têa châu têa kơxăng dêi mâu tíu tê ‘ngré tung kong pơlê, rak tơniăn pôi tá ăm tro pơtê ƀă hên ki ê.

Katarina Nga tơplôu ƀă tơbleăng