Pôa Phạm Minh Chính, Ngế pro xiâm hnê ngăn Chin phuh pơtroh kơthô ‘na rak tơniăn drô troăng prôk tung rôh Têt Dương lịch, Têt Lo hơnăm nếo Qúy Mão ƀă leh mơdĭng rơnó Hơngui 2023. Kơthô chêh pơtroh mê ai tối nhên: Vâ tơniăn ‘na troăng prôk tung mâu hâi mơ’nui khế dêi hơnăm 2022, kum kuăn pơlê tơdah Têt Dương lịch, Têt Lo hơnăm nếo Qúy Mão ƀă Leh mơdĭng rơnó hơngui hơnăm 2023.

Ngế pro xiâm hnê ngăn Chin phuh pơkâ thế Vi ƀan ngăn tơniăn troăng prôk Tơnêi têa, mâu khu xiâm, kơvâ cheăng, Khu tơrŭm cheăng kal kí -rêh ối pơlê pơla ƀă Vi ƀan hnê ngăn kong pơlê, pơlê kong kân dêi râ xiâm ngăn a hnoăng cheăng pêi, tơdroăng pêi pro, hnê mơhno ƀă tơkŭm pêi 8 tơdroăng cheăng, troăng rơhlâ vâ mơdêk tơdroăng hnê tối, mơhnhôk kuăn pơlê ƀă mơngế ki prôk drô troăng thế ‘nâi rak tro luât vâ tơniăn troăng prôk, kơdroh kơxô̆ mơngế trâm xía vâ drô troăng prôk, kơdrom chôm, hâ ho troăng prôk, malối mâu troăng kân xiâm, mâu kơpong tơkŭm po leh, mơdĭng; mơdêk séa ngăn tí tăng ngăn, tơleăng mơnhên mâu ngế ki pro xôi luât troăng prôk, mơdêk ivá cheăng, pêi cheăng tơƀrê ‘na rơxế chơ tơmối, ai tiô púi vâ prôk lăm dêi kuăn pơlê ƀă hiá hé.