Tiô pơkâ, troăng kân Tân Phú – Bảo Lộc ai tâi tâng ki xŏn dâng 66km. Túa pơkâ tơdroăng tơkêa châ ‘no liăn bro troăng kân tiô pơkâ troăng kân tơdrăng kơchuâ chêh 80km/h, ƀă 4 to troăng rơxế ô tô. Tâi tâng kơlo liăn ‘no ăm tơdroăng tơkêa bro kố hneăng hơnăm ai 17.200 rơtal liăn. Vi ƀan hnê ngăn kong pơlê Lâm Đồng cho kơ koan ki ai hnoăng pơkuâ ƀă tơrŭm inâi mâu khu ‘no liăn cheăng. Ngế pro xiâm hnê ngăn tơnêi têa pơkâ thế mâu kong pơlê ƀă mâu khu xiâm, kơvâ cheăng ki ai tơdjâk troh tơrŭm krá tơniăn tung pơla tơbleăng pêi pro tơdroăng tơkêa.

Ki xiâm dêi tơdroăng tơkêa kố cho vâ rế hía rế châ mơjiâng bro hngêi trăng, troăng klông tơdâng tơ’mô, mơdêk tơdroăng ki tơdjêp, ‘nâng ‘nâi chôu phut tơdjêp mâu kong pơlê Tây Nguyên ƀă kơpong cheăng kâ xiâm peăng Hdroh ƀă mâu tíu xiâm cheăng kâ, rêh ối pơlê pơla, kơmăi kơmok drô troăng kân 20; Tơdrêng amê, hlối pro ivá mơnhông xiâm ‘na cheăng kâ rêh ối, mơdêk ôm hyô dêi kong pơlê Lâm Đồng tối krê ƀă kơpong Tây Nguyên. Tơdroăng tơkêa kố tiô tối hdrối kô klêi ƀă ăm xúa a hơnăm 2026.