VOV4.Xơ Đăng -  Tung pơla Têt Lo hơnăm nếo Nhâm Dần 2022 hiăng vâ chê troh. Vâ kuăn pơlê ki lâi xuân châ kâ Tết ƀă  “ôh tá lôi ngế ki lâi tro lôi pá rŏng’’, hên tơdroăng pêi pro tơmâng kum Têt ăm mơngế kơtiê, kuăn pơlê hdroâng kuăn ngo ki kơtiê xơpá dế pêi pro kum kuăn pơlê tung lâp tơnêi têa. Mâu tơmeăm xúa rơnó Hơngui tơtô kum kuăn pơlê tơtô tung hiâm mơno tơdah hơnăm nếo.

Nah cho tíu pơreăng xông tâ tú ó má môi a kong pơlê Dak Lak a mơ’nui khế 7/2021 ƀă 51 ngế F0, ƀuôn Ea Bhok, cheăm Ea Bhok, tơring Čư Kuin hiăng tơkâ hluâ mâu hâi tô tuăn. Kơnôm tơdoăng veăng kum teăm tơdrêng dêi kơvâ khăm pơlât ƀă mâu kơvâ, mâu khu râ kăn ƀă khu râ kăn pơkuâ, kuăn pơlê tung pơlê hiăng tơkâ hluâ mâu tơdroăng pá puât mê, vêh ƀă tơdroăng rêh ối tiah hmâ rêm hâi. Pôa Nguyễn Văn Dũng, Kăn hnê ngăn Vi ƀan kuăn pơlê cheăm Ea Bhok tối ăm ‘nâi, tung pơla pơlê tro kâng kơxái mơdât ôh tá ăm mot lo pakong, khu râ kăn pơkuâ cheăm xuân kơbông krếo mâu khu ki tŏng kum kuăn pơlê diâp tơmeăm ki kal xúa rêm hâi, tơmeăm kâ ăm mâu rơpŏng kơtiê, rơpŏng tro tơdjâk xua pơreăng COVID-19 vâ vâi rĕng tơniăn tơdroăng rêh ối. Mâu troăng hơlâ tŏng kum xuân môi tiah châ cheăm pêi pro teăm tơdrêng:

‘’Cheăm xuân hiăng tơbleăng pâ Khu râ kăn pơkuâ cheăng Đảng tơring, Vi ƀan tŏng kum rêm ngế tro pơreăng chiâng F0 tiah mê cho 10 kilô phái, F1 mê cheăm tŏng kum cho 5 kilô. Mâu ngế pêi cheăng hmâng vâ vêh a pơlê mê cheăm dế pêi pro Pơkâ 68 vâ tŏng kum ăm kuăn pơlê teăm tơdrêng vâ ai kơxô̆ liăn vâ kuăn pơlê pơtối pêi kâ a pơlê ƀă pơtối pơtâng tối ăm kuăn pơlê ôh tá tơngôu, pêi pro tơtro pơchân tối 5K dêi Khu xiâm ngăn pơkeăng ƀă khăm pơlât’’.

Ôh tá krê to a ƀuôn Ea Bhok, a tâi tâng mâu pơlê, kơtâu, pơlê dêi mơngế hdroâng kuăn ngo tro tơdjâk pơreăng COVID-19 pơrá châ tŏng tơmeăm kâ, kế kâ, pơkeăng ƀă hía hé.

Têt Lo hơnăm nếo Nhâm Dần hiăng vâ chê troh, Đảng, Chin phuh, Vi ƀan xiâm Măt trâ̆n Tơnêi têa Việt Nam dế hnê mơhno mâu khu xiâm, kơvâ cheăng, mâu kong pơlê rĕng séa ngăn, ‘nâi tơdroăng rêh ối dêi mâu ngế ai troăng hơlâ tŏng kum, kuăn pơlê hdroâng kuăn ngo ai tơdroăng rêh ối pá puât, tro tơdjâk xua pơreăng COVID-19, tro lŭp xua kong prâi pro, pơreăng, tơ’lêi kơklêa drêng tá hâi troh rơnó pôe xo báu… vâ teăm tơdrêng tŏng kum phái, tơmeăm kâ ƀă diâp kơxuô tơmeăm, rak tơniăn hngêi ki lâi xuân ai Têt phâi hơtôu.

Pôa Ta Rương Lương, Kăn phŏ hnê ngăn Vi ƀan cheăm Hương Hữu, tơring Nam Đông, kong pơlê Thừa Thiên Huế tối ăm ‘nâi, mâu hâi achê Têt hên khu pú hên, ngế krê ai tuăn hiâm mơno lăm tŏng kum troh lăm pôu, diâp kơxuô tơmeăm Têt ăm vâi krâ hdroâng kuăn ngo Cơ Tu tung cheăm:

‘’Tơdroăng rak ngăn ăm rơpŏng ai troăng hơlâ tŏng kum, rơpŏng kơtiê, ki rơhêng vâ tối cho rơpŏng vâi krâ hdroâng kuăn ngo trâm pá puât tung roh Têt kố, pakĭng dêi Ƀơrô pêi cheăng mê Vi ƀan kuăn pơlê tơring ai mâu kơxuô tơmeăm krê, klêi mê cho Chin phuh ai kơxuô tơmeăm krê vâ diâp ăm rơpŏng kơtiê, rơpŏng pá puât’’.

Vâ rak tơniăn ăm kuăn pơlê kơbố xuân ai Têt phiu ro, rơtế ƀă kơxuô tơmeăm dêi Kăn xiâm hnê ngăn tơnêi têa ƀă dêi kong pơlê Thừa Thiên Huế, Vi ƀan tơring Nam Đông xuân hbrâ lối 4,5 tâ̆n phái ƀă 200 kơxuô tơmeăm, rêm kơxuô 500 rơpâu liăn diâp ăm rơpŏng pá puât. Pôa Nguyễn Thanh Bình, Kăn phŏ hnê ngăn Vi ƀan kong pơlê Thừa Thiên Huế tối ăm ‘nâi: Kong pơlê tơmâng tŏng kum mâu ngế ai troăng hơlâ tŏng kum, mơngế kơtiê ƀă mơngế hdroâng kuăn ngo vâ kuăn pơlê bố bố xuân châ kâ têt hơtô, phiu ro.

‘’Tung pơla pơreăng xông tâ tú ó, mâu rơpŏng ai troăng hơlâ tŏng kum, rơpŏng kơtiê ƀă mâu vâi krâ hdroâng kuăn ngo trâm hên pá puât ‘na tơmeăm ki kal xúa rêm hâi. Ngin xuân hiăng tơmâng tŏng kum teăm tơdrêng ăm kuăn pơlê tung roh Têt kố. Pakĭng mê, kong pơlê xuân hiăng thăm séa ngăn mâu rơpŏng kơtiê, rơpŏng ai troăng hơlâ tŏng kum, rơpŏng hdroâng kuăn ngo a A Lưới ƀă Nam Đông ƀă pơcháu hnoăng cheăng ăm Vi ƀan tơring A Lưới ƀă Nam Đông teăm tơdrêng tŏng kum vâ kuăn pơlê tơdah Têt hơtôu, tŭm’’.

Roh Têt kố, lối 53 rơpâu rơpŏng kuăn pơlê hdroâng kuăn ngo a 5 tơring kong ngo ƀă 8 cheăm dêi mâu tơring tơbăng kong pơlê Quảng Ngãi châ tơdah kơxuô tơmeăm Têt. Rêm kơxuô kơnâ 180 rơpâu liăn tung mê ai têa măm, têa rơmâ, ƀôt ngŏt ƀă hía hé. Kố cho troăng hơlâ tŏng kum mâu tơmeăm ki kal xúa rêm hâi ăm mơngế hdroâng kuăn ngo tung roh Têt Lo hơnăm nếo Nhâm Dần 2022. Pôa Nguyễn Thế Nhân, Kăn phŏ pơkuâ hdroâng mơngế kong pơlê Quảng Ngãi tối ăm ‘nâi, rêm roh Têt troh rơnó Hơngui vêh, rơtế ƀă mâu kơxuô tơmeăm ing troăng hơlâ kố, mâu tơring, cheăm ối tơdjuôm ivá djâ Têt hơtô troh ƀă kuăn pơlê hdroâng kuăn ngo ƀă mơngế kơtiê kơpong kong ngo.

‘’Pakĭng troăng hơlâ kố, Vi ƀan Măt trâ̆n tơnêi têa Việt Nam xuân hiăng kơbông krếo tŏng kum tơdjuôm tâi tâng mâu rơpŏng kơtiê tung kong pơlê. Kơbông krếo pơlê pơla tơdjuôm ivá tŏng kum kơxuô tơmeăm Têt ăm vâi krâ hdroâng kuăn ngo ƀă rơpŏng kơtiê, vâ chê kơtiê.

Pôa Hầu A Lềnh, Ngế xiâm, Kăn pơkuâ Vi ƀan hdroâng mơngế tối ăm ‘nâi, roh Têt Nhâm Dần hơnăm 2022 gá phá tơ-ê tâ tâng pơchông ƀă mâu hơnăm hdrối, xua hên rơpŏng kơtiê, tơ’nôm tơdjâk kân ing pơreăng COVID-19 thăm rế pá puât tâ. Tơ’nôm amê, hơnăm kố xuân cho hơnăm pơkâ rơpŏng kơtiê nếo, xua mê kơxô̆ rơpŏng kơtiê xuân hên tâ.

‘’Tơdroăng lăm pôu, diâp kơxuô tơmeăm ăm kuăn pơlê klăng roh Têt hơnăm kố cho tơdroăng pêi ki  kơnâ vâ mơhnhôk, veăng kum tung tơdroăng pá puât ƀă tŏng kum ăm kuăn pơlê châ kâ Têt phiu ro, hơtô tiô tro tơdroăng hnê mơhno dêi Đảng, Chin phuh cho ăm tâi tâng kuăn pơlê kơbố xuân ai tơmeăm vâ kâ Têt’’.

Drêng kố, hên ngế pêi cheăng, hên rơpŏng hdroâng kuăn ngo a kong ngo, kơpong hơngế hơngo dế tô tuăn cho pro ti lâi vâ châ kâ Têt hơtô tung pơla ai hên tơdroăng pá puât dêi pơreăng. Pôa Lê Văn Thanh, Ngế xiâm phŏ pơkuâ cheăng pêi – Mô đô̆i rong ƀă pơlê pơla tối ăm ‘nâi:

‘’Khu xiâm pơkuâ cheăng pêi – Mô đô̆i rong ƀă pơlê pơla rơtế ƀă Vi ƀan xiâm Mât trâ̆n Tơnêi têa Việt Nam hiăng tơrŭm Kơxô̆ liăn kum mơngế kơtiê rơtế ƀă mâu kơxô̆ liăn pơlê pơla ki phá tơ-ê, pro ti lâi rêm ngế kuăn pơlê pơrá ai kơxuô tơmeăm, mơhé ôh tá tŭm ăm tâi tâng, laga kô mơ-eăm tâi ivá. Pakĭng mê, Khu xiâm xuân hiăng pơkâ mâu kong pơlê tơmâng rak ngăn ăm tâi tâng kuăn pơlê tung kong pơlê dêi tơná pơrá ai Têt, ôh tá lôi kơbố parŏng ƀă mơhnhôk ing hên kơxô̆ liăn phá tơ-ê dêi pó.

Ki rơhêng vâ tối tơmâng troh ƀă rêm ngế kơtiê ƀă mơngế kơtiê, tŏng kum pơlê pơla, mâu ngế ki kố cho mâu ngế ki ôh tá ai ivá vâ rôe tơmeăm vâ vâi ai Têt ƀă kum rêm ngế châ kâ têt phiu ro’’.

Ƀă tơdroăng tơmâng tŏng kum dêi Đảng, Chin phuh, Khu xiâm pơkuâ Măt trâ̆n Tơnêi têa Việt Nam ƀă mâu khu xiâm, kơvâ cheăng hnê mơhno mâu kong pơlê, pơlê kong kơdrâm tơmâng pêi pro tơtro mâu troăng hơlâ kum rêh ối pơlê pơla ƀă tơdroăng pơxúa ăm pơlê pơla, rak ngăn tơdroăng rêh ối kuăn pơlê, ki rơhêng vâ tối cho rơpŏng ai troăng hơlâ tŏng kum, mơngế ai tơdroăng rêh ối pá puât, tro tơdjâk xua pơreăng COVID-19.

Ing mê, kum kuăn pơlê mâu hdroâng kuăn ngo tối krê ƀă kuăn pơlê lâp tơnêi têa tối tơdjuôm châ tơdah Têt Lo hơnăm nếo Nhâm Dần 2022 hơtô, tơniăn; vâ rêm ngế, rêm hngêi pơrá ai Têt.

VOV4 chêh

A Sa Ly tơplôu ƀă tơbleăng