Kŏng ti On tơhrik Dak Nông nếo bro klêi kum 7 toăng hngêi diâp ăm 7 rơpŏng kơtiê a kong pơlê.  Tâi tâng kơxô̆ liăn ‘no kum ai 350 rơtuh, xo ing kơxô̆ liăn ki pro pơxúa tŏng kum dêi Kŏng ti xiâm On tơhrik peăng tơdế Tơnêi têa ƀă PC Dak Nông. Rơtế ƀă tơdroăng ki tŏng kum bro hngêi ối, Kŏng ti ối toi on tơhrik ƀă roê kế tơmeăm tơdiêp ăm rơpŏng, môi tiah: tơvi, hdro pế hmê, kế pêi hyôh ƀă hên ki ê.

Tiô châ ‘nâi tung pơla hdrối nah, Kŏng ti On tơhrik Dak Nông hiăng pêi pro mâu tơdroăng tŏng kum ‘na rêh ối pơlê pơla, tơmiât troh tơdroăng pơlê pơla. Krê tung 5 hơnăm a chê kố, Kŏng ti hiăng kum bro 21 toăng hngêi tơrŭm; rơnêu mâu on kế tơmeăm on tơhrik, pơ’lêh troăng kơxái ‘na rŏng công-tơ kum rơpŏng kơtiê, rơpŏng ai troăng hơlâ ing tơnêi têa tŏng kum; diâp mâu kế tơmeăm xúa ‘na on tơhrik ăm mâu hngei trung hriâm; krâ ‘măn pul on ki bâ eăng a mâu troăng thôn pơlê ƀă hên ki ê ƀă tai tâng kơxô̆ liăn ‘no lối 3,4 rơtal liăn.