Pêi pro tơdroăng pơ’lêh pêi cheăng xúa kŏng ngê̆, troh nôkố, Kŏng ti on tơhrik Dak Lak hiăng kêi đeăng tơdjêp mâu mơ-éa ƀă khu râ kăn pơkuâ, xúa chư kĭ tung kơmăi ƀă mơ-éa mơnhên tung kơmăi ăm tâi tâng kăn ƀô̆ kŏng nhân viên. Kơmăi kơmok hôp mơ’no tơdrêng tung um tiô troăng hyôh măng, pêi cheăng ing hơngế châ pêi pro troh tâi tâng mâu tíu pêi cheăng ki tơdjâk. 100% mơdró on tơhrik châ mơdró ing troăng măng mơ’no tơdrêng râ 4.

100% hô sơ tơdroăng cheăng tung kơvâ tê mơdró ƀă tơdroăng cheăng tơdah kuăn pơlê châ pêi cheăng tiô troăng măng tiô troăng điê̆n tưh. Mâu tơdroăng pêi cheăng, séa ngăn rêm hneăng tơmeăm troăng kơxái on tơhrik xuân hiăng châ pêi ing kơmăi kơmok. PC Dak Lak hiăng kêi đeăng mơjiâng pro troăng kơxái on tơhrik 110kV tiô pơkâ GIS, rah chêh tơdroăng ing xiâm rêi WebGIS ƀă hía hé.

Ƀă troăng pêi kŏng ngê̆ nếo, Kŏng ti on tơhrik Dak Lak dế pơtối mơdêk tơdroăng pơ’lêh pêi cheăng xúa kŏng ngê̆, pêi pro tơdroăng mơjiâng troăng kơxái on tơhrik rơkê vâ kum tung tơdroăng tơdah kuăn pơlê rêm hâi rế tơtro tâ ƀă tơxâng tiô pơkâ mơnhông mơdêk cheăng kâ – rêh ối pơlê pơla.