Mơ’nui hơnăm 2020 vâ chê 50 rơpŏng kuăn pơlê kơpong Cao Biền, cheăm Phú Thượng, tơring Võ Nhai nếo ai on tơhrik tơnêi têa. Cao Biên xuân cho kơtâo má mơ’nui tung kong pơlê xut tah tơdroăng “ôh tá ai” on tơhrik. Tơdroăng kố hiăng mơnhên tơdroăng châ tơƀrê tơdroăng tơkêa bro hnhâng troăng kơxái on tơhrik thôn pơlê kong pơlê Thái Bình, hneăng hơnăm 2016 – 2020.

Nâ Triệu Thị Sinh, kơtâu Cao Biền, cheăm Phú Thượng, tơring Võ Nhai, tối:

‘’Hdrối nah xúa on tơhrik iâ bu vâ bâ tê ôh tá chiâng xúa kơtuh hngíu. Sap ing ai on tơhrik mê á tâ tơniăn, phiu ro rôe kơtuh hngíu vâ ‘măn tơmeăm kâ”.

Pôa Triệu Phúc Tiến, Kăn pơkuâ kơtâu Cao Biền, cheăm Phú Thượng, tơring Võ Nhai, tối:

“Châ Đảng, Tơnêi têa hnhâng kơxái on tơhrik troh a kơtâu Cao Biền ngin phiu ro ‘nâng. Kố cho tơdroăng pói tơngah to lâi chât hơnăm dêi kuăn pơlê a kố’’.

Ôh tá ai on tơhrik, hên hĭn mâu troăng hơlâ tŏng kum hdroâng kuăn ngo ki phá tơ-ê ki ê xuân hiăng châ kong pơlê Thái Nguyên mơjiâng ƀă pêi pro môi tiah: Troăng hơlâ tŏng kum po i-ốt hbrâ mơdât ŭm kơtuâ a rơnŏng, tuăn ngôa ôh tá tơleăng a vâi hdrêng; Tơdroăng mơnhông mơdêk cheăng kâ, rêh ối pơlê pơla kơpong ATK ƀă kơpong hdroâng kuăn ngo ki pá puât; Tơdroăng tơkêa bro Rak vế, mơnhông mơdêk khôi túa lĕm mâu hdroâng kuăn ngo kong pơlê Thái Nguyên troh hơnăm 2020...

Pôa Lý Văn Mùa, Kăn pơkuâ hnê ngăn Chi ƀô̆ kơtâu Lũng Luông, cheăm Thượng Nung, tơring Võ Nhai, tâ nhên:

“Ing mâu tơdroăng xuân kum vâi krâ kuăn pơlê hluăn ing kơtiê, pro tơ’lêi hlâu kum kuăn pơlê mơnhông cheăng, xuân môi tiah mơjiâng mâu khôi túa lĕm dêi vâi krâ kuăn pơlê tung pơlê’’.

Nếo achê kố, Pơkâ kơxô̆ 39 dêi Vi ƀan kong pơlê Thái Nguyên “Pơkâ kơpong mơjiâng mâu kăn ƀô̆ ăm mâu hdroâng kuăn ngo ối tung khu rah xo mot mâu hngêi trung phôh thong hdroâng kuăn ngo ai tíu kâ koi ối pơtê tung kong pơlê”, xuân cho môi troăng hơlâ ki phá, hiăng teăm tah tơdrêng lôi mâu tơdroăng pá puât drêng pơkâ nếo mâu cheăm, thôn pơlê ối tung rơpŏng pá puât tro pro kơtăn kro - kơtiê.

Pôa Nguyễn Thái Nam, Kăn phŏ pơkuâ Khu pơtâng tối mơhnhôk kuăn pơlê kơvâ cheăng Đảng kong pơlê, Kăn pơkuâ Khu hdroâng kuăn ngo kong pơlê Thái Nguyên, tối ăm ‘nâi:

“Hneăng hôp Đảng ƀô̆ kong pơlê Thái Nguyên ai pơkâ ki kal, mơ-eăm 8% kuăn ‘nĕng hdroâng kuăn ngo châ hriâm tâp a mâu hngêi trung hdroâng kuăn ngo ai tíu kâ koi ối pơtê. Ing pơkâ 39 kơvâ hnê hriâm kong pơlê Thái Nguyên hiăng rah xo tŭm pơkâ rah xo hok tro’’.

Tâng môi tiah hơnăm 2016, kong pơlê Thái Nguyên u ối 48 cheăm ki pá puât mê troh hơnăm 2021, bu u ối 14 cheăm (kơdroh 70%), kơxô̆ rơpŏng kơtiê kơpong hdroâng kuăn ngo ƀă kong ngo kơdroh tơdâng 3% rêm hơnăm. Tâi hơnăm 2021, lâp kong pơlê Thái Nguyên ai 73/100 cheăm kơpong vâi krâ hdroâng kuăn ngo ƀă kong ngo châ plah thôn pơlê nếo, châ 3 xôh tơdâng tơdjuôm lâp tơnêi têa.

Mâu kơxô̆ ki lĕm kố ăm hlo châ tơƀrê ing mâu troăng hơlâ tŏng kum hdroâng kuăn ngo ki phá tơ-ê, pơxúa, ing mâu tơdroăng ki ai khât nôkố, pơkâ troăng hơlâ teăm, tơdrêng a kong pơlê Thái Nguyên.