VOV4.XơĐăng - Kơxo lơ 20/9, a Hà Nội, Khu pơkuâ vâi kơdrâi Việt Nam tơkŭm po Hneăng hôp pêi pro tơdroăng tơkêa bro 8 ‘na ‘’Pêi pro tơdâng tơ’mô pơla kơdrâi ƀă kơnốu ƀă kum mâu tơdroăng kal ƀă vâi kơdrâi ƀă vâi hdrêng’’ hneăng má 1 sap 2021 – 2025. Tơdroăng tơkêa bro ối tung Tơdroăng pơkâ xiâm tơnêi têa mơnhông mơdêk cheăng kâ – rêh ối pơlê pơla kơpong vâi krâ hdroâng kuăn ngo ƀă kong ngo hneăng hơnăm 2021 – 2030.

Tơdroăng tơkêa bro “Pêi pro tơdâng pơla kơnốu ƀă kơdrâi ƀă kum mâu tơdroăng thâ kal ƀă vâi kơdrâi ƀă vâi hdrêng’’ tơtrŏng 4 tơdroăng xiâm veăng mê cho: Pơtâng tối, mơhnhôk pơ’lêh ‘’troăng tơmiât, troăng pêi’’ xut tah lôi tơdroăng tơmiât ki ôh tá tro, pơkâ pêi ôh tá tro tung rơpŏng ƀă pơlê pơla, mâu khôi túa tơdjâk ‘mêi ƀă mâu tơdroăng pơlê pơla thâ kal ƀă vâi kơdrâi ƀă vâi hdrêng; Mơjiâng ƀă po rơdâ mâu troăng pêi mơdêk hnoăng cheăng kâ ăm vâi kơdrâi, thăm pêi pro tơdâng pơla kơdrâi ƀă kơnốu.

Tâi tâng roh hôp

Rak tơniăn rơkong tơpui ƀă tơdroăng ki veăng păng ‘nâng dêi vâi kơdrâi ƀă vâi hdrêng tung mâu tơdroăng mơdêk cheăng kâ – rêh ối pơlê pơla, séa ngăn ƀă tiâ tối pơlê pơla, mơdêk ivá pêi cheăng ăm kăn ƀô̆ vâi kơdrâi hdroâng kuăn ngo. Tơdrêng amê, mơdêk ivá pêi pro tơdrêng ăm kăn ƀô̆ tung khu cheăng kal kí ƀă krâ pơlê, kăn pơkuâ pơlê, ngế ki kuăn pơlê loi tơngah tung pơlê pơla.

Tung hneăng 2021 – 2025 Tơdroăng tơkêa bro 8 châ pơkâ pêi 9 rơpâu Tôh pơtâng tối pơlê pơla; 3.000 phĭu kơdĭng liăn mung thôn pơlê; 1.000 Tíu ki loi tơngah pơlê pơla; 1.800 kâu lăk ƀô̆ ối má môi dêi tơdroăng ki pơ’lêh châ thăm pêi pro kơtăng/lơ mơjiâng nếo a pơlê pơla ƀă hía hé.

A Sa Ly tơplôu ƀă tơbleăng