VOV4.Xơ Đăng - Pôa Nguyễn Đức Hải, Kăn xiâm phŏ hnê ngăn Kuô̆k hô̆i nếo ai roh lăm pôu, rơkâu Têt a Gia Lai. Pêi cheăng ƀă Vi ƀan kong pơlê ƀă Khu râ kăn teăng mâ Kuô̆k hô̆i kong pơlê Gia Lai, pôa Nguyễn Đức Hải mơnhên ƀă kheăn kơdeăn mâu tơdroăng châ tơƀrê tung rêm tơdroăng cheăng dêi kong pơlê Gia Lai châ tơƀrê tung hơnăm hiăng hluâ. Mơhé pơreăng COVID-19 xông tâ tú ó, laga tung hơnăm 2021, tơdroăng xo hnoăng liăn mơ’no liăn ngân a kong pơlê Gia Lai châ tơƀrê.

Pôa Nguyễn Đức Hải, Kăn xiâm phŏ hnê ngăn Kuô̆k hô̆i diâp kơxuô tơmeăm khoăng ăm kŏng nhân

Kong pơlê hiăng mơ’no lối 28 rơtal liăn vâ tŏng kum Têt ăm mâu ngế ai hnoăng tơnêi têa, mâu rơpŏng kơtiê ƀă mâu tơdroăng tŏng kum Têt. Xêo troh hâi lơ 20/1/2022, lâp kong pơlê hiăng tơkŭm po lăm pôu, diâp vâ chê 33.000 kơxuô tơmeăm Têt ăm mơngế ai hnoăng ƀă tơnêi têa ƀă kơxô̆ liăn lối 8 rơtal liăn; diâp vâ chê 62 rơpâu kơxuô tơmeăm Têt ăm mâu ngế ki ê ƀă kơxô̆ liăn vâ chê 24 rơtal liăn.

Pôa Nguyễn Đức Hải phiu ro kong pơlê Gia Lai hiăng pêi krá tơniăn troăng hơlâ dêi Tơnêi têa tơkŭm po Têt tơniăn ƀă kơdĭng; ki rơhêng vâ tối rak ngăn tơtro ăm mâu rơpŏng pá puât, rơpŏng ai hnoăng ƀă kăch măng.

A Sa Ly tơplôu ƀă tơbleăng