Drêng troh Tết lo hơnăm nếo Qúy Mão 2023, kơxo lơ 8/1, a Pơlê kong kân Đà Nẵng, pôa Nguyễn Xuân Phúc, Kăn xiâm hnê ngăn tơnêi têa trâm mâ mâu kăn ƀô̆ ki hiăng pơtê cheăng cho mâu Kăn xiâm dêi mâu kong pơlê kơpon Tơdế tơnêi têa. Teăng mâ Kăn xiâm Đảng, Tơnêi têa, pôa Nguyễn Xuân Phúc pơtroh rơkong kơ êng, rơkâu Têt lĕm ro ăm mâu kăn, mâu vâi pú Kăn xiâm, cho mâu kăn pơkuâ hnê ngăn hneăng hdrối nah dêi kơpong tơdế tơnêi têa, kơpong tơnêi ai hên tơdroăng cheăng kăch măng ai hên hnoăng veăng ‘no kăn kĭn tung tơdroăng cheăng mơjiâng ƀă kring vế tơnêi têa.

Kăn xiâm hnê ngăn tơnêi têa ăm ‘nâi, hơnăm hdrối, ing hnoăng pơkuâ hnê mơhno dêi Đảng, hbrâ rơnáu, kơhnâ pêi cheăng, rơtế ƀă tơrŭm krá dêi mâu kơ koan khu cheăng kal kí, lâp tơnêi têa hiăng châ pêi pro hên tơƀrê tung tâi tâng mâu tơdroăng cheăng kâ - rêh ối, tơniăn kring gak tơkăng kong tơnêi têa ƀă tơpui kâ.

Tung mê, cheăng kâ tâk châ 8,02%. Cheăng kâ kân tơniăn, hên tơdâng tơ’mô  châ pro tơniăn. Ƀă troăng rơhlâ ôh tá lôi pá rŏng. tơdroăng cheăng rak tơniăn pơlê pơla châ pro tơniăn tung rêh ối, hiăng kum mâu ngế ki xúa mơngế pêi cheăng ƀă lối 68 rơtuh hdroh ngế pêi cheăng ƀă tâi tâng kơxô̆ liăn lối 104 rơpâu rơtal liăn.