VOV4.Xơ Đăng - Pôa Phạm Minh Chính, Ngế pro xiâm hnê ngăn tơnêi têa nếo ai roh tơpui tơno tơdrêng ƀă mơ’no tơdrêng tung um tiô troăng hyôh măng ƀă lối 4.500 ngế kŏng nhân pêi cheăng a 63 tíu hrik hyôh troăng măng a mâu kong pơlê, pơlê kong kơdrâm, tung lâp tơnêi têa. Xông tơpui a roh tơpui tơno, pôa Phạm Minh Chính mơnhên, Đảng, Tơnêi têa hiăng mơnhên troăng tơmiât pêi hiăng tơbleăng hên troăng pơkâ pêi, troăng hơlâ ki kal, troăng pêi ton xŏn, hnoăng cheăng, tíu cheăng dêi yăi câ̆p kŏng nhân.

Tâi tâng roh tơpui tơno

Ing tơpui tơno, Ngế pro xiâm hnê ngăn Chin phuh pơtối ‘nâi tơdroăng tơmiât, pói vâ, mâu tơdroăng phiu ro xuân môi tiah tơdroăng tô tuăn dêi kŏng nhân, mơngế pêi cheăng; tơdah mâu rơkong pâ thế, ing mê pơtối kêi đeăng troăng hơlâ tŏng kum ƀă Kŏng nhân, mơngế pêi cheăng. Ngế pro xiâm hnê ngăn tơnêi têa pơkâ thế klêi kơ’nâi roh tơpui tơno kố, mâu Khu xiâm, kơvâ cheăng ƀă kong pơlê veăng mơjiâng pơkâ, troăng pêi vâ tơleăng rêm tơdroăng, ai tơmeăm ƀă tơdroăng châ tơƀrê, tơbleăng troh kŏng nhân mơngế pêi cheăng.

A Sa Ly tơplôu ƀă tơbleăng