VOV4.Xơ Đăng - Pôa Phạm Minh Chính, Ngế pro xiâm hnê ngăn tơnêi têa veăng Hneăng hôp thăm mơnhông mơdêk mơjiâng pro hngêi ối pơlê pơla ăm kŏng nhân, mơngế pêi lo liăn iâ. Xông tơpui a hneăng hôp, pôa Phạm Minh Chính, Ngế pro xiâm hnê ngăn Chin phuh tối: môi tung mâu tơdroăng ki tô tuăn kân dêi Đảng, Tơnêi têa cho rak ngăn tơdroăng rêh ối ăm mơngế pêi cheăng, mâu ngế pêi lo liăn iâ ƀă hiăng ai hên tơdroăng pêi ăm mâu ngế ki kố, tung mê, ai rak ngăn ‘na hngêi ối ăm kuăn pơlê.

Pôa Phạm Minh Chính, Ngế pro xiâm hnê ngăn tơnêi têa xông tơpui a hneăng hôp

Tiô Ngế xiâm pơkuâ mơjiâng pro tơmeăm khoăng, pơkâ pêi troh la ngiâ cho mơjiâng hngêi ối pơlê pơla, hngêi ối kŏng nhân pêi lo liăn tơdâng, pêi lo liăn iâ. Pơtối mê, troh hơnăm 2025 kô pêi kêi đeăng mâu tơdroăng tơkêa bro hiăng po rơdâ pêi pro mơ’no liăn mơjiâng 156.700 toăng hngêi ƀă mâu tơdroăng tơkêa bro dế pêi pro mơ-éa mơ’no liăn cheăng ƀă hên 300 rơpâu toăng hngêi; pơtối pơxiâm mơjiâng pro mâu tơdroăng tơkêa bro nếo; Troh hơnăm 2030 kêi đeăng mơ’no liăn mơjiâng 1 rơtuh toăng hngêi ối pơlê pơla, kŏng nhân kơpong hngêi kơmăi kơmok.

A Sa Ly tơplôu ƀă tơbleăng