VOV4.Xơ Đăng - Kơmăng lơ 17/10, a Hà Nội, pôa Phạm Minh Chính, Ngế pro xiâm hnê ngăn tơnêi têa veăng hôp tơpui Tơdroăng “Lâp tơnêi têa rơtế tơdjuôm ivá xua mâu ngế kơtiê” hơnăm 2022, ƀă pơxá “Tơdroăng pêi pro ki  tơngah”. Mê cho tơdroăng pêi pro ai pơxúa kal kí, rêh ối pơlê pơla ƀă rơkê plĕng lĕm vâ pơtối rak vế tơdroăng tơrŭm môi tuăn, ‘nâi kum dêi rơpó dêi kuăn pơlê vâ tơmâng khât tơdroăng kum mâu ngế kơtiê mơ-eăm pêi cheăng vâ hluăn ing kơtiê krá ton.

Tơbleăng a hâi leh, pôa Phạm Minh Chính tối, rơtế tơdjuôm ivá xua mâu ngế kơtiê ôh tá lôi ngế ki lâi pá rŏng” xua Ngế pro xiâm hnê ngăn Chin phuh mơhnhôk pêi pro tung khế “xua mâu ngế kơtiê” hơnăm 2022, ôh tá xê to tơdroăng ki mơhnhôk hnê tối mê ối cho tơdroăng pêi pro mơhno nhên, ai pơxúa.

Pôa Phạm Minh Chính, Ngế pro xiâm hnê ngăn tơnêi têa tơbleăng a tơdroăng “Lâp tơnêi têa  rơtế tơdjuôm ivá xua mơngế kơtiê”

Ngế pro xiâm hnê ngăn tơnêi têa pâ thế ƀă kơbông krếo: Mâu khu xiâm, kơvâ cheăng, kơ koan, kong pơlê pơtối tơbleăng tơdâng, tơƀrê mâu troăng rơhlâ, luât pơkâ ‘na kơdroh kơklêa xăm kơtiê, malối cho 3 tơdroăng pơkâ tơnêi  têa. Tơleăng mơnhên teăm tơdroăng ki tơvâ tơvân nếo ‘nâi. Mơdêk hlê plĕng, rơkê tung pêi cheăng, tăng tơ’nôm cheăng pêi ăm mâu ngế kơtiê.

VOV/Tơplôu: Gương