Tung pơla dế ai tơdroăng ki hơniâp ro lâp tơnêi têa koh tơdah hơnăm nếo 2023 ƀă Rơnó Hơngui Qúy Mão vâ chê troh, pôa Phạm Minh Chính, Ngế pro xiâm hnê ngăn hâk ro ƀă phoih ƀriê veăng troh, pôu, tơpui a hneăng “Têt tơkŭm - Rơnó Hơngui tơrŭm hơnăm 2023” ƀă kŏng nhân, mơngế pêi cheăng a kong pơlê Phú Yên - kopong tơnêi ki lĕm kro tiô hnoăng cheăng kăch măng.

Ngế pro xiâm hnê ngăn vêh mơnhên tối, kố cho tơdroăng cheăng ki ai pơxúa, châ tơƀrê khât ƀă mơngế pêi cheăng drêng Têt troh, rơnó Hơngui vêh xua Kŏng đoân rêm râ tơkŭm po.

Ngế pro xiâm hnê ngăn tối ăm ‘nâi, Kŏng nhân dế nôkố châ dâng 14% pơ’leăng mâ mơngế, 27% mâu ngế pêi cheăng tung pơlê pơla, rêm hơnăm mơjiâng lối 65% ki kơnía git dêi tâi tâng kế tơmeăm pơlê pơla ƀă lối 70% ki kơnía git dêi tâi tâng kế tơmeăm pêi chiâk pêi deăng, ‘na tơdroăng hriâm, ki hlê plĕng ‘na tơdroăng cheăng, ki hloh klê, túa cheăng kơmăi kơmok chal nếo, tuăn mơno rak vế hnoăng cheăng rế hía rế châ ‘mâi mơnhông ƀă tơrŭm ƀă lâp plâi tơnêi.

Kơxô̆ kŏng nhân ki châ hriâm rơkê, thăm mơdêk ki krá toniăn, rơkê plĕng ‘na khoa hok cheăng kơmăi kơmok thăm rế châ mơdêk hên ‘nâng.

Ki rơhêng vâ tối, Ngế pro xiâm hnê ngăn ƀriê phoih tung hiâm mơno tiô tơdroăng ăm ‘nâi, drêng pơreăng kân COVID-19 xông tâ tú, tâi tâng ngoh nâ o kŏng nhân hiăng kơdo mơ-eăm, hơ-ui pâ, tŏng kum tơdroăng ki pá puât dêi khu mơdró kâ, kơhnâ khât rơtế ƀă lâp tơnêi têa hbrâ, tơplâ, mơdât pơreăng. Klêi kơ’nâi tơdroăng rêh ối hiăng tiah hmâ, ngoh nâ o kŏng nhân hiăng pơxiâm pêi mâu tơdroăng cheăng, pêi hnoăng cheăng plâ hâi măng vâ mâu tơmeăm pêi lo ki dó inâi “Made in Vietnam” châ mơ’no tê lâp lu tung tơnêi têa ƀă kong têa ê.

“Á loi tơngah tiah kố, tơdroăng ki hơniâp ro, sôk suâ mê kô tiô chêng ngoh nâ o kŏng nhân, mơngế pêi cheăng vêh dêi ƀă rơpŏng hngêi, vêh troh a mâu pơlê cheăm vâ rơtế ai môi rơnó Têt ki hơniâp ro, sôk suâ ƀă hơniâp lĕm. Ƀă mâu ngế ki ôh tá ai xêh kế tơmeăm vêh a pơlê xuân châ tơdah Têt ki hơniâp ro, tŭm têk, vâ tâi tâng pơrá ai Têt ki hơniâp ro, sôk suâ, ôh tá ai kơbố ki tro lôi pá rŏng”.

Ngế pro xiâm hnê ngăn tối nhên, Têt Lo hơnăm nếo dêi hdroâng mơngế ga ai pơxúa kân khât tung hiâm mơno, cho roh ki vâ rêm ngế kuăn cháu dêi tơnêi têa Việt Nam prếo vêh dêi pơlê xiâm tơná, chôu tơbâ nôu pâ, jâ pôa, hdroâng hdrê, châ tơkŭm hôp, rơtế tơkŭm ƀă dêi rơpŏng hngêi, mơjiâng tơdroăng ki hơniâp ro, ai tơ’nôm ivá ki kơhnâ khât vâ mot troh tung hơnăm nếo ai hên tơdroăng loi tơngah, pói rơhêng vâ, prôk troh a mâu tơdroăng ki lĕm tro tâ.

Tơdroăng ki kum tơmeăm Têt cho ai pơxúa tơtro tiô tuăn mơno dêi hdroâng mơngế, mơhno tối tơdroăng tơrŭm cheăng, tŏng kum dêi pó dêi tâi hdroâng mơngế.

Ngế pro xiâm hnê ngăn hlê klê nhên, hơ-ui pâ, mơhnhôk trâu rơdâ ƀă mâu tơdroăng ki pá puih, tơvâ tơvân dêi kŏng nhân ƀă mơngế pêi cheăng tung mâu khế hơnăm pơla hdrối mê hía nah. Tung la ngiâ. Chin phuh kô pêi pro ó rơdêi tâ nếo tung hnê mơhno rêm khu râ, kơvâ cheăng, kong pơlê, pơlê kong kân tŏng kum, hbrâ rơnáu kuăn mơngế ki tơtrro vâ tah lôi mâu tơdroăng ki tơvâ tơvân vâ ing mê, mơnhông hơ’lêh tơdroăng rêh kâ ối dêi ngoh nâ o kŏng nhân, mơngế pêi cheăng.

Tung mê, tơkŭm pơkâ pêi pro ó rơdêi Tơdroăng tơkêa pêi mơjiâng 1 rơtuh toăng hngêi ối ăm pơlê pơla; tơdrêng amê, thâ ai troăng hơlâ ki nhên, tơtro khât, ai pơxúa vâ mơnhông mơjiâng hngêi ăm kŏng nhân. Ki xiâm dêi tơdroăng kố cho vâ kum ăm kŏng nhân, mơngế pêi cheăng châ xúa ki păng ‘nâng tơdroăng ki mơdêk dêi tơnêi têa; vâ rêm roh Têt troh, rơnó Hơngui hiăng vêh cho mâu chôu phut ki tơrŭm, ôi tâ tá dêi pó hơniâp ro dêi ngoh nâ o kŏng nhân, mơngế pêi cheăng ƀă rơpŏng hngêi mơjo pâ dêi tơná.

“Kố cho ki xiâm ivá ki vâ mơnhông ó rơdêi vâ klêi kơ’nâi Têt, ngoh nâ o pơtối vêh pêi cheăng tiô tơdroăng ki hơniâp ro nếo, khŏm mơ-eăm pêi pro klêi tơdroăng cheăng, hnoăng cheăng, veăng kum mơnhông mơdró kâ, mơdêk tơnêi têa xua tơdroăng ki vâ kum kuăn pơlê kro, tơnêi têa ó rơdêi, pêi tiô hiâm tuăn kuăn pơlê pói vâ, tơdâng tơ’mô, rơkê plĕng, vâ rêm ngế kuăn pơlê ai tơdroăng rêh ối thăm rế lĕm tro tâ.

Á pâ pơtroh rơkong rơkâu hơnăm nếo ƀă hiâm mơno ki lĕm tơniăn má môi troh tâi tâng ngoh nâ o kŏng nhân, mơngế pêi cheăng tung lâp tơnêi têa. Rơkâu rêm rơpŏng hngêi kŏg nhân, mơngế pêi cheăng ai rơnó Têt phâi tơtô, tơkŭm dêi pó, pêng păm tơdroăng hơniâp ro, mơjo pâ”.

Teăng mâ Khu kăn xiâm pơkuâ hnê ngăn Đảng, Tơnêi têa, Ngế pro xiâm hnê ngăn pơtroh rơkong êng mơhnhôk, ƀă ai rơkong rơkâu hâk hơnăm nếo tơniăn lĕm, phiu ro, kro niân ƀă hnối kơdĕn khĕn, vêh mơnhên tối ƀă rơkâu mâu hnoăng cheăng ki Khu pơkuâ ngăn Đoân, Kŏng nhân pêi cheăng tung lâp tơnêi têa tối tơchoâm, vâi ngoh nâ o kŏng nhân kong pơlê Phú Yên tối krê hiăng châ chiâng pêi pro tung mâu hơnăm hdrối mê hía nah, ing mê, veăng kum kal kân khât troh hnoăng cheăng dêi tơnêi têa.

A roh tơpui tơbleăng ăm pôa Phạm Minh Chính, Ngế pro xiâm hnê ngăn Chin phuh ƀă kăn xiâm pơkuâ tơrŭm pêi cheăng Việt Nam, kong pơlê Phú Yên ƀă Vi ƀan xiâm Măt trâ̆n tơnêi têa Việt Nam hiăng diâp 220 hnoăng tơmeăm Têt ăm đoân viên, kŏng nhân, mơngế pêi cheăng ki rơkê ƀă ai tơdroăng ki xahpá, tâi tâng kơxô̆ liăn tŏng kum mê ai dâng 288 rơtuh liăn.