A rôh trâm mâ kuăn pơlê cheăm Dà Nhim, tơring Lạc Dương (Lâm Đồng) pâ thế troh Khu kăn Kuô̆k hô̆i kong pơlê Lâm Đồng mâu tơdroăng ‘na tơring, kong pơlê ƀă tíu xiâm rĕng tơmâng, séa ngăn tơleăng mơnhên. Tung mê, ai tơdroăng pro troăng kân 27C ki hiăng tơ’nhiê ki đi đo ôh tá chiâng prôk xua tơnêi tơhnâp kơđu, pro hên tíu ki prôk ví rơ-iô ƀă ôh tá tơniăn tung pơla prôk; thâ séa ngăn, pro ăm hlá mơ-éa mơnhên xúa tơnêi ăm kuăn pơlê; tơdroăng tŏng kum dêi kăn ƀô̆ ki ôh tá hmâ pêi hnoăng cheăng dêi cheăm lối iâ.

Teăng mâ Khu kăn Kuô̆k hô̆i Lâm Đồng, pôa Phan Đình Trạc, Ngế pơkuâ khu kăn xiâm tơmâng xo mâu tơdroăng veăng hnê tối pâ thế dêi kuăn pơlê ƀă kố tơkŭm tâi tâng, tối tơbleăng a Kuô̆k hô̆i tung rôh hôp la ngiâ. Tung mê, tối, pâ thế ‘no liăn po rơdâ, ‘mâi pro troăng kân 27C cho tơdroăng pâ thế ki pơxúa khât dêi kuăn pơlê ƀă hlối tơtro ƀă troăng rơhlâ mơnhông mơdêk kơpong Tây Nguyên dêi Khu xiâm kal kí.

Rôh kố, teăng mâ Khu kăn xiâm, pôa Phan Đình Trạc hiăng hbru 20 kơxu tơmeăm ăm mâu rơpŏng ki xơpá, rơpŏng ai hnoăng ki kơtiê a cheăm Dà Nhim; lăm pôu ngăn tíu xiâm séa ngăn ƀă pơkuâ tơdroăng rơkê plĕng dêi tơring Lạc Dương.