Đăi tươ̆ng Phan Văn Giang rơkâu, mơnhên mâu tơdroăng châ tơƀrê ki Kuăn pơlê thôn Đăk Tiêng Kơ Tu châ tơƀrê tung mâu hơnăm hiăng hluâ. Đăi tươ̆ng tối rơdêi: Rŭm môi tuăn cho troăng pơkâ pêi, troăng hơlâ kân dêi Đảng ƀă Pôa Hồ vâ mơnhông mơdêk ivá ó rơdêi tâi tâng hdroâng mơngế. Hiăng chiâng tơdroăng pơkâ ki lĕm, sap ing hên hơnăm kố tơdroăng tơkŭm po Hâi leh xah hêi rŭm môi tuăn tâi tâng kuăn pơlê a mâu kơpong kuăn pơlê rêh ối hiăng chiâng khôi hmâ, djâ tơdroăng pêi cheăng mât trâ̆n vêh ƀă pơlê pơla kuăn pơlê rêh ối, tơmiât troh rêm rơpŏng ƀă rêm ngế kuăn pơlê.

Roh kố, Đăi tươ̆ng Phan Văn Giang diâp 100 toăng hngêi rŭm môi tuăn ăm Kuăn pơlê mâu hdroâng kuăn ngo kong pơlê Kon Tum ƀă tâi tâng kơnâ 5 rơtal liăn. Khu râ kăn pêi cheăng ƀă kong pơlê Kon Tum xuân hiăng diâp kơxuô tơmeăm vâ chê 100 rơpŏng ai hnoăng tơnêi têa ƀă rơpŏng kơtiê cheăm Đăk La.