Xông tơpui a roh trâm mâ, teăng mâ khu râ kăn pơkuâ Đảng, Tơnêi têa, pôa Tô Lâm, Kăn xiâm hnê ngăn tơnêi têa pơtroh rơkong kơ-êng, rơkâu lĕm tro, rơkâu ivá mo sêi dêi pôa Nguyễn Phú Trọng, Kăn xiâm pơkuâ hnê ngăn Đảng troh mâu droh rơtăm hneăng hdrối nah djâ troăng ahdrối. Kăn xiâm hnê ngăn tơnêi têa pơtroh rơkong rơkâu troh mâu khu droh rơtăm mơhnŏng pleăng hnoăng cheăng hneăng hdrối, tâi tâng mâu ngế tung lâp tơnêi têa đi đo rêh sôk ro, rêh mo châ, hơniâp lĕm, pơtối troh lâp lu rơdêi hiâm mơno ‘’droh rơtăm djâ troăng ahdrối’’ tung tơdroăng mơjiâng tơnêi têa Việt Nam nhuô̆m pâ.

Nôkố lâp tơnêi têa ai dâng lối 650 rơpâu ngế droh rơtăm hneăng hdrối nah djâ troăng ahdrối veăng mâu roh tơplâ xâ xua tơniăn krê hdroâng mơngế. Tung pơla kố nah, Khu hiăng tơkŭm po hên tơdroăng ki kal tŏng gum ăm mâu droh rơtăm hneăng hdrối nah djâ troăng ahdrối. Tung mê, hiăng mơhnhôk khu tơrŭm ƀă pơlê pơla diâp ăm lối 1 rơpâu toăng hngêi tuăn pâ, rơnêu 509 toăng hngêi; mơhnhôk diâp kơxuô tơmeăm ƀă mâu tơmeăm ki ê môi tiah phĭu kơdĭng liăn, rơxế mái, tơmeăm kâ, hmân ếo, tơmeăm xúa hriâm tâp hok tro kơnâ lối 269 rơtal liăn.

Klăng roh Khu hbrâ ăm hneăng hôp kăn teăng mâ lâp tơnêi têa Khu droh rơtăm mơhnŏng pleăng hnoăng cheăng hneăng hdrối Việt Nam roh má V, hneăng hơnăm 2024 – 2029, Kăn xiâm hnê ngăn tơnêi têa pói vâ mâu khu tơrŭm pâ vế ƀă mơ-eăm tâi ivá pêi pro tơdroăng tơpui tối pói vâ dêi Pôa Hồ: “Ƀă mâu ngế hiăng khên tơnôu pleăng dêi mơheăm chhá dêi tơná’’, Đảng, Chin phuh ƀă kuăn pơlê thế ti tăng troăng ăm vâi ai tíu kâ, tíu ối tơniăn, tơdrêng amê po lâm hnê cheăng pêi ăm rêm ngế kô chôa ‘lâng mơ-eăm xêh.

‘’Pâ vế rơkong hnê pơchân dêi Pôa Hồ, mâu lêng ƀă kăn ƀô̆ châ pơtâp hiâm mơno ki lĕm môi tiah: khŏm mơ-eăm tâi hiâm mơno, khŏm pêi tâi ivá ôh tá xâu pá puât, châ hriâm tơdroăng pêi cheăng kơtăng tiô luât xua kuăn pơlê tơdrăng lĕm kheăn hôu ƀă kăn ƀô̆ tah lôi mâu tơdroăng ki ‘mêi môi tiah ôh tá vâ tơmâng tơdroăng pơkâ, kâ kơhveăm liăn ngân tơnêi têa; tơpui tơ-ê pêi tơ-ê, tơpui leăng thế pêi pro gá kô pro ăm troăng tơmiât lĕm tro, troăng tơmiât krá tơniăn, troăng pêi cheăng tơ’nôm kuăn pơlê pơkuâ dêi hnoăng cheăng. Mâu hngêi trung hriâm mê rế hnê mơhno, rế pơloăng mơnúa ăm kăn ƀô̆’’.

Kăn xiâm hnê ngăn tơnêi têa pói vâ Khu tơrŭm hiăng mơ-eăm mê thế mơ-eăm hên tâ mê nếo, hiăng pêi tâi ivá thế pêi hên tâ mê nếo, ƀă hên tơdroăng pêi ki pơxúa tâ vâ rĕng tơleăng mâu tơdroăng ối kreăng tung tơdroăng pêi cheăng ƀă Droh rơtăm mơhnŏng pleăng hnoăng cheăng hneăng hdrối, ngăn mê cho hnoăng, tơdroăng tuăn pâ, mơhno hiâm mơno pâ mơnê, ‘nâi mơnê trâu hơngế ƀă mâu ngế hiăng pleăng hnoăng cheăng, pleăng châ chăn, mơheăm chhá tơleăng lĕm hdroâng mơngế, môi tuăn tơnêi têa, mơjiâng ƀă gâk kring Tơnêi têa. Pôa Tô Lâm, Kăn xiâm hnê ngăn tơnêi têa tối nhên:

“Mâu khu xiâm, khu cheăng, kơvâ cheăng, ki má lối cho Đoân Droh rơtăm Kŏng san Hồ Chí Minh pơtối hriăn plĕng, pơkâ xúa ki rơkê troăng tơdjâ hiâm mơno Hồ Chí Minh ‘na hngêi trung hriâm kân dêi droh rơtăm djâ troăng ahdrối, mơjiâng khu kăn ƀô̆, mơjiâng rơxông droh rơtăm Việt Nam pêng păm hiâm mơno pâ nhuô̆m tơnêi têa, mơ-eăm xêh hâk tơngăm hdroâng kuăn ngo ai hiâm mơno khên tơnôu kal kí krá tơniăn, ai hiâm mơno kăch măng bâ eăng, ai ivá khên tơnôu mot tơrŭm lâp plâi tơnêi, ai tơdroăng pói vâ kân kĭn, djâ troăng ahdrối tơmiât pêi rơkê pơkuâ khoa hok kŏng ngê̆ rơkê tơdâng râ rơxông nôkố, hbrâ pleăng hnoăng cheăng, lo pêi, păng ‘nâng chiâng tơdroăng ki kân dêi tơdroăng mơjiâng ƀă gâk kring Tơnêi têa’’.

Kăn xiâm hnê ngăn tơnêi têa xuân pơkâ thế pơtối tơkŭm, rŭm môi tuăn mơjiâng Khu tơrŭm ƀă khu droh rơtăm mohnŏng pleăng hnoăng cheăng hneăng hdrối tung lâp tơnêi têa ó rơdêi; thăm veăng, châ tơƀrê tung pơhlêh nếo, mơjiâng Tơnêi têa. Tơdrêng amê tơmâng châ hlo, mơjiâng, rơnêu mâu tíu lĕm tơbâ tơdroăng roh ton nah, mâu tíu chôu ‘măn tơmeăm roh ton nah ‘na droh rơtăm djâ troăng ahdrối, châ khât chiâng ‘’Tíu tơbâ tơdroăng kăch măng’’, hnê hriâm khôi túa kăch măng.

Nôkố Khu xiâm Khu pơkuâ droh rơtăm djâ troăng ahdrối dế pêi pro môi roh mơhnhôk ƀă 2 tơdroăng kân mê cho Mơhnhôk ‘’Droh rơtăm mơhnŏng pleăng hnoăng cheăng hneăng hdrối pêi tiô troăng tơdjâ, túa cheăng, hiâm mơno Hồ Chí Minh; Tơdroăng pêi ‘’Xua tơdroăng tuăn pâ khu pú, rêm ngế kăn ƀô̆, ngế tơrŭm pêi hên tơdroăng ki lĕm’’.

74 hơnăm hiăng hluâ mâu rơxông droh rơtăm djâ troăng ahdrối hiăng pleăng dêi hnoăng cheăng, mơjiâng khôi túa ƀlêi trâng dêi droh rơtăm djâ troăng ahdrối ƀă mâu rơxông Việt Nam; pleăng hnoăng cheăng pêi tâi tâng tơdroăng cheăng, prôk troh lâp lu mâu tíu drêng Tơnêi têa kal; rêh ối xua tơdroăng tuăn pâ khu pú.