Pôa Tô Lâm, Kăn xiâm hnê ngăn tơnêi têa nếo trâm mâ khu râ kăn teăng mâ khu râ kăn pơkuâ mâu ƀok xối, mâu khu pơkuâ tơdroăng khôp. Roh trâm mâ veăng amê ai khu râ kăn pơkuâ, mâu ƀok dêi 45 khu pơkuâ tơdroăng khôp ối tung 16 tơdroăng khôp hiăng châ Đảng, Tơnêi têa mơnhên.

A roh trâm mâ, pôa Tô Lâm, Kăn xiâm hnê ngăn tơnêi têa pơtroh tâi tâng pơlê pơla, ƀok xối, yah chĭng, kuăn khôp, mâu ngế ki tiô khôp lâp tơnêi têa rơkong kơ-êng tá hiâm mơno, trâu rơdâ dêi pôa Nguyễn Phú Trọng, Kăn xiâm pơkuâ hnê ngăn Đảng. Tơdrêng amê, pơtroh rơkong troh mâu ƀok xối teăng mâ mâu tơdroăng khôp rơkâu ivá, hơniâp lĕm, rơtế mơ-eăm tiô tơdroăng prôk ƀă hdroâng mơngế.

Kăn xiâm hnê ngăn tơnêi têa pói vâ, mâu kăn pơkuâ tơdroăng khôp pơtối pêi pro lĕm tro tâ nếo hnoăng cho kông tơdjêp ki kal pơla Đảng, Tơnêi têa troh kuăn khôp; kơbông krếo kuăn khôp, mâu ngế tiô khôp a tung tơnêi têa ƀă kong têa ê, rŭm môi tuăn ƀă kuăn pơlê, kuăn pơlê lâp tơnêi têa thăm veăng mâu tơdroăng tơ’noăng pâ nhuô̆m tơnêi têa, mơnhông cheăng kâ – khôi túa lĕm – rêh ối pơlê pơla, rak tơniăn cheăng lêng, gâk kring, tơpui kâ ƀă kong têa ê; djâ troăng ahdrối pêi tiô troăng pơkâ pêi, troăng prôk dêi Đảng ƀă troăng hơlâ, luât dêi Tơnêi têa; pêi pro lĕm tro hnoăng cheăng, tơdroăng thế pêi, hnoăng dêi kuăn pơlê, pêi pro troăng prôk ki lĕm ƀă rŭm ƀă hdroâng mơngế.