Kơxê lơ 14/2, a kong pơlê Sóc Trăng hiăng po rôh hôp ‘no tơdrêng ing troăng hyôh internet ‘na tơdroăng tơbleăng pêi pro 3 tơdroăng pơkâ dêi tơnêi têa kơpong Tây Nam bộ. Pơla hơnăm 2021 – 2025, tơnêi têa pơcháu tâi tâng kơxô̆ liăn mơjiâng bro lối 8.790 rơtal liăn ăm mâu kong pơlê ối tung kơpong Tây Nam bộ vâ pêi pro 3 tơdroăng pơkâ tơnêi têa (tung mê, cho mơjiâng thôn pơlê nếo, mơnhông cheăng kâ rêh ối pơlê pơla kơpong hdroâng kuăn ngo ƀă peăng kong ngo, kơdroh kơtiê krá ton). Tung hơnăm 2022, kơxô̆ liăn tơnêi têa tŏng kum pêi pro 3 tơdroăng pơkâ ăm kơpong cho lối 3.279 rơtal liăn.

Tơpui mơgêi rôh hôp, pôa Trần Lưu Quang pơkâ thế, mâu khu xiâm, kơvâ cheăng tơnêi têa tung pơla sap ing khế 2 troh khế 3 hơnăm 2023 rĕng pêi klêi mâu hlá mơ-éa hnê mơhno ki u ối, pơkâ tơleăng hnê mơhno mâu hlá mơ-éa ki ối tơvâ tơvân vâ rĕng pơkâ tơleăng mâu xơpá tơvâ tơvân ăm mâu kong pơlê.