Kơxo lơ 10/1, Thươ̆ng tươ̆ng Trần Quang Phương, Kăn xiâm phŏ hnê ngăn Kuô̆k hô̆i hiăng troh lăm pôu, rơkâu Têt ƀă veăng Tơdroăng ‘’Kơchơ Têt tuăn pâ’’ a pơlê kong kân Đà Nẵng. Kơchơ mơđah tơbleăng tơmeăm ai 40 kơbong ‘măn tơmeăm, tơbleăng mâu tơmeăm ki kal xúa tiô troăng tŏng kum yă, “diâp kơxuô tơmeăm – phiu ro Têt’’, tung mê ai mâu tơmeăm ‘’0 liăn’’. Tơdroăng ‘măn 4.900 phĭu rôe tơmeăm diâp mâu rơpŏng kuăn pơlê a pơlê kong kân Đà Nẵng tro tơdjâk xua kong prâi pro tung hơnăm 2022.

Pôa Trần Quang Phương kheăn kơdeăn mâu tíu cheăng hiăng tơkŭm po tơdroăng cho kơnâ ‘nâng, kơnía khât tŏng kum mơngế kơtiê, tơdroăng rêh ối pá puât tơdah Têt hơtôu. Roh kố, pôa Trần Quang Phương troh lăm pôu, rơkâu Têt mâu kơ koan, tíu cheăng tung Khu pơkuâ hnê ngăn cheăng Đảng pơlê kong kân, Hô̆i đong kuăn pơlê ƀă Vi ƀan Măt trâ̆n Tơnêi têa Việt Nam pơlê kong kân Đà Nẵng.