Drêng pôa Trần Thanh Mẫn, Kăn xiâm hnê ngăn Kuô̆k hô̆i nếo troh, kuăn pơlê cheăm Nga My, tơring Phú Bình, kong pơlê Thái Nguyên hiăng tối tơbleăng ‘na tơdroăng ki hngêi trăng tơmeăm khoăng tro tơ’nhiê xua kong khía mơhot têa kân lân lu pro, ƀă tối rơhêng vâ châ tŏng gum.

“Vâi krâ nhŏng o Thái Nguyên tối tơdjuôm ƀă kuăn pơlê Nga My tối krê rơhêng vâ khât tơdroăng ki châ tŏng gum vâi krâ nhŏng o hluăn ing tơdroăng pá puât kố. Ngin ai to ƀăng klâng chiâk, iâ hía iâ, hên hía hên, ôh tá ai klâi xếo vâ poê xo”.

Ƀriê hlo tơdroăng ki tơ’nhiê hngêi trăng, hlâ rong ‘na mơngế xua kong mêi khía mơhot kân pro tơ’nhiê tâi tơmeăm khoăng ƀă klâng chiâk dêi kuăn pơlê, pôa Trần Thanh Mẫn, Kăn xiâm hnê ngăn Kuô̆k hô̆i mơnhnhôk, ƀă tối nhên troăng hơlâ tŏng gum dêi Đảng ƀă Tơnêi têa đi đo tơmâng ngăn troh tơdroăng rêh ối dêi vâi krâ nhŏng o.

“Nâ hmiân tuăn, Đảng ƀă Tơnêi têa. Măt trâ̆n rêm râ, mâu kơvâ cheăng, mâu khu râ kăn đi đo tơmâng ngăn troh tơdroăng rêh ối dêi kuăn pơlê, malối cho mâu kuăn pơlê ki ai tơdroăng rêh ối pá puât klêi kơ’nâi khía mơhot kân rôh má 3 plong mot, pro tơ’nhiê tâi hngêi trăng, prá alâi báu phái dêi vâi krâ nhŏng o. Pro tiah lâi troăng hơlâ tŏng gum dêi Đảng, Tơnêi têa ƀă kong pơlê cho athế teăm tơdrêng rak tơniăn tung tơdroăng rêh ối ăm kuăn pơlê”.

Lăm pôu kơ-êng tơdrêng kuăn pơlê a cheăm Nga My, tíu ki xuân ối tro têa lu, Pôa Trần Thanh Mẫn, Kăn xiâm hnê ngăn Kuô̆k hô̆i hiăng diâp 200 kơxuô tơmeăm mơhnhôk mâu rơpŏng kuăn pơlê ki tro tơdjâk ing khía mơhot kân rôh má 3 ƀă kong mê têa kân lân lu pro. Diâp tơmeăm ƀă kơ-êng khu lêng kring vế a cheăm Nga My, kăn xiâm hnê ngăn Kuô̆k hô̆i tối:

“Mâu kăn ƀô̆, lêng mê á xuân ‘nâi vâi pá puât khât, tơkâ luâ mâu tơdroăng xơpá, gum vâi krâ nhŏng o akố vâ ‘mâi mơnhông dêi kế tơmeăm klêi kơ’nâi khía mơhot kân rôh má 3 pro. Malối cho têa kơxĭ tâk đik, mâu vâi pú hiăng athế ‘mâi xê̆n mâu rơpŏng kuăn pơlê troh tíu tơniăn. Nôkố á châ ‘nâi cho 100% rơpŏng kuăn pơlê hiăng vêh a hngêi. Mâu vâi pú pơtối gum tơniăn tơdroăng rêh ối dêi kuăn pơlê, malối cho gum kuăn pơlê mơgrúa lĕm tíu rêh ối”.

Tối tơbleăng ăm pôa Trần Thanh Mẫn, Kăn xiâm hnê ngăn Kuô̆k hô̆i, pôa Trịnh Việt Hùng, Kăn pơkuân hnê ngăn Đảng kong pơlê Thái Nguyên ăm ‘nâi, hiăng ai 4 ngế hlâ; tiô riân tâi tâng ki kơnâ dêi mâu kế tơmeăm ki tro tơ’nhiê lối 600 rơtal liăn; lối 25 rơpâu rơpŏng athế lăm xĕn ối tíu ê tơdrêng. ‘Na pêi chiâk deăng ki tro lŭp dâng 10 rơpâu ha. Ƀă mâu kơpong ki tro têa lân lu, klêi kơ’nâi têa hiăng xiâ dế ối nhôm kô ‘mêi ‘na hyôh kong prâi, pơreăng xông tâ tú.

Tơpui a rôh pêi cheăng, pôa Trần Thanh Mẫn, Kăn xiâm hnê ngăn Kuô̆k hô̆i ăm ‘nâi, hlo tơdroăng ki tơdjâk ó khât dêi kong mê khía mơhot rôh má 3, pôa Tô Lâm, Kăn xiâm pơkuâ hnê ngăn Đảng, kăn xiâm hnê ngăn tơnêi têa hiăng ai rơkong krếo thế kuăn pơlê, kăn ƀô̆, lêng tung lâp tơnêi têa tơkŭm ‘mâi mơnhông mâu kế tơmeăm khoăng a mâu kong pơlê peăng Kơnhŏng ƀă Pơlê kong xiâm Hà Nội.

Kăn xiâm hnê ngăn Kuô̆k hô̆i xuân pơkâ thế, kong pơlê Thái Nguyên kal ngăn troăng on tơhrik, ôu têa ôu kâ hum roh ăm kuăn pơlê tơdroăng ki veăng tŏng gum kơtăng vâ rak vế ivá ăm tâi tâng kuăn pơlê; kal châ mơdêk, rơnêu mâu hngêi trung hriâm vâ rak vế tơniăn tâi tâng ăm mâu vâi o hok tro rêm râ pơrá châ troh hngêi trung; rak vế tơniăn tơdroăng gâk kring, kal kí, tơniăn tung pơlê pơla.

“Á púi vâ tiah kố, tung tơdroăng ki tŏng gum dêi rơpó, “ngế ki niân gum ngế ki pá”, tŏng gum, tơrŭm tung pơla kố cho kal khât, pin kal mơhnhôk tung ƀă ing kong pơlê ki ê ai kơxô̆ liăn ‘mâi mơnhông kế tơmeăm klêi kơ’nâi khía mơhot kân rôh má 3 pro tung tơdroăng ki athế tơdâng tơ’mô, pôi tá ăm ai tơdroăng ki tŏng gum ki lâi ôh tá châ tŏng gum tung tơdroăng ki hbrâ ví têa kân lân lu. Môi hdroh nếo, teăng mâ kăn pơkuâ Đảng, Tơnêi têa, teăng mâ khu ki pêi cheăng, á pâ pơtroh troh Đảng ƀô̆ kăn pơkuâ ƀă kuăn pơlê kong pơlê Thái Nguyên tơkâ luâ xơpá, pơloăng mơnúa vâ tơniăn tơdroăng rêh ối ăm kuăn pơlê”.

Kăn xiâm hnê ngăn Kuô̆k hô̆i tối tiah kố, khía mơhot kân hiăng tơkâ luâ, troh têa lân lu xuân hiăng xiâ, klêi kơ’nâi mâu rôh khía mơhot mê pro hiăng ‘mă chôu mâu tơdroăng cho tơ’nhiê hngêi trăng tơmeăm khoăng, hlâ rong ‘na mơngế, hngêi trung hriâm athế ‘mêng rơnêu, vêh pro; mơgrúa lĕm kong prâi tơnêi tơníu tro tơdjâk.

Vâ ‘mâi mơnhông kế tơmeăm klêi kơ’nâi kong mê khía mơhot rôh má 3 pro, Kăn xiâm hnê ngăn Kuô̆k hô̆i pơkâ thế, tá khu pơkuâ tơdroăng kal kí dêi kong pơlê Thái Nguyên, ing khu râ Đảng, Hô̆i đong hnê ngăn, Vi ƀan hnê ngăn, Măt trâ̆n Tơnêi têa Việt Nam, mâu râ, mâu kơvâ cheăng, rêm râ athế veăng gum ‘mâi mơnhông, pôi tá tơngôu.