Khu xiâm pơkuâ Mô đô̆i gak tơkăng kong, Khu xiâm Khu pơkuâ vâi kơdrâi Việt Nam nếo tơrŭm ƀă kong pơlê Thừa Thiên Huế tơkŭm po tơdroăng ‘’Hơngui tơkăng kong hơtôu hiâm mơno kuăn pơlê tung pơlê’’ a cheăm Hồng Vân, tơring A Lưới. Troh veăng ƀă xông tơpui a Tơdroăng pêi cheăng, pôa Võ Văn Thưởng, Hnê mơhno má môi Khu pơkuâ hnê ngăn cheăng Đảng tối nhên, mâu hơnăm hluâ, Đảng, Tơnêi têa pin đi đo tơmâng, ai hên troăng pơkâ pêi, troăng hơlâ, mơhnhôk tơdroăng ki veăng dêi mâu khu râ, mâu kơvâ cheăng ƀă lâp pơlê pơla rak ngăn ăm kuăn pơlê, ki má lối cho vâi krâ kuăn pơlê kơpong hơngế hơngo, tíu tơkăng kong, rơlố.

Tung tơdroăng mê ai veăng kân kĭn dêi khu Mô đô̆i gâk tơkăng kong. Ki rơhêng vâ tối, Mô đô̆i gâk tơkăng kong lâp tơnêi têa hiăng râng ko ƀă păn roăng vâ chê 3.000 ngế hok tro tíu tơkăng kong, rơlố. Tơdroăng ‘’Hơngui Tơkăng kong hơtô hiâm mơno kuăn pơlê tung pơlê’’ Têt Quý Mão 2023 hiăng pêi pro tŭm mâu troăng pơkâ pêi, troăng hơlâ dêi Đảng, Tơnêi têa ‘na xăm kơklêa, kơdroh kơtiê; pêi pro tơdroăng ‘’Lâp tơnêi têa tơdjuôm ivá kum mơngế kơtiê - ôh tá ăm ai kơbố tro lôi parŏng” xua Chin phuh mơhnhôk pêi pro.