Drêng Têt Lo hơnăm nếo Quý Mão 2023, kơxo lơ 8/1, pôa Vương Đình Huệ, kăn xiâm hnê ngăn Kuô̆k hô̆i hiăng troh pôu, rơkâu Têt a Pơlê kong kơdrâm Đồng Hới ƀă tơring Quảng Ninh, kong pơlê Quảng Bình. Teăng mâ kăn pơkuâ Đảng, Tơnêi têa, Kăn xiâm hnê ngăn Kuô̆k hô̆i rơkâu vâi krâ nhŏng o kuăn pơlê ki tơnăng ká xi xŏng cheăm Bảo Bình, Đồng Hới tơdah hơnăm nếo ƀă hên tơdroăng ki tơ’lêi hlâu tâ, ai môi hơnăm kong mê tro, tô ‘ló, ká xi xŏng châ pêng plong tuk ƀă ai tơdroăng rêh ối tơniăn tâ.

Kăn xiâm hnê ngăn Kuô̆k hô̆i rơhêng vâ vâi krâ nhŏng o mơdêk tơdroăng tơrŭm vâ tơkâ luâ mâu tơdroăng ki xơpá. Pôa Vương Đình Huệ diâp 50 hnoăng tơmeăm ăm kuăn pơlê ki tơnăng ká xi xŏng a cheăm. Rơtế tung hâi ki mê, pôa Vương Đình Huệ ƀă khu kăn pêi dêi hnoăng cheăng hiăng troh pôu, rơkâu Têt, diâp tơmeăm ăm rơpŏng ki ai hnoăng tơnêi têa, mâu kơtiê, kŏng nhân, mâu ngế pêi cheăng ki xơpá a tơring Quảng Ninh, kong pơlê Quảng Bình.

Pôa Vương Đình Huệ pơkâ thế kong pơlê, tơring pơtối tơmâng ngăn troh tơdroăng rêh ối dêi mâu ngế ki ai hnoăng, rơpŏng ki ai hnoăng tơnêi têa ƀă khu ngế ki xơpá, kơtiê, ai tơdroăng rêh ối xơpá.